NULLA 148 - BIBALDA TA PELDETTA

¹ Suburgi Ma-Vatɗina. Suburgi Ma-Vatɗina kulo hay wuralawn pa. Suburumu hay liyn ma kulona.

² Suburumu, nigi sa sunda-wuralawna valamu kaf, suburumu, nigi vok-ma-duura kaf.

³ Suburumu, fatta hiɗi tilla, suburumu, nigi mislekŋa ma vul haraŋa kaf.

⁴ Suburumu, nigi liyn ma kulona vi wuralawna, nigi niyna ma ka kulo'o hay dukalawna.

⁵ Hinsi subur semda vi Ma-Vatɗina, kay nam vul hagata, slen li'e may.

⁶ Nam tunsi hay liyamu liyamu kay dok-doko, ta-ta hay vatɗita, nam vul gatta valamu, nisi as rawa' goyɗi.

⁷ Suburgi Ma-Vatɗina gaa kay nagata pa, nigi muuriyan ma hay niyna hiɗi ma hay zul-niyna pet.

⁸ Kuta hiɗi mogoyna, kutna hiɗi tukŋa, birina ma donona, nigi sa hob vun dita valamu.

⁹ Hiɗiyna hiɗi boŋoloŋŋa kaf, gu ma vuɗna hiɗi gu-gamna kaf,

¹⁰ Muuriyana hiɗi farayn kaf, sle ma harmatna hiɗi layayn ma fok kulona kaf,

¹¹ muliyan sa ŋulona vi nagata hiɗi sumuna kaf, muliyan hiɗi sa ka kitata vi nagata pet.

¹² Joriyona hiɗi guro-boyna, sa maariyana hiɗi gurosgurayna,

¹³ Hinsi subur semda vi Ma-Vatɗina, kay semda valam nam kep kulo suwa; ŋolda valamu kulo kay nagata hiɗi dukalawn kafe.

¹⁴ Nam sli miyokŋa vi sumuna valam kulo'o, nul ma suburta vi sa peldetna valamu kaf, kay gurona vi Israyel, hiɗi sum sa ka goboy hiɗi namu. Suburgi Ma-Vatɗina.