ŊAƁTA 8 - BIBALDA TA PELDETTA

Kotna vi fitilla

¹ Ma-Vatɗina di tam Musus.

² Naŋ ma di tam Aaron ala: Hay li ma lak fitilla kulo kay va ma tun fitilla ɗawni, fitil ma siɗiyan ma fo liyn goy vokomis ɗiger.

³ Aaron li ki kayn nala; nam lak fitilla goy vok va ma tun fitilla, ki Ma-Vatɗina vul hagata tam Musus nala.

⁴ Va ma tun fitilla nam koti hiɗi or ma rigasayna ta-ta gaa hay selem goŋ', ta-ta kulo hay yalam goŋ', nam koti hiɗi or ma rigasayna, Musus kot va ma tun fitilla kayni, nam ŋram hiɗi ma Lawn ɗekem kiramna.

Sa Levitna giy ɗifini

⁵ Ma-Vatɗina di tam Musus ala:

⁶ Naŋ ma yaw sa Levitna goy jar gurona vi Israyel, naŋ ma lisi goy peldete.

⁷ Naŋ ma yam niyn ma poor kisiya; nisi ma wel ɗuŋus ma tisin goy kafe, nisi ma muz sligara visi goyo, li tuwsi peldete.

⁸ Bugolda nisi ma vi put ma joriyo'o, hiɗi ɗifin ma ɦawana vi futuw ma hiliɓi hiɗi mula; lo naŋ ma vi put ma joriyo'o kay li ɗifin ma poora.

⁹ Naŋ ma mar sa Levitna kulo goboy tam guɗuk ma fi-tuwna, naŋ ma tok gurona vi Israyel noŋ kafe.

¹⁰ Naŋ ma mar sa Levitna vok Ma-Vatɗina; gurona vi Israyel ma bar ɓisi kay sa Levitna.

¹¹ Aaron ma muɗ ir sa Levitna hay gal hena gal hena kaf vok Ma-Vatɗina, ki ɗifinna ma may vi gurona vi Israyel nala; nala nisi ma vulis goyo kay li lopna vi Ma-Vatɗina.

¹² Sum sa Levitna ma tun ɓisi kay yam luwayna; naŋ ma vul ma kepn goyo kay ɗifin ma poora, hena kay ɗifin ma ŋal-goyna, kay li poora kay sa Levitna.

¹³ Sa Levitna naŋ ma laksi kulo vok Aaron hiɗi gurona valamu, naŋ ma muɗsi galsiya ki san ka muɗ gal ɗifinna kulo vok Ma-Vatɗina nala.

¹⁴ Naŋ ma poŋ ir sa Levitna goy jar gurona vi Israyel; sa Levitna nisi ma muɗ ir vanu.

¹⁵ Bugol kayni, sum sa Levitna ma co'o kay li lop hay guɗuk ma fi-tuwna, ki kayn nala naŋ ma lisi goy peldete, naŋ ma muɗsi galsi kaf ki naŋ ka muɗ gal sle ma ɗifinna nala.

¹⁶ Kay jar gurona vi Israyel kayni, nisi vuli goy man nanu, nan yawsi goy ir manu jar gurona vi Israyel: Nan muɗsi goy ir manu hay baŋal guro sa vuɗi jewna, kuɗ sa vuɗi jewn kaf jar gurona vi Israyel.

¹⁷ Kay guro sa vuɗi jewna jar gurona vi Israyel kaf nisi ir manu, sumuna hiɗi farayn kafe; kay buur ma nan ci guro sa vuɗi jewna vi Egipte kayni, nan muɗ sa Israyella ir man may.

¹⁸ Sum sa Levitna nan yawsi hay baŋal guro sa vuɗi jewna vi Israyel kafe.

¹⁹ Sum sa Levitna nan vulsi mi Aaron hiɗi gurona valam noŋ kafe jar gurona vi Israyel, kay nisi ma li lopna vi gurona vi Israyel hay guɗuk ma fi-tuwna, kay nisi ma li poora kay gurona vi Israyel, kay hay li ma gurona vi Israyel co tam liyn ma peldetn ɗawni, bakmaran ma fisiɗi.

²⁰ Slen ma Ma-Vatɗin dum kay sa Levitna, Musus, Aaron hiɗi vokŋa vi Israyel kaf lum tisiya; gurona vi Israyel li tisiya ki kayn nala.

²¹ Sum sa Levitna por tuwsi goyo, nisi muz sligara visi goyo, Aaron muɗsi galsi kaf ki ɗifin ma vok Ma-Vatɗina nala, nam li poor kisiya, kay lisi goy peldete.

²² Bugol kayni, sum sa Levitna co kay li lop hay guɗuk ma fi-tuwna, vok Aaron hiɗi gurona valamu, kuɗ va ma Ma-Vatɗin dum tam Musus kay sa Levitna; nam li katsi ki kayn nala.

²³ Ma-Vatɗina di tam Musus ala:

²⁴ Kayni mi va ma law kay Levitna. Tun caw tam busat dok-ma' yam vasl ta-ta kulo kalam ɗaw kayni, sa ma Levitna as kal hay lopna vi guɗuk ma fi-tuwna kay li lopo,

²⁵ hay li ma busata valam coowa dok-vasli ni, nam ma li lop loɗi.

²⁶ Nam as gut ɓosiyomna hay lopna vi guɗuk ma fi-tuwna, kay ŋom sle ma hini hay ɓisina; may nam as li lopɗi. Naŋ ma li tam sum sa Levitn ɗawn ki kayn nala hay lop ma nisi lumna.