NULLA 143 - BIBALDA TA PELDETTA

1 Nulla vi David.

¹ Nulla vi David. Ma-Vatɗina hum siɗawta vanu, jak humaŋ tam giɗel-delta vanu, humanu hay gasita vaŋu, hay ɗigerta vaŋu.

² Ka kitat kay sa ma sunda vaŋɗi, kay sa ma iriya ma ɗigere vokaŋ mayɗi.

³ Sa ma gawta ka digiɗ ciwta vanu, nam ka tay ciwta van gaa'a; nam hinan mus hay jufunda, ki sa miti jew ɓa-ɓana nala.

⁴ Kay na'ta donota vanu hayan kalafi vatawa, dikanu muɗi nari kalaf hayanu.

⁵ Human gan kay buur ma ɓa-ɓana, nan vara vara kay lopna vaŋ kafe, nan vara vara kay lopna vi ɓaŋu.

⁶ Nan meɗ ɓan goy taŋu, ciwta vanu cubaŋu hiɗi laata ki nagata ta soy goyta nala. Gi-suk.

⁷ Ma-Vatɗina, human gosoyo, donota vanu min vat goyo, ŋay iraŋ kanɗi, kay nan ma muɗ ki nisi sa tuɗ gaa hay zulda naɗi.

⁸ Hinan wi ŋaata vaŋu hay graw culumta pa, kay nan vi hayaŋu, ɗekan kay hagata ta nan ma poy haya'ta, kay nan muɗ iran taŋu.

⁹ Butan goyo hay ɓam sa gawta, Ma-Vatɗina! Kay nan gar liyn ma ŋayna kataŋu.

¹⁰ Hatanu kay li minda vaŋu, kay naŋu mi Lawna vanu. Hin ŋusta vaŋu ta ŋaata ŋomanu hay hagata ɗigerta.

¹¹ Hay semda vaŋu, Ma-Vatɗina, ŋomaŋ irita vanu, hay ɗigerta vaŋu, kal ciwta van ay goy vun lasta pa.

¹² Kuɗ ŋaata vaŋu, vataŋ sa gawt kanna goyo, sa li ciwta van joo'o naŋ ma ɓulaksi goyo, kay nanu mi sa ma sunda vaŋu.