NULLA 147 - BIBALDA TA PELDETTA

¹ Suburgi Ma-Vatɗina, kay kayni ŋaa'a a gi nul ma suburta tam Lawna vaya. Kayni jifiya, nul ma suburta kayni ŋaa'a hay liyamu.

² Ma-Vatɗina hot in Yerusalem kulo'o, nam tok sa meray goyna vi Israyel;

³ nisi sa diksi kusiya nam muɗsi ŋaa'a, nam jun vun milla visiya.

⁴ Nam ŋa ŋaɓta vi mislekŋa, nam tunum semda kalam kafe.

⁵ Bum-Sumuna vaya nam ŋolo, gaŋeraŋa kaw kuɗ donota valamu, yalda valamu ya' may dabɗi.

⁶ Ma-Vatɗina gut kuɗ sa ziy-zlata, sa joona nam hotsi yisi gaa'a kay nagata.

⁷ Gigi nul tam Ma-Vatɗina hiɗi lop ma slugona, gigi nul ma suburta hiɗi dilla tam Lawna vaya.

⁸ Nam duk liy ma kulona hiɗi ɗugulla, nam kot law ma sina kay nagata, nam hin usna ɦar kulo'o kay hiɗiyna.

⁹ Nam vul mi muuriyana tina valamu, nam vul tina mi gurona vi gaw-gawna ma tiya.

¹⁰ Nam firi hay donota vi kulumnaɗi, gay sana may kiram ŋaaɗi kaw.

¹¹ Ma-Vatɗina minsi si sa li nar kuɗumna, nisi sa zam ɓam ŋaata valamna.

¹² Suburag Ma-Vatɗina, nak Yerusalem; suburag semda valamu, nak Siyon.

¹³ 13 Kay nam kot vun-galana vag dono'o, nam gi bolo kay gurona vag sa kulo hayagu.

¹⁴ Nam vul sle'ta hay nagata vagu, nam hobag hiɗi alkamare ma ŋaana.

¹⁵ Nam gi deŋga valamu goy kay nagata, yoboyna valamu jaŋ koloy ŋolo.

¹⁶ Nam vul futuw-mogoyna ki ɗuŋus fok-dimin nala, nam gi sleɗnaya ki butuw-kuna nala.

¹⁷ Nam yak mogoyna valam goyo ki deheleŋŋa nala. Sa ma as kay col vok slena valamu mi gige?

¹⁸ Nam gi dita valamiya, dita valam yor slen goyo; nam hin simeɗna valamu biwa, niyna riŋ kaw.

¹⁹ Nam ɗek yoboyna valamu mi jafna vi Yakub, nam ɗek vun-ma-gatna valamu hiɗi ɗota-gatta valamu mi Israyel.

²⁰ Nam may li ki kayn nala tam jaf-sum sara'a noŋɗi, Kitana valamu nisi wumɗi, suburgi Ma-Vatɗina.