NULLA 105 - BIBALDA TA PELDETTA

¹ Suburgi Ma-Vatɗina, yigi semda valamu, digi goy jar sumuna kay lopna valam ma ŋulona.

² Gigi nul talamu, gigi nul ma suburta talamu, kusgi labara kay lop ma ŋulona valamu.

³ Suburgi tuwgi kay semda valamu ta peldetta. Hin diksi li firiya nisi sa gar Ma-Vatɗina.

⁴ Gargi Ma-Vatɗina hiɗi donota valamu, gargi a ɗuw iramu dok-doko.

⁵ Humgi jak' kay lopn ma ŋulo ŋulona valamu ma nam lumna, hiɗi ɗekka valamu hiɗi kitana vi vunamu kaw.

⁶ Nigi jafna vi Abraham ma sunda valamu, nigi gurona vi Yakub sa vileki-goyna valamu.

⁷ Namu mi Ma-Vatɗina Lawna vaya, kitana valamu ka kay nagat kaf.

⁸ Humam jak' kay bonota valamu ta-ta hay vatɗita, dita-ŋaɓayta valamu kay jafsi voksi birimi.

⁹ Kay bonota ta nam juna' hiɗi Abraham, hiɗi va ma nam yi kalamu tam Isaak kaw.

¹⁰ Nam hina' tam Yakub ki gatta nala, tam Israyel ki bonota ta vatɗita nala.

¹¹ Hay li ma nam di'e: Nan min vulaŋ nagata Kanaan ir voco maŋu,

¹² hay na'ta nisi ay kiɗaya, kiɗay goy noŋo, nisi ay pulu hay nagata kaw.

¹³ Nisi jok goy tam jaf-sumuna, tam jaf-sum sara'a lo, tam mulda tara'a ta-ta tam mulda heta lo.

¹⁴ May nam hin hagata tam sa'a kay curoɗsi noŋɗi, nam wat muliyana kuɗsi nisiya.

¹⁵ (Di'e:) Sa fanna sa mul ɦoki kisina nigi ma tun ɓigi tisiɗi, nigi ma li joo'o tam sa jobta vanɗi.

¹⁶ Nam gi mayta ay gaa kay nagata, nam yaw tin goy vunsi kafe.

¹⁷ Nam gi san kep voksiya, Yosef gusi goyo ki gorvon nala.

¹⁸ Nisi cukum selem hay pakalamna, nisi junumu hiɗi kawayna.

¹⁹ Ta-ta hay li ma yoboyna valamu hobawa kulo'o, hay li ma yoboyna vi Ma-Vatɗina ɗek goy kay bay-joota valamu.

²⁰ Mulla gi sunu kay but pakalam ma selemna goyo, ma ti mul kay sumuna butum goyo.

²¹ Nam tunum ma ŋolla kay ziyna valamu, tunum guverner kay slena valam kafe,

²² Kay ci jaɓn sem sa yerimana (vi mulla) kuɗ minda valamu, kay hat yalla mi sa maariyana (vi mulla) kaw.

²³ Ki kayn nala sum sa Israyella co hay Egipte, jafna vi Yakub musi pulu hay nagata vi Kam.

²⁴ Nam hin sumuna valamu biya ŋolo, muɗsi dono'o suw sa gawt kisina.

²⁵ Nam muɗsi diksi a nisi ka gawt tam sumuna valamu, kay li ɗutta tam sumuna valamu kaw.

²⁶ Nam gi Musus sa ma sunda valamu, hiɗi Aaron ma nam vilekem goyna.

²⁷ Nisi li ɗekka valamu jarsiya, nisi li sle ma suw mu'da hay nagata vi Kam.

²⁸ Nam gi jufunda, liyn li jufunu, nisi fok kulo'o kat yoboyna valamɗi.

²⁹ Nam muɗ niyna visi goy busuwu, ci kulufna visi goyo kaw.

³⁰ Nagata visiya hobay hiɗi luura, ta-ta hay ziyna vi muliyana visiya kaw.

³¹ Nam lawa, raw-jimena hiɗi jaamna kaw patay ŋolo hay liyna vi nagata pet.

³² Nam hin mogoyna si gaa'a ki niyn si nala, hiɗi sin-kuta ŋal slena hay nagata visiya kaw.

³³ Nam ɓulak gulda-guldana hiɗi gu-gumna visiya, gu ma hay nagata visiya nam hawam goyo.

³⁴ Nam lawa, baar-bobona co goyo, bar-jerena ŋolo ŋolo.

³⁵ Nam mut hadafna ma hay sinena visin goy kafe, sle ma vuɗ hay sinena visiya nam tum goy kafe.

³⁶ Guro-sa vuɗi jewna hay nagata visiya, nam cisi goy kafe, vun-jaf ma jewna vi donota visiya.

³⁷ Nam kal sumuna valam sa Israyel ay goyo hiɗi doorota hiɗi ora kaw, sa mara jar jafna valam kep kaw may ge'ɗi.

³⁸ Sum sa Egipten diksi li firiya, hay li ma nisi kalay goyo, kay narta nig gaa kisiya.

³⁹ Nam beɗ ɗugulla goyo kay li ŋus kisiya. Kuta kaw kay li haraŋ kisiya hay henjeta.

⁴⁰ Nisi jobomu, nam vulsi lay-cekena, nam hobsi hiɗi tin ma may wuralawn pana,

⁴¹ nam mal hiɗiyn goyo, niyn jaŋ goyo; nam jaŋ vik-vik ki niy-lumna nala hay liy ma goy soyna.

⁴² Kay humam gum kay yoboyna valamu ma peldetna, hiɗi Abraham ma sunda valamu.

⁴³ Nam kal sumuna valamay goy hiɗi firita ŋolda, nam kal sa vilekayna valamay goy hay ciriyna vi firita.

⁴⁴ Nam vulsi nagata vi jaf-sumuna, nisi yaw vuɗna vi lopna vi sum segena,

⁴⁵ kay nisi ma li kuɗ ɗota-gatta valamu, hiɗi vun-ma-gatna valamu. Suburgi Ma-Vatɗina.