NULLA 108 - BIBALDA TA PELDETTA

¹ Nulla vi David.

² Lawna, dikan coli ɗeŋe, nan min gi nulla, nul ma suburta, nan ma ci dilla vanu, kayni ti gajijita vanu.

³ Zliygi kulo'o, dilla hiɗi dil-ŋolla vanu, nan min fo liyn goyo.

⁴ Ma-Vatɗina nan min suburaŋu jar sumuna, nan min gi nul hiɗi seŋu jar jaf-sumuna.

⁵ Kay ŋaata vaŋu ka kulo'o kay dukalawna, gasita vaŋu ka ta-ta tam ɗugulla kaw.

⁶ Lawna, ɗek ŋolda vaŋu kulo'o kay dukalawna, hin gajijita vaŋu li gaa kay nagata kafe.

⁷ Kay sa hayaŋ kisina ma fi su'da, suɗma'a hiɗi ɓaŋ ta jufta suɗge, hum siɗawta vuma humge.

⁸ Lawna di hay peldetta valam ala: Nan ma kola, nan ma ɓuraw Sikem, nan ma ŋaɓ lokŋa vi Sukkot.

⁹ Galaad vanu, Manase vanu, Efrayim mi gulmun ma duura ma kulo kanna, Yuda kayni zugulda-mulda vanu.

¹⁰ Mowab kayni tasata-muzta vanu, Edom nan min gi tuguruna vanu ka'a, nan siwel hiɗi firita kay nagata vi Filistina.

¹¹ Ma min naran hay hoyok-ziyn ma donona mi gige? Ma min naran hay Edom mi gige?

¹² Kayni mi naŋ Lawna ma noyma'awa goyon ɗisu? Mi naŋ Lawna ma min tuɗ dur hiɗi numaɗin ɗisu?

¹³ Gut kuɗma'a kay sa gawt kuma'na gutge. Kay gutda vi sana kayni mi va waa'a.

¹⁴ Hiɗi Lawna numa ma li sle ma ŋulona, nam ma kirap sa gawt kuma'na goyo.