NULLA 119 - BIBALDA TA PELDETTA

¹ Sle'ta ka kay nisi sa poyta visi ka bay joota, nisi sa poy hay vun-ma-gatna vi Ma-Vatɗina.

² Sle'ta ka kay nisi sa vi kuɗ yoboyna valamu, sa garamu hiɗi diksi kaf.

³ Awa, nisi sa li bay-ɗigertaɗi, may poy hay hagata valamu.

⁴ Naŋ vul ɗota-gatta vaŋawa, kay numa ma li kuɗa'a hay liya' ɗiger.

⁵ Hin hagata vanu koti ŋaa'a kotge, kay nan ma vi kuɗ dita-colita vaŋu.

⁶ Hay na'ta nan ma muɗ goy zuloɗi, hay li ma nan ɗuw vun-ma-gatna vaŋu pet ŋaa'a.

⁷ Nan min gaŋ deɓe hiɗi gasita vi dikan kaf, hay li ma nan hat ɗigerta vi kitana vaŋu.

⁸ Nan min vi kuɗ ɗota-gatta vaŋu, hinan viy goy waaɗige.

⁹ Sa ma joriyona ma kot hagata valamu goy cine' cine' hiɗi mige? Vi kuɗ yoboyna vaŋu kota' nala.

¹⁰ Hiɗi dikan kaf nan garaŋawa, hinan viy goy hay vun-ma-gatna vaŋɗige.

¹¹ Yoboyna vaŋu nan ŋayamawa hay dikanu, kay nan ma li suluk kataŋɗi.

¹² Gaŋ deɓ ŋolo Ma-Vatɗina, hatan ɗota-gatta vaŋu.

¹³ Hiɗi vunanu nan di goy kay yoboyna ma may goy hay vunaŋ pana.

¹⁴ Nan li firiya hay hagata vi di-goyta vaŋu, ki nan ka hiɗi farayna kaf nala.

¹⁵ Nan min vara kay vun-ma-gatna vaŋu, var ŋaa'a kay hagata vaŋu kaw.

¹⁶ Nan min firiya kay ɗota-gatta vaŋu, yan min jok yoboyna vaŋɗi kaw.

¹⁷ Laŋ sa sunda vaŋ ŋaa'a lige, kay nan fi mus iriya. Nala nan min vi kuɗ yoboyna vaŋu.

¹⁸ Malan iran goyo, kay nan fi wi sle ma ŋaana ŋolo hay vun-ma-gatna vaŋu.

¹⁹ Nanu sa ma pulla kay nagata, Ŋay vun-ma-gatna vaŋ goy kanɗi.

²⁰ Sutiyan toya, kay dikan ma ka tan kay vun-ma-gatna vaŋ dok-dokŋa.

²¹ Naŋ gat vun sum sa sli yisi kulona, sa beɗi goyna, sa hin vun-ma-gatna vaŋ goyna.

²² Yaw zulota hiɗi burahta goy kanu, kay nan vi kuɗ di-goyta vaŋu.

²³ Muliyana kaw lakay gaa'a kay kus yoboy ma joona kanu, may sa ma sunda vaŋu vara kay ɗota-gatta vaŋu.

²⁴ Dita vaŋu na' ŋaa'a kanu, kay na' ɗekan hagata.

²⁵ Ciwta vanu luguti gaa hay butuwna, hinan mus iriya kuɗ yoboyna vaŋu.

²⁶ Nan vaŋ labara kay irita vanu, naŋ human kaw. Hatan ɗota-gatta vaŋ hatge.

²⁷ Hinan wi hagata vi ɗota-gatta vaŋu, nan ma vara vara kay lopna vaŋ ma ŋulona.

²⁸ Dikan ka yor ŋolo, fokan kulo'o kuɗ yoboyna vaŋu.

²⁹ Yaw hagata vi sinda goy kanu, vulan slugota kay tap kuɗ gatta vaŋu.

³⁰ Nan vilek hagata gasitawa, vun-ma-gatna vaŋu nan tunumawa vok iranu.

³¹ Nan jun tuwan tam di-goyta vaŋu, Ma-Vatɗina, naŋ hinan muɗ zuloɗi.

