NULLA 103 - BIBALDA TA PELDETTA

1 Nulla vi David.

¹ Nulla vi David. Ciwta vanu, suburag Ma-Vatɗina. Hin sle ma hayanna pet subur semda valam ta peldetta.

² Ciwta vanu suburag Ma-Vatɗina, lop ma ŋaana valamu kaf yag jokomɗi.

³ Kay namu mi ma vul gida kay jiw-zlata van kafe, ma muɗan goy ŋaa kay moyna van kafe kaw.

⁴ Namu mi ma but irita van goy vun zulla, nam cuk ŋaata hiɗi slugota kanu.

⁵ Namu mi ma hob maarta vanu hiɗi sle ma ŋaana, ta-ta nan hot joriyo lo ki ɓukana nala.

⁶ Ma-Vatɗina li ɗigerta, ka kitat ɗigere kaw kay nisi sa ka hay lasta.

⁷ Nam ɗek hagata valamu kir Musus, nam ɗek lopna valamu kir gurona vi Israyel kaw.

⁸ Ma-Vatɗina wi haw sumuna, tiy kay sumuna kaw, nam muɗ ɦiy gosoyɗi, ŋaata valamu ka ŋolo kaw.

⁹ Nam may mus hay ci-wayt dok-dokɗi, nam ŋom ɦiyda valamu kay dok-dokɗi.

¹⁰ Nam li taya kuɗ sulukŋa vayaɗi, nam wurakay kuɗ jiw-zlata vayaɗi kaw.

¹¹ Kay ki dukalawna ka kulo gine'e kay nagata, nala ŋaata valamu ka ŋolo tam nisi sa li nar kuɗumu.

¹² Ki kuɗuwu ka gine'e hiɗi vulatiya, nala nam cuk raw-goyta vaya goy gine'e hiɗi naya.

¹³ Ki bumna ka tiy kay gurona valamu, nala kaw Ma-Vatɗina ka tiy kay nisi sa li nar kuɗumu.

¹⁴ Kay nam wi va ma nay koti hiɗi namna, humam gum ala nay koti hiɗi butuwna.

¹⁵ Buura vi sana ka ki usna nala, nam ɓo ki hadaf ma sinena nala.

¹⁶ Hay li ma simeɗna biwawa kalamu, nam may loɗi, sa as wum baŋalam loɗi may.

¹⁷ May ŋaata vi Ma-Vatɗina ka ta-ta hay vatɗita, kay nisi sa li nar kuɗumu, ɗigerta valamu kaw ka tam gurona vi gurona visiya,

¹⁸ tam nisi sa ŋom bonota valamu, sa humsi gisi kay vun-ma-gatna valamu kay li kuɗumu.

¹⁹ Ma-Vatɗina tun zlamda-mulda valamu hay wuralawna, mulda valamu ka tuni kay slen kafe.

²⁰ Suburgi Ma-Vatɗina, nigi sa sunda-wuralawna valamu, nigi sa gaŋeraŋ ŋolla sa hob vun dita valamu, hay li ma nigi hum kuɗ del yoboyna valamu.

²¹ Suburgi Ma-Vatɗina, nigi vok-ma-duura valamu, nigi sa ka hay sunda valamu, sa li kuɗ minda valamu.

²² Suburgi Ma-Vatɗina, nigi lopna valamu kaf, hay liyn ma mulda valamu pet, ciwta vanu, suburag Ma-Vatɗina.