NULLA 141 - BIBALDA TA PELDETTA

1 Nulla vi David.

¹ Nulla vi David. Ma-Vatɗina nan yaŋawa, naŋay gosoy tanu, muɗ humaŋ tam delanu, hay li ma nan yaŋu, jak humaŋ tanu hay li ma nan yaŋu.

² Hin siɗawta vanu co vok iraŋu ki ɗifin ma no'osna nala, hin ɓan ma kulo meɗayna li ki ɗifin ma vulatina nala:

³ Ma-Vatɗina, ŋoman vunanu, ŋoman sinanu kaw.

⁴ Zutan dikanu tam va ma jooɗi, tam lop ma joona hiɗi sum sa li jootaɗi kaw, hinan ti kuɗ tina visi ma jibetnaɗi kaw.

⁵ Hin sa ma ɗigera watanu, kay kayni ti slugo'o; hinim gatanu, kayni ki mul ma ɦoki kanu nala, nan ma li ɦiy kay kaynɗi, may cirepta vi sum sa joona as tel siɗawta vanɗi.

⁶ Hin sa ka kitana visiya zutis gaa'a kay hiɗiyna, nisi kay tuwsiya ma wi ala yoboyna vanu jifiya.

⁷ Ki sum sa zum nagata mun nagat goyo nala, zokma kaw meri goy ki kayn nala hay liyna vi sa mitina.

⁸ Iran muɗi kayni kataŋ naŋ Ma-Vatɗina Bum-Sumuna, nan gar liy ma ŋayna kataŋ naŋu, naŋ noy ciwta van goyɗi.

⁹ Ŋomanu kay jawta ta nisi gana' kanu, kay gini'na vi nisi sa li joota kaw.

¹⁰ Hin sa jiw-zlata cuk gaa hay luwanda ta nisi gana'ta, may nan hayɗin hinan raw goy ɦawa'a.