NULLA 10 - BIBALDA TA PELDETTA

¹ Ma-Vatɗina, naŋ col goy gine'e kay mige? Naŋ ŋay tuwaŋu hay li ma lasta ka'a kay mige?

² Hay jigal-tuwta visiya, sa jiw-zlata las sa hawna ŋolo, hinsi nig gaa'a hay sle ma nisi varam hiɗi yalla visiya.

³ Kay sa ma jiw-zlata jigal tuwamu kay darta vi dikamu, sa ma gar slena vi sa'a hin Ma-Vatɗina goyo, ŋulumu kaw.

⁴ Sa ma jiw-zlata di tuwam hay jigal-tuwta valam ala: Lawn as ka kitatɗi, Lawna may noŋɗi, kayn ti varta valamu tuta.

⁵ Lopna valamu halalda kuɗum dok-doko; kitata vaŋu suwi kulo kalamu, nam fo simeɗna gaa kay sa gaw kalamna kafe.

⁶ Nam di hay dikam ala: Nan ma ge'ɗi, ta-ta tam jafna vok ɗaw kaw joot as fanɗi.

⁷ Vunam hobay hiɗi ŋulda, hiɗi ɗutta hiɗi kulda, gaa kuɗ sinamu, joota hiɗi jiw-zlata ka'a.

⁸ Nam bar goy ŋor hoyok-ziyna, hay liy ma ŋayayna, sum sa li va ma jooɗina nam cisi goyo, iram cuki ca kay sa ma hawna.

⁹ Nam bar goyo hay liyn ma ŋayayna, ki zlona bar kuɗ jurut nala, nam ka cigeɗ kay vi sa hawna, nam yawam iram guk', nilamam hay jawta valamu.

¹⁰ Nam her gaa'a, nam guɗof gaa'a, sa hawna cuk gaa vun tirekemu.

¹¹ Nam di hay dikam ala Lawn yalam jokawa, Lawn ŋay iramawa, nam may wi kayni noŋɗi.

¹² Ma-Vatɗina Lawna, fokaŋ kulo'o, poŋaŋ ɓaŋ kulo'o, yaŋ ma jok sum sa ziy-zlatɗi.

¹³ Sa ma jiw-zlata ɗuw Lawna birek-ceke kay mige? Nam di hay dikam kaw ala naŋ may wurak jootɗi kay mige?

¹⁴ Naŋ hayɗin ka ɗuw kayni, kay naŋ wi zumalda hiɗi lasta, naŋ as kay sli lawta visi hay ɓaŋu; sa ma hawna hin lawta valam hay ɓaŋu, naŋu mi ma gut kuɗ sa kuyuna.

¹⁵ Kusaŋ ɓam sa ma jiw-zlat goyo, kaŋ kitat kay jiw-zlata valamu, hinim vatis goy vok iraŋu.

¹⁶ Ma-Vatɗina mi mulla kay dok-doko, ta-ta hay vatɗita; jaf-sum sa waana ma cimis goyo hay nagata valamu.

¹⁷ Ma-Vatɗina, naŋ ka hum siɗawta vi nisi sa ka ci lasta, naŋ vulsi donota, naŋ jak humaŋu.

¹⁸ kay ka kitata vi sa kuyuna hiɗi sa ka vun curo'da. Kay sana ma koti hiɗi nagana ma li waskayta dok-dok loɗi.