NULLA 146 - BIBALDA TA PELDETTA

¹ Suburgi Ma-Vatɗina. Ciwta vanu suburag Ma-Vatɗina.

² Hay li ma nan ka iri tuwa, nan min subur Ma-Vatɗina, nan min gi nul ma suburta tam Lawna vanu, hay li ma nan ka iri tuwa.

³ Zamgi ɓam muliyanɗi, zamgi ɓam gurona vi sum-wuranɗi kaw, nisi sa su'da tay hay ɓisiɗi.

⁴ Kay sukŋa visi kal goyo, nisi hot hay nagana, hay fatta na'ta, varta visiya ta nisi vara'a as li va loɗi.

⁵ Sle'ta ka kay sa ma gutda valamu ka hay Lawna vi Yakub, sa ma cub Ma-Vatɗina Lawna valamu hiɗi sle'ta.

⁶ Nam ma li wuralawna hiɗi nagata, niyn ŋolla hiɗi sle ma hayam petna kaw, nam ma gasita valamu ka ta-ta hay vatɗita.

⁷ Nam gi diram kuɗ sum sa vun curo'da, nam vul tina mi sa mayt cisina, Ma-Vatɗina but goy sa junina.

⁸ Ma-Vatɗina mal ir sa dukin goyo, sa guɗofi gaana Ma-Vatɗina yawsi kulo'o, Ma-Vatɗina min sa ɗigera.

⁹ Ma-Vatɗina koɗ ŋarak kay sa pulla, sa kuyuna hiɗi sa duhulla, nam ŋomsi ŋil tuwsiya, may sa jiw-zlata nam muɗ hagata visi guniya.

¹⁰ Ma-Vatɗina min mus mulla ta-ta hay vatɗita, naŋ Siyon, Lawna vaŋu ka ta-ta tam jafsi voksi lo voksi lo. Suburgi Ma-Vatɗina.