NULLA 140 - BIBALDA TA PELDETTA

¹ Tam ma ŋolla vi sa gi nulla. Nulla vi David.

² Ma-Vatɗina, suɗan goyo kay sum sa joona, koɗan ŋarak kanu kay sum sa waskayna,

³ Sa var varta joota hay diksiya, sa tuwsi koti dok-dok kay li duura.

⁴ Nisi ligaɗ siysi hiliw-hiliw' ki siy guyna nala, Sinaw guy-makayda ka vunsiya. Gi-suk.

⁵ Ma-Vatɗina, koɗan ŋarak kanu kay sum sa jiw-zlata, ŋomanu kay sum sa waskayna, sa ka vara kay gan gaa'a.

⁶ Sa sli yisi kulona gan jawta hiɗi gini'na goy vokanu, nisi zlar luwanda goy gaŋ hagata, nisi gan baayta goy vokanu. Gi-suk.

⁷ Nan di tam Ma-Vatɗina, naŋu mi Lawna vanu, Ma-Vatɗina, jak humaŋ tam della vi siɗawta vanu.

⁸ Ma-Vatɗina Bum-Sumuna, donota vi su'da vanu, naŋ kusuɓan yanawa hay fat ma duura.

⁹ Ma-Vatɗina, hin minda vi sa ma jiw-zlata liɗi, hinim hob vun va ma nam min lumnaɗi, kay a nam ma subur tuwamɗi. Gi-suk.

¹⁰ Sum sa ŋuyanu hin joota vi vunsi hot kisiya.

¹¹ Hin veŋ ma kuta cuk gaa kisiya. Hinim cuksi hay kuta, hay zul ma wiŋŋa ta-ta nisi fi fok kuloɗi.

¹² Sa ma vunam di sinda fi mus dono'o gaa kay nagatɗi, sa ma li joota hiɗi dono'o, joota ma bam goyo.

¹³ Nan wi'e, Ma-Vatɗina ma gut kuɗ sa maŋayna, ma vul ɗigerta mi sa hawna kaw.

¹⁴ Awa, sa ɗigera ma tiy semda vaŋu, sum sa gasina ma lak vok iraŋu.