NULLA 132 - BIBALDA TA PELDETTA

1 Nul ma rogoyta.

¹ Nul ma rogoyta. Ma-Vatɗina, humaŋ ma gaŋ kay David, kay lasta valam kafe.

² Nanige nam yi va kalamu tam Ma-Vatɗina nam yi va kalamu vok ma donona vi Yakub ala:

³ Nan ma kal kalafi hay guɗukŋa ma nan bur hayamnaɗi, nan min bur gaa kay raŋgawna vanɗi,

⁴ nan min kal senɗi, hin iran mot gaaɗi kaw,

⁵ ta-ta nan fi liyna kay Ma-Vatɗina tuwa, ta-ta nan fi liyna kay ma gaŋeraŋa vi Yakub tuwa.

⁶ Ɗuwa, nay humsi law kalamu hay Efrata, nay fumu hay sinena vi Yaar.

⁷ Tuɗay hay ziyn ma musta valamu, girifay gaa'a vok va ma nam tun wur-selem kalamna.

⁸ Fokaŋ kulo'o Ma-Vatɗina, naŋaya hay liyna vaŋ ma tun-sukŋa, naŋu hiɗi arkena vi donota vaŋu.

⁹ Hin muliyan-sa-ɗifinna vaŋu cuki hiɗi ɗigerta, hin sa peldetna vaŋu siwel hiɗi firita kaw.

¹⁰ Kuɗ David sa ma sunda vaŋu, naŋ ma zut faŋ ma mul ɦoki kamna goy bugolomɗi.

¹¹ Ma-Vatɗina yi va kalamu tam David hiɗi gasita, nam min hot bugolomɗi kaw, ala: Nan ma musum kay zlamda-mulda vaŋ ɗawni mi goor ma naŋ kay tuwaŋ vuɗumna.

¹² La gurona vaŋu li kuɗ bonota vanu hiɗi dita vanu ta nan hatsiya, gurona visi kaw ma lak kay zlamda-mulda vaŋ dok-doko.

¹³ Awa, Ma-Vatɗina vilek Siyonawa, nam min Siyon kay nam min mus haya.

¹⁴ Kayni mi liyn ma tun-sukka vanu, ta-ta hay vatɗita, nan min mus haya, kay hayan dar kayni.

¹⁵ Nan min gi bol kay tina valamu, sa hawna valamu nan min hobsi hiɗi tina.

¹⁶ Sa-ɗifinna valamu kaw nan min cuksi hiɗi su'da, sa peldetna valamu ma siwel kulo'o hiɗi firita.

¹⁷ Ɗawni nan ma sli yam donota vi David kulo'o, nan ma kot fitilla kep kay fanna ma mul ɦoki kalamna.

¹⁸ Sa gaw kalamna nan min gansi hiɗi zulota, bogorayna valamu ma wile' kulo kalamu.