NULLA 118 - BIBALDA TA PELDETTA

¹ Suburgi Ma-Vatɗina kay nam ŋaa'a. Kay ŋaata valamu ka ta-ta hay vatɗita.

² Hin sa Israyella di ala: Kay ŋaata valamu ka ta-ta hay vatɗita.

³ Hin jafna vi Aaron di ala: Kay ŋaata valamu ka ta-ta hay vatɗita.

⁴ Hin nisi sa li nar kuɗ Ma-Vatɗina di ala: Kay ŋaata valamu ka ta-ta hay vatɗita.

⁵ Goy hay lasta van pa nan yi sem Ma-Vatɗina, Ma-Vatɗina humanu, musan hay liy ma butina.

⁶ Ma-Vatɗina ka hiɗi nanu, nan li narɗi, sana fi lan mige?

⁷ Ma-Vatɗina mi ma gutanna, nan li firiya hay li ma iran wi sa gawt kanna.

⁸ A san hin tuwaŋ hay ɓam Ma-Vatɗin kayni, ŋaa'a suw vida hay sana.

⁹ A ŋay tuwaŋ hay ɓam Ma-Vatɗin kayni ŋaa'a suw vida kuɗ sa ŋulona.

¹⁰ Jaf-sumun kaf ŋuyanu, hay semda vi Ma-Vatɗina nan calsi goy ne' ne'.

¹¹ Nisi ŋuyanawa, awa nisi ŋuyanawa, may hay semda vi Ma-Vatɗina nan ma calsi goy ne' ne'.

¹² Nisi ŋuyanawa ki yumna nala, nisi tew goy helmes' ki kuta ta ŋal zigiyna nala; hay semda vi Ma-Vatɗina, nan ma calsi goy ne' ne'.

¹³ Naŋ zutan dono'o kay nan ma nig gaa'a, may Ma-Vatɗina gutawa kuɗanu.

¹⁴ Ma-Vatɗina mi donota vanu, nan gi nulla kay suburum kaw, namu mi ma suɗan goyna.

¹⁵ Ciriyna vi kolda hiɗi su'da ka pat kulo'o hay guɗukŋa vi sa peldetna. Ɓam ta jufta vi Ma-Vatɗina ka ɗek donota va' goyo.

¹⁶ Ɓam ta jufta vi Ma-Vatɗina ka poŋi kulo'o, ɓam ta jufta vi Ma-Vatɗina ɗek donota va' goyo.

¹⁷ Nan ma mitɗi, nan ma mus iriya, nan ma di goy kay lopna vi Ma-Vatɗina kaw.

¹⁸ Ma-Vatɗina gatan vunanawa ŋolo, may nam vulan goy tam mittaɗi.

¹⁹ Malaŋ vun-galana vi ɗigerta goy kanu, nan min kal kalaf hayamu, nan min subur Ma-Vatɗina.

²⁰ Vun-galana vi Ma-Vatɗina zawni, sum sa ɗigera jik hayamu kay cuk kalafi.

²¹ Nan min gaŋ deɓe, kay naŋ humanawa, naŋ muɗi su'da vanu kaw.

²² Hiɗiyna ma sum sa in ziyna noyom goyna, nam muɗi goy hiɗiy ma ŋolla vi gef-ziyna.

²³ Slen kayni lum mi Ma-Vatɗina, nay muɗ ɦuyum' kalamu.

²⁴ Zawni ti fatta ta Ma-Vatɗin lum haya'ta, na' ma lin ti buurta ŋolda ta firita kay naya.

²⁵ Ma-Vatɗina, vulma su'da tage. Ma-Vatɗina vulma halalda tage.

²⁶ Bolda ka kay nam ma min ma'a hay semda vi Ma-Vatɗina. Goy hay ziyna vi Ma-Vatɗina pa numa gi bol kigiya.

²⁷ Ma-Vatɗina mi Lawna, nam vulay haraŋa. Jungi ɦu ma ɗifinna hiɗi zigewna, tuɗum ta-ta kat miyokŋa vi giwin-ma-ɗifinna.

²⁸ Naŋu mi Lawna vanu, nan min gaŋ deɓe, naŋu mi Lawna vanu, nan min slaŋ yaŋ kulo'o.

²⁹ Suburgi Ma-Vatɗina, kay nam ŋaa'a. Kay ŋaata valamu ka ta-ta hay vatɗita.