³² Nan min jaŋ hay hagata vi vun-ma-gatna vaŋu, kay naŋ malan dikan goy ŋol suwa.

³³ Ma-Vatɗina, hatan hagata vi ɗota-gatta vaŋu, nala nan ma vi kuɗa'a ta-ta hay dabaŋ-gu'ta.

³⁴ Hatanu, nala nan ma vi kuɗ vun-ma-gatna vaŋu, awa, nan ma vi kuɗumu hiɗi dikan kaf.

³⁵ Van ɓanu kay nan ma poy hay hagata vi vun-ma-gatna vaŋu, kay hay kayni nan firiya.

³⁶ Muɗan dikan tam dita vaŋu, may tam darta faraynɗi.

³⁷ Hinan ɗuw sle ma waa waanɗi, hinan mus iriya kuɗ hagata vaŋu.

³⁸ Hobaŋ vun deŋga vaŋu kat sa ma sunda vaŋu, yoboyn ma koti kay nisi sa li nar kuɗaŋu.

³⁹ Slaŋ zulota van ta nan li nar ka'ta goyo, kay vun-ma-gatna vaŋu nam ŋaa'a.

⁴⁰ Ɗuwaŋu, hayan tiy kay vun-ma-gatna vaŋu, hinan mus iriya hay ɗigerta vaŋu.

⁴¹ Ma-Vatɗina, hin slugota vaŋu ma kanu, hin su'da vaŋu ma'a kuɗ deŋga vaŋu.

⁴² Nala nan ma hot dita tam sa ma ŋulanu, kay nan vul tuwan tam yoboyna vaŋu.

⁴³ Yaw yoboy ma gasina goy hay vunan petɗi, kay nan ka cub kitana vaŋu.

⁴⁴ Nan min ŋom vun-ma-gatna vaŋu dok-doko, ta-ta hay vatɗita.

⁴⁵ Nan ma poy goy butiya, kay nan ka gar ɗota-gatta vaŋu.

⁴⁶ Nan min kus yoboy kay dita vaŋu vok muliyana, nan ma muɗ goy zuloɗi kaw.

⁴⁷ Nan min firiya kay vun-ma-gatna vaŋu, nan minimu.

⁴⁸ Nan min meɗ ɓan kulo'o tam vun-ma-gatna vaŋu ma nan minimna, nan min vara kay dita-colita vaŋu.

⁴⁹ Humaŋ jak' kay deŋga vaŋu tam sa ma sunda vaŋu, kay naŋ vulan cubta-sle'ta.

⁵⁰ Kayni ti teŋ-irta vanu hay lasta, kay deŋga vaŋu vulan irita.

⁵¹ Sa sli yisi kulona ŋulan ŋolo, may nan cal goy hiɗi vun-ma-gatna vaŋɗi.

⁵² Ma-Vatɗina, nan vara kay kitana vaŋ ma ɓa-ɓana, nala nan teŋ iranu.

⁵³ Dikan muɗ ɦiy ŋolo hay li ma iran wi sa jiw-zlata, sa noy gatta vaŋ goyna.

⁵⁴ Nan gi nulu hiɗi ɗota-gatta vaŋu, hay ziyna vanu ma nan ka hayam pulu.

⁵⁵ Hay henjeta, human gan kay semda vaŋu, Ma-Vatɗina, nan ŋom gatta vaŋu kaw.

⁵⁶ Kayni vuli manu kay tuwanu, kay nan li kuɗ dita-colita vaŋu.

⁵⁷ Nan di'e: Galla vanu kayni kay ŋom yoboyna vaŋu. Ma-Vatɗina.

⁵⁸ Nan siɗawaŋu hiɗi dikan kaf, lan slugota lige kuɗ yoboyna vaŋu.

⁵⁹ Nan vara kay poyta vanu, nan tun iranu tam dita vaŋu.

⁶⁰ Nan li koloyo, nan vi yanɗi kay li kuɗ vun-ma-gatna vaŋu.

⁶¹ Jawta vi sa jiw-zlatna ŋuyanawa, may yan jok vun-ma-gatna vaŋɗi.

⁶² Hay henjet ŋolda nan fok kulo'o kay suburaŋu, kuɗ ɗigerta vi vun-ma-gatna vaŋu.

⁶³ Nan tap hiɗi nisi kaf sa li nar kuɗaŋu, hiɗi nisi kaf sa vi kuɗ ɗota-gatta vaŋu.

⁶⁴ Ma-Vatɗina, nagata hobawa hiɗi ŋaata vaŋu, hatan ɗota-gatta vaŋu.

⁶⁵ Ma-Vatɗina, naŋ li ŋaatawa tam sunda vaŋu, kuɗ yoboyna vaŋu.

⁶⁶ Hatan ŋalda hiɗi wida kaw, kay nan vi'e hay vun-ma-gatna vaŋu.

⁶⁷ Hay li ma sarta bay fan tuwa, nan viy goyo, may wulini nan vi kuɗ yoboyna vaŋu.

⁶⁸ Naŋu ŋaa'a, li ŋaata kaw, hatan ɗota-gatta vaŋu.

⁶⁹ Sa sli yisi kulona niŋa law ma sinna kanu, may hiɗi dikan kaf nan min vi kuɗ ɗota-gatta vaŋu.

⁷⁰ Diksi may ɓirsi noŋɗi, may nan li firiya hay vun-ma-gatna vaŋu.

⁷¹ Sarta van kayni ŋaa'a, kay nan vi hat ɗota-gatta vaŋu.

⁷² Vun-ma-gatna vi vunaŋu nam ŋaa'a kanu suw sle ma doorona hiɗi ma ora birimi.

⁷³ Ɓaŋu kotanawa, lanawa kaw. Vulan yamda-wida kay nan fi hat vun-ma-gatna vaŋu.

⁷⁴ Nisi li nar kuɗaŋu, nisi ma wanu, li firiya kaw, kay nan zam ɓam yoboyna vaŋu.

⁷⁵ Ma-Vatɗina, nan wi ala kitana vaŋu ka ɗigere, hay gasita vaŋu naŋ hotan yanawa gaa'a kaw.

⁷⁶ Hin ŋaata vaŋu vulan teŋ-irta, kuɗ yoboyna vaŋu tam sa ma sunda vaŋu.

⁷⁷ Hin slugota vaŋu ma kanu, kay nan fi mus iriya, kay vun-ma-gatna vaŋu mi firita vanu.

⁷⁸ Hin sa sli yisi kulona muɗ goy zulo'o, nisi sa ɗuwan birek-ceke bay lawta, may nanu, nan vara kay yoboyn-gatta vaŋu.

⁷⁹ Hinsi hotay tanu, nisi sa li nar kuɗaŋu, sa wi dita vaŋu kaw.

⁸⁰ Hin dikan muɗ ŋaa'a pasiyak hay ɗota-gatta vaŋu, kay nan ma muɗ goy zuloɗi.

⁸¹ Ciwta vanu cub su'da vaŋu hiɗi tiyta, nan cub yoboyna vaŋu.

⁸² Iranu cub yoboyna vaŋu hiɗi tiyta, nan di'e: Naŋ min teŋan iranu lancitige?

⁸³ Kay nan muɗi ki tiliyna ma giy hay no'osna nala, nir-na'ta kep yan jok ɗota-gatta vaŋɗi.

⁸⁴ Buura vi sa ma sunda vaŋu ka gaage? Naŋ ma ka kitat kay nisi sa curoɗanna ɗawn lancitige?

⁸⁵ Sa sli yisi kulona jugoɗ zulda vokanu, nisi sa poy ŋray hiɗi vun-ma-gatna vaŋɗi.

⁸⁶ Vun-ma-gatna vaŋ pet mi gasita. Nisi lasanu bay lawta, may gutaŋ kuɗan gutge.

⁸⁷ Hini neeɗa a nisi gan gaa'a kay vatan goyo, may nanu, yan may jok dita vaŋ noŋɗi.

⁸⁸ Hinan mus iriya kuɗ ŋaata vaŋu, nala nan min vi kuɗ di-goyta vi vunaŋu.

⁸⁹ Ma-Vatɗina, ta-ta hay vatɗita, yoboyna vaŋu col dono'o hay wuralawna.

⁹⁰ Gasita vaŋu ka tam jafsi voksi lo voksi lo, naŋ kot nagata, na' colawa dono'o kaw.

⁹¹ Slen kaf ka lakay iri vaydi kayni kuɗ vun-ma-gatna vaŋu, kay slen pet ka gaa kuɗ gaŋeraŋa vaŋu.

⁹² Lali vun-ma-gatna vaŋu may mi firita vanɗi, nan bays ɗawn goy hay lasta ɦawa.

⁹³ Ta-ta hay vatɗita, yan ma jok yoboyn-gatta vaŋɗi, kay hiɗi kayni naŋ hinan mus iriya.

⁹⁴ Nanu mi faŋŋa, suɗanu, kay nan gar yoboyn-gatta vaŋawa.

⁹⁵ Sa jiw-zlata cigeɗanu kay ɓulakan goyo, may nan hum kuɗ dita vaŋu.

⁹⁶ Sle ma ŋaan kaf nan wi dabta valamu, may vun-ma-gatna vaŋu yalam ma dabayn mayɗi.

⁹⁷ Nan min vun-ma-gatna vaŋu sem ŋolo, hay buurta kaf nan ka var kalamu.

⁹⁸ Vun-ma-gatna vaŋu muɗan yali suw yalla vi sa gawt kanna, kay nam ka hiɗi nanu dok-doko.

⁹⁹ Wida vanu suw nisi sa hatanna kaf, kay nan ka vara kay dita vaŋu.

¹⁰⁰ Yalla vanu ka suw sa maariyana, kay nan vi kuɗ yoboyn-gatta vaŋu.

¹⁰¹ Nan ŋom gayanu kay hina' jik hay hagat jootɗi, kay nan ŋom yoboyna vaŋu.

¹⁰² Nan cal goyo hiɗi vun-ma-gatna vaŋɗi, kay naŋ hatanawa.

¹⁰³ Yoboyna vaŋu ka jibet ŋolo hay vunanu, Awa, jibete suw yumda hay vunanu.

¹⁰⁴ Kuɗ yoboyn-gatta vaŋu nan muɗ yali, kay na'ta nan ka gaw tam hagata sinda pet.

¹⁰⁵ Yoboyna vaŋu mi fitil ma vok gayanu, mi haraŋ ma hay hagata vanu kaw.

¹⁰⁶ Nan yi va kanu, nan ŋom kayni kaw, a nan min vi kuɗ vun-ma-gatna vaŋu ma ɗigera.

¹⁰⁷ Nan lasi ŋolo ŋolo Ma-Vatɗina, hinan mus iriya kuɗ yoboyna vaŋu.

¹⁰⁸ Ma-Vatɗina, hin ɗifin ma minda vi vunanu li kiraŋ ŋaa'a, hatan vun-ma-gatna vaŋu kaw.

¹⁰⁹ Irita van goy vun-zlata hay buurta kaf, may vun-ma-gatna vaŋu yan jokomɗi.

¹¹⁰ Sa jiw-zlata gan jawt vokanu, may nan min viy goy gine'e hiɗi yoboyn-gatta vaŋɗi.

¹¹¹ Dita vaŋu dok-dok ti vocota vanu, kay na'a ti firita vi dikanu.

¹¹² Nan hot yan gaa'a, kay li kuɗ ɗota-gatta vaŋu, dok-dok ta-ta hay dabaŋ-gu'ta.

¹¹³ Nan ka gaw hiɗi sum sa diksi ma' ma'na, nan min vun-ma-gatna vaŋu may.

¹¹⁴ Naŋu mi liyn ma ŋayna vanu hiɗi kuroŋŋa vanu; kay nan vi kuɗ yoboyna vaŋu.

¹¹⁵ Tuɗgi goy gine hiɗi nanu, nigi sa li joota, kay nan ma li kuɗ vun-ma-gatna vi Lawna vanu.

¹¹⁶ Gutaŋ kuɗanu kuɗ deŋga vaŋu, kay nan ma mus iriya, hinan muɗ goy zulo'o hay cubta-sle'ta vanɗi.

¹¹⁷ Van ɓanu kay nan ma fi su'da, nala nan min ɗuw hiɗi firita kay ɗota-gatta vaŋu dok-doko.

¹¹⁸ Nisi kaf sa cal goy hiɗi ɗota-gatta vaŋu, nisi kiraŋ bisi, kay ɗutta visiya ba goy ɦawa.

¹¹⁹ Sa jiw-zlata kaf naŋ yawsi goy kay nagata ki suɗoy-kawayna nala; kuɗ kayni nan min dita vaŋu.

¹²⁰ Tuwan van bat-bat' kay narta ta kuɗaŋga, nan li nar kay kitana vaŋu kaw.

¹²¹ Nan li kuɗ gatta hiɗi ɗigerta vaŋu, naŋ ma hinan goy mi nisi sa curoɗannaɗi.

¹²² Ŋomaŋ slena vi sa ma sunda vaŋu hay ɓaŋ ŋomge, kay nan ma mus ŋaa'a, hin nisi sa sli yisi kulona lasanɗi.

¹²³ Iran ka cub su'da vaŋu hiɗi tiyta, kay yoboyna vaŋ ma ɗigera kaw.

¹²⁴ Li tam sa ma sunda vaŋu kuɗ ŋaata vaŋu, hatan ɗota-gatta vaŋu kaw.

¹²⁵ Nanu mi sa ma sunda vaŋu, vulan yamda-wida kay nan ma wi dita vaŋu.

¹²⁶ Liyn coowa kay Ma-Vatɗina ma li va'a, kay nisi raw vun-ma-gatna vaŋawa goyo.

¹²⁷ Kay na'ta nan min vun-ma-gatna vaŋu suw ora, suw ora ma yorayna.

¹²⁸ Kuɗ na'ta kayni dita vaŋu nan fa' kaf ɗigere, nan ka gaw hiɗi hagata vi sinda kafe.

¹²⁹ Dita vaŋu ka ŋaa ŋolo, kay na'ta ciwta vanu vi kuɗa'a.

¹³⁰ Yoboyna vaŋu ma mali goyna vul haraŋa, nam vul yamda-wida mi sa yal kiɗayna.

¹³¹ Nan mal vunan goyo, gi sukan goyo, kay dikan tiy kay vun-ma-gatna vaŋu.

¹³² Muɗaŋ iraŋay kiranu, lan slugota, ki naŋ ka li tam nisi sa min semda vaŋu nala.

¹³³ Vulan donota hay deŋga vaŋu, hin bay-ɗigerta li gaŋeraŋ kan noŋɗi.

¹³⁴ Butan goyo kay curo'da vi sumuna, kay nan ma ŋom dita vaŋu.

¹³⁵ Hin vokaŋu li haraŋi kay sa ma sunda vaŋu, hatan ɗota-gatta vaŋu.

¹³⁶ Zimiyna ka jaŋ goy kiranu ki niyna nala, kay sumuna may li kuɗ vun-ma-gatna vaŋɗi.

¹³⁷ Ma-Vatɗina, naŋ ma ɗigere, kitana vaŋu li hay liyam ɗigere kaw.

¹³⁸ Naŋ tun di-goyta vaŋu dono'o hay ɗigerta hay gasita ŋolo kaw.

¹³⁹ Ciwerta vanu tiyofanawa, kay sa gawt kanna yisi jok yoboyna vaŋawa.

¹⁴⁰ Dita vaŋu waki-wak gasi, sa ma sunda vaŋu minimu kaw.

¹⁴¹ Nanu ŋokiya, sumun panan kaw; may yan jok vun-ma-gatna vaŋɗi.

¹⁴² Ɗigerta vaŋu ti ɗigerta ta vatɗita, Gatta vaŋu ti gasita kaw.

¹⁴³ Hawta hiɗi lasta fanawa; may vun-ma-gatna vaŋu mi firita vanu.

¹⁴⁴ Dita vaŋu ka ɗigere ta-ta hay vatɗita, hatanu kay nan fi mus iriya.

¹⁴⁵ Ma-Vatɗina, nan yaŋu hiɗi dikan kaf, human humge, kay nan ma ŋom ɗota-gatta vaŋu.

¹⁴⁶ Nan yaŋawa, suɗan suɗge, kay nan vi kuɗ dita vaŋu.

¹⁴⁷ Nan ka tuwan kulo ŋarpita kay siwel taŋu; nan zam ɓam yoboyna vaŋu.

¹⁴⁸ Iran mali goyo jew liyn fo goyo, kay nan fi vara vara kay yoboyna vaŋu.

¹⁴⁹ Human delan humge kuɗ ŋaata vaŋu, Ma-Vatɗina, hinan mus iriya kuɗ kitana vaŋu.

¹⁵⁰ Nisi sa jaŋ kuɗ jiw-zlata, nisi hin gatta vaŋ goy gine'e.

¹⁵¹ Ma-Vatɗina, naŋ ka goboyo, vun-ma-gatna vaŋu pet mi gasita.

¹⁵² Kay ɓa-ɓa pa nan wi dita vaŋawa, a naŋ kota' dono'o kay vatɗita.

¹⁵³ Ɗuwaŋ lasta van butan goyo, kay yan jok vun-ma-gatna vaŋɗi.

¹⁵⁴ Gutaŋ kuɗanu, butan goy kaw; hinan mus iriya kuɗ yoboyna vaŋu.

¹⁵⁵ Su'da ka gine'e hiɗi sa jiw-zlata, kay nisi gar ɗota-gatta vaŋɗi.

¹⁵⁶ Ma-Vatɗina, slugota vaŋu ka ŋolo, hinan mus iriya kuɗ kitana vaŋu.

¹⁵⁷ Nisi sa lasanu, hiɗi nisi sa fok kulo kanu ka ŋolo, nan cal dita vaŋ goyɗi.

¹⁵⁸ Nan ɗuw sa bay-gasina, dikan yora, kay nisi vi kuɗ yoboyna vaŋɗi.

¹⁵⁹ Ma-Vatɗina, ɗuwaŋ natige, nan vi kuɗ yoboyn-gatta vaŋu, hinan mus iriya kuɗ ŋaata vaŋu.

¹⁶⁰ Tapta vi yoboyna vaŋu kaf kayni gasita, ta-ta hay vatɗita vun-ma-gatna vaŋu ma ɗigera kaf col dono'o.

¹⁶¹ Muliyana lasanu bay lawta, may dikan wiran kayn kay yoboyna vaŋ kep tuta.

¹⁶² Nan li firiya hay yoboyna vaŋu, ki sa ma ti sle ma ɓuraŋŋa ŋolo nala.

¹⁶³ Nan ka gawi tam sinda, na' kiran liwisi; may nan min vun-ma-gatna vaŋu.

¹⁶⁴ Nan yaŋ seŋ sem siɗiya hay buurta, kuɗ gatta vi ɗigerta vaŋu.

¹⁶⁵ Sle'ta ŋolo ka kisi nisi sa min vun-ma-gatna vaŋu, va ma joo'o as kay tamsi noŋɗi.

¹⁶⁶ Ma-Vatɗina nan cub su'da vaŋawa, nan laawa kuɗ vun-ma-gatna vaŋu.

¹⁶⁷ Dikanu vaawa kuɗ gatta vaŋu, nan min gatta vaŋ ŋolo ŋolo.

¹⁶⁸ Nan vaawa kuɗ yoboyn-gatta vaŋu, nan vaawa kuɗ di-goyta vaŋ kaw, kay hagata vanu kaf ka kiraŋu.

¹⁶⁹ Ma-Vatɗina, hin tiyta van kaf co vok iraŋu, vulan yamda-wida, kuɗ deŋga vaŋu.

¹⁷⁰ Hin siɗawta vi dikanu co vok iraŋu, butan goyo, kuɗ deŋga vaŋu.

¹⁷¹ Hin vunanu gi nul ma suburta, kay naŋ hatan ɗota-gatta vaŋu.

¹⁷² Hin sinanu gi nul hiɗi yoboyna vaŋu, kay vun-ma-gatna vaŋ kaf ɗigere.

¹⁷³ Hin ɓaŋu koti-kot kay gut kuɗanu, kay nan vilek yoboyn-gatta vaŋawa.

¹⁷⁴ Ma-Vatɗina, nan ka cub su'da vaŋu, gatta vaŋu vulan firita.

¹⁷⁵ Hin ciwta vanu mus iriya suburaŋ kaw, hin kitana vaŋu gut kuɗanu.

¹⁷⁶ Nan ka tulura ki ɦu-dimita viy-goyta nala, garaŋ sunda vaŋu, kay yan jok vun-ma-gatna vaŋɗi.