NULLA 102 - BIBALDA TA PELDETTA

¹ Siɗawta vi sa ma maŋayna, hay li ma sutiyam toya, nam ka tiy tuwam vok Ma-Vatɗina.

² Ma-Vatɗina, hum siɗawta van humge, hin siwelda vanu co taŋu.

³ Ŋay iraŋ kanɗi hay li ma nan ka vun zlata, muɗ humaŋ tanu hay li ma nan ka siwela, naŋ ma human gosoyo.

⁴ Kay buura vanu ka kala ki no'osna nala, zokan ka ŋala ki gu-kuɓulusna nala.

⁵ Dikanu jikiya ki usna ka so goyo nala, yan jok noŋo kay ti funa vanu.

⁶ Nan ka tiy tuwan ŋolo, ta-ta sliwanu ɓekay kulo tam zokanu.

⁷ Nan muɗi sli lay-gudufna ma hay fulda nala, nan muɗi ki ɦuna jar liy ma toy gaana nala.

⁸ Senda may vanɗi, nan muɗi ki layta ta musi kulo kay yam-ziyda va' kepta nala.

⁹ Hay buurta kaf sa gawt kanna ka ŋulanu, nisi yi slen kisi hiɗi nanu hay ɦiyda visiya.

¹⁰ Nan ti butuw-kuna ki funa nala, cina vanu rigasay hiɗi zimiyanu kaw.

¹¹ Kuɗ ɦiyda vaŋu hiɗi roŋŋa vi dikaŋu, kay naŋ slanawa kulo'o, ganawa goy gine'e.

¹² Kay buura vanu ka ki ŋus-guna ma min sah goyo nala, nan ka so goyo ki usna nala.

¹³ May naŋu, Ma-Vatɗina, naŋ mus mulu ta-ta hay vatɗita, humsi ma gisi kaŋu tam jafna voksi lo voksi lo.

¹⁴ Naŋ ma fok kulo'o kay li slugota tam Siyon, kay liyn coowa kay ɗuw hawta va'a, Awa, liyn coowa.

¹⁵ Kay numa sa sunda vaŋu min hiɗiyna va'a, Diksi min butuw ma haya'na.

¹⁶ Nala jaf-sumuna ma li nari kay semda vi Ma-Vatɗina, muliyana vi nagata kaf ma li nar kay gajijita vaŋu.

¹⁷ Kay Ma-Vatɗina in Siyonawa kulo'o, nam ma ɗek tuwam goyo hay gajijita valamu.

¹⁸ Nam jak humam tam siɗawta vi sa hawna, nam ɗuw siɗawta visi birek-cekɗi.

¹⁹ Kayni ma liys ɗoya kay jaf ma vokŋa, kay sum sa Lawn ma lisina nisi ma subur Ma-Vatɗina.

²⁰ Kay hay liyna valamu ma peldetna ma kulona pa, nam ɗuw gaa'a, kulo hay dukalawna pa Ma-Vatɗina ɗuw gaa kay nagata,

²¹ kay hum yorta vi sa daŋgayna, kay but goyo nisi sa kitata vi mitta kisina.

²² Kay nisi ma di goy kay semda vi Ma-Vatɗina hay Siyon, suburta valamu hay Yerusalem kaw.

²³ Hay li ma jaf-sumuna hiɗi mulda mulda kaf ma toka kay sun Ma-Vatɗina.

²⁴ Nam ton sutiyanawa goy hay hagata, hot buura vanawa gaa kiɗaya.

²⁵ Nan di'e: Lawna vanu, slan goy way buura vanɗi, naŋu ma busata vaŋ mus ŋolo hay vatɗita vatɗita!

²⁶ Naŋu mi ma tun nagat gaa'a hay jew ɓa-ɓa, dukalawna mi lopna vi ɓaŋu.

²⁷ Nisiya, nisi ma vat goyo, may naŋu, naŋ ma mus ta-ta; nisi ma jet goy kafe ki sligara nala; naŋ ma muɗsi ki sligara nala, nisi kaf ma muɗa.

²⁸ May naŋu, naŋ mi naŋ dok-doko, busata vaŋu ma vat noŋɗi.

²⁹ Gurona vi sa sunda vaŋu ma fi liyn ma lakka, jafna visiya ma muɗ dono'o vok iraŋu.