ŊAƁTA 6 - BIBALDA TA PELDETTA

Lawta vi kemeleŋŋa

¹ Ma-Vatɗina di tam Musus:

² Naŋ ma di tam gurona vi Israyel ala: La sa jufu lebo ca'a kaw min ɓuraw goy hiɗi sum segena, la nam yi va kalamu kay mus goy kemeleŋe, kay gi tuwam ɗifin mi Ma-Vatɗina,

³ sa namna ma tel tuwamu kay ci vinna hiɗi dolayna ma ɦoyaŋŋa, dolay ma galakŋa ma keslem kuɗ vuɗna vi gulda-guldana nam ma cumɗi, vuɗna vi gulda-guldana, la mi ma ŋulomo, la mi ma soya kaw nam ma mutumɗi.

⁴ Jar buur ma nam ka goy kemeleŋ kaf kayni, sle ma may tam vuɗna vi gulda-guldan kaf nam ma tamamɗi, tun cawis tam wal gulda-guldan pa ta-ta tam ɓulokom goŋ'.

⁵ Jar buur ma nam ka goy kemeleŋ kaf kayni, kewta welda