NULLA 106 - BIBALDA TA PELDETTA

¹ Suburgi Ma-Vatɗina. Suburgi Ma-Vatɗina kay nam ŋaa'a. Kay slugota valamu ka ta-ta hay vatɗita.

² Sa ma min di goy kay slen ma ŋulona vi Ma-Vatɗina mi gige? Sa ma min di goy kay suburta valamu mi gige?

³ Sle'ta ka kay sa li kuɗ vun-ma-gatna, sa li ɗigerta hay liyn kaf.

⁴ Ma-Vatɗina, varaŋ kanu kuɗ slugota vaŋu tam sumuna vaŋu, ɗuwanu hiɗi su'da vaŋu ɗuwge.

⁵ Kay nan min ɗuw halalda vi sa vilekay-goyna vaŋu, kay nan fi subur tuwanu hiɗi vocota vaŋu.

⁶ Numa'a li sulukawa ki sumayma nala, numa'a li jootawa, numa'a li jiw-zlatawa.

⁷ Hay li ma sumayma ay hay Egipte, nisi min tun ŋalda visi kay ɗekka vaŋɗi, humsi min gisi kay slugota vaŋ ta ŋol dak-dakkaɗi, may nisi ŋel gatta kel niyna, kel niy-lum ma slawna.

⁸ May nam suɗsi goyo kuɗ semda valamu. Kay ɗek gajijita valam goyo.

⁹ Nam bay niy-lum ma slawna, nam so goyo, nala nam hinsi raw hay liyn ma zulla ki hay fulda nala.

¹⁰ Nam suɗsi goy hay ɓam sa gawt kisina, butsi goy hay ɓam sa gawtna kaw.

¹¹ Niyna ɗub sa gawt kisin gaa'a, sa kep kaw hin goy noŋɗi.

¹² Hay na'ta nisi vi kuɗ yoboyna valamu, nisi gi nul ma suburta talamu.

¹³ May yisi jok yoboyna valam gosoyo, nisi hinim a nam hob vun dita valamɗi.

¹⁴ May gizan slen kal kisiya hay fulda, nisi nem Lawna hay ful ma wiŋŋa.

¹⁵ Nam vulsi sle ma nisi joba, may gi maŋayta hay ciwta visiya.

¹⁶ Nisi li hunayta tam Musus hay guɗukŋa visiya, tam Aaron sa ma peldetna vi Ma-Vatɗina kaw.

¹⁷ Nagata mal vuna' goyo, na' lig Datan, na' duk vuna' gaa kay sumuna vi Abiram;

¹⁸ kuta doya jar tokŋa visiya, sin-kuta ŋal sa jiw-zlata goyo.

¹⁹ Nisi in goor-putna hay Horeb, nisi girif gaa vok va ma sli tuw-sana ma yorayna.

²⁰ Nisi muɗ gajijita visiya goy hiɗi putna ma ti hatna.

²¹ Yisi jok Lawna ma su'da visiya, ma li slen ma ŋulona hay Egipte,

²² lopn ma suw mu'da hay nagata vi Kam, hiɗi sle ma ɦuyum' kuɗumna kel niy-lum ŋolla ma slawna.

²³ Nala nam di ala nam min basi goyo; may Musus ma vileki-goyna valamu col vun baŋana vok iramu, kay muɗ ir ɦiyda valam goyo, kay telemu a nam ma vatsi goyɗi.

²⁴ Awa, nisi ɗuw nagata ŋaata birek-ceke, nisi vi kuɗ yoboyna valamɗi,

²⁵ May nisi ŋurnay hay guɗukŋa visiya, nisi hum kuɗ del Ma-Vatɗinɗi kaw.

²⁶ Kay na'ta nam poŋ ɓalam kulo'o, yi va kalamu kaw a nam hinsi yak gaa hay fulda.

²⁷ A nam min yak jafna visi gaa'a jar jaf-sum segena, kay mersi goyo kay nagata.

²⁸ Nisi jun tuwsi tam Baal-Pewor, nisi ti ɗifinna vi sa mitina kaw.

²⁹ Nisi ɓulak dik Ma-Vatɗina hiɗi lopna visiya, bakmarana kalay jarsiya.

³⁰ Hay na'ta Fineyas fok kulo'o, nam ɗiger lawta, bakmaran vat goyo may;

³¹ kayni ŋaɓay talamu kay ɗigere, tam jafn pa tam jafn lo ta-ta hay vatɗita.

³² Nisi ɓulak dik Ma-Vatɗina goboy hiɗi niy-lumna vi Meriba; Musus kay tuwam kaw fi lawta kuɗsi nisiya,

³³ kay nisi muɗum dikam bursaki, vunam di sle ma bay vaara.

³⁴ Sum sa Ma-Vatɗina disi kay nisi cisi goyona, nisi min cisi goyɗi.

³⁵ May nisi tap tuwsi hiɗi jaf-sum segena, hat lopna visiya kaw,

³⁶ nisi girif lawayn ma waana visiya kaw, nam muɗi mi jawta voksiya;

³⁷ guro sa jufayna hiɗi guro sa boyna visiya nisi lisi goy ɗifini tam fuliyana.

³⁸ Busuw ma bay-joota nisi ɦokom goyo, busuwna vi guro-jufayna hiɗi guro-boyna visiya, sa nisi lisi goy ɗifini tam lawayn waana vi Kanaan, nagata muɗi liwisi hiɗi ci-matna.

³⁹ Nala nisi muɗi liwisi hay lopna visiya, nisi muɗ tuwsi goy bulo'o hay sle ma nisi lumna.

⁴⁰ Hay na'ta Ma-Vatɗina muɗ ɦiya kat sumuna valamu, vocota valamu muɗi kiram liwisi.

⁴¹ Nam vulsi hay ɓam jaf-sumuna, sa gawt kisina li gaŋeraŋ kisiya.

⁴² Sa gaw kisina curoɗsiya, nisi hotsi yisi gaa'a.

⁴³ Nam butsi goyo sem ŋolo, may nisi ŋel gatta hay varta visiya, nisi sir gaa voksiya hay jiw-zlata.

⁴⁴ Nir na'ta kep nam cuk iram kirsiya hay li ma nisi ka hay vun-zlata, hay li ma nam hum tiyta visiya.

⁴⁵ Humam gum kisiya kuɗ bonota valamu, nisi muɗ kiram hawi kaw kuɗ slugota valam ta ŋolda.

⁴⁶ Nam hinsi muɗ hawi kir sum sa yawsi gorvona.

⁴⁷ Suɗma suɗge, Ma-Vatɗina Lawna vuma'a, naŋ ma tokma'ay goy jar jaf-sumuna pa, kay numa ma subur semda vaŋu ta ŋolda, kay numa ma subur tuwma kay gajijita vaŋu kaw.

⁴⁸ Suburta tam Ma-Vatɗina Lawna vi Israyel, hay vatɗita pa ta-ta hay vatɗita. Hin sumun kaf ma di ala: Amen! Suburgi Ma-Vatɗina!