NULLA 145 - BIBALDA TA PELDETTA

1 Suburta. Nulla vi David.

¹ Suburta. Nulla vi David. Lawna vanu, nan min slaŋ yaŋ kulo'o, naŋu mi mulla. Nan min sli semda vaŋ kulo'o dok-dok, hay vatɗita vatɗita.

² Hay buurta kaf nan min gaŋ deɓe, nan min subur semda vaŋ dok-doko ta-ta hay vatɗita.

³ Ma-Vatɗina mi ma ŋolla, suburta valam ŋolo kaw, ŋolda valamu sa as kay feka'ɗi.

⁴ Jaf ma kepna ma siwel lopna vaŋu goy tam jaf hena, lopna vaŋu ma gaŋeraŋa nisi ma dum goyo.

⁵ Nan min di goyo kay gajijita vaŋu hiɗi ŋolda vaŋu, kay lop ma ŋulo-ŋulona vaŋ kaw; nan min gi nulu kay ŋaata vaŋ kaw.

⁶ Sumuna ma di goy kay lopna vaŋ ma gaŋeraŋa, ma narta kuɗumna, nan min di goy kay ŋolda vaŋu.

⁷ Hinsi siwel goyo kay gi-humda vi ŋaata vaŋ ta ŋolda, hinsi tiy sem ɗigerta vaŋu.

⁸ Ma-Vatɗina li slugota, wi hawta kaw, nam muɗ ɦiy gosoyɗi, may ŋaata valamu ka ŋolo.

⁹ Ma-Vatɗina li ŋaa'a tam sumun pete, slugota valamu ka kay lopna vi ɓalam kafe.

¹⁰ Ma-Vatɗina, lopna vaŋu kaf ma vulaŋ suburta, sa peldetna vaŋu kaf ma sli semda vaŋ kulo'o.

¹¹ Nisi ma di goy kay gajijita vi mulda vaŋu, nisi ma di goy kay donota vaŋ kaw.

¹² Kay ɗek donota vaŋ goyo tam gurona vi sana, hiɗi gajijita vi mulda vaŋu ta wileta.

¹³ Mulda vaŋ kayni ti mulda ta mus ta-ta hay vatɗita, gaŋeraŋa vi mulda vaŋu ka ta-ta tam jafsi voksi lo voksi lo.

¹⁴ Nisi kaf sa puk gaa'a, Ma-Vatɗina visi ɓisi kulo'o, nisi kaf sa maŋaya nam yawsi kulo'o.

¹⁵ Ir kaf ka cubaŋ naŋu, naŋ vulsi tina visiya hay liyamu,

¹⁶ naŋ mal ɓaŋ goyo, hob sle ma irina hiɗi sle ma ŋaana pet (hay tina).

¹⁷ Ma-Vatɗina nam ɗigere hay hagata valam kaf, nam li ŋaata kay lopna valam pet kaw.

¹⁸ Ma-Vatɗina ka goboy hiɗi nisi sa yumu, nisi sa yumu hiɗi gasita.

¹⁹ Nam hob minda vi nisi sa li nar kuɗumu, nam hum tiyta visiya, suɗsi goyo may.

²⁰ Ma-Vatɗina koɗ ŋarak kay nisi sa minimna kaf, may sa jiw-zlata kaf nam vatsi goyo.

²¹ Hin vunanu subur sem Ma-Vatɗina, hin sumun kaf subur semda valamu ta peldetta, dok-doko ta-ta hay vatɗita.