NULLA 144 - BIBALDA TA PELDETTA

1 Nulla vi David

¹ Nulla vi David Gi-deɓta tam Ma-Vatɗina hiɗiyna vanu, nam hatan ɓanu kay duura, hatan cita-ɓanu kay li duura kaw.

² ŋaata vanu hiɗi gulmun ma duura vanu, ziy ma donona ma duura vanu hiɗi ma su'da vanu. Kuroŋŋa vanu, nam ma nan ŋay tuwan talamna, nam ma gat sumuna vanu kay hum kuɗanu.

³ Ma-Vatɗina, sana nam mi gige a naŋ var kalamu? Goora vi sana mi gige a naŋ wumu?

⁴ Sana nam ki suk ɦawa nala, buura valamu ka ki ŋus-guna ma raw goyna ɦawa nala.

⁵ Ma-Vatɗina, mar dukalawna vaŋ gaa goboyo, jikaŋay gaa'a, tunaŋ ɓan tam hiɗiyna, kay nam ma sli kuwa.

⁶ Hin wileta li'e, meraŋ sa gaw kanna goyo, ɓeŋ ɓarawta vaŋ goyo, mersi goyo.

⁷ Meɗaŋ ɓaŋay kulo pa; butan goyo, suɗan goyo kay niyn ma ŋulona, suɗan goyo hay ɓam gurona vi sum sa pulla.

⁸ Nisi sa vunsi di ɗutta, sa ɓisi ta jufta ka sinda.

⁹ Lawna, nan min gi nul ma wulina taŋu, hiɗi dil ma zigew doogona nan min gi nul ma gi-deɓta taŋu.

¹⁰ Naŋu mi nam ma vul su'da mi mulla, naŋu mi ma suɗ sa ma sunda vaŋu David goy kay kew-gaferaŋ ma joona.

¹¹ Butan goyo, suɗan goyo hay ɓam gurona vi sum sa pulla. Nisi sa vunsi di ɗutta, sa ɓisi ta jufta ka sinda.

¹² Kay guro-jufayna vuma'a ka ki gu ma wul kulo'o hay joriyota valamu nala; guro-boyna vuma'a ki dolla ma ceɗayna, ma ka hay wur-daŋŋa vi mulla nala.

¹³ Feera vuma'a hobiya hiɗi slen mara'a mara'a pet, A fukunayna vuma'a ma biya birimi birimi suw birim doogo kaw hay fulda vuma'a.

¹⁴ A luwayna vuma'a ma biya'a kaw, A slen ma ɓulakɗi, A sumun ma kal daŋgayɗi, A tiyna ma pat kulo'o hay hagata vi hoyok-ziynɗi kaw.

¹⁵ Sle'ta ka kay sum sa ka nala, sle'ta ka kay sum sa Lawna visi mi Ma-Vatɗina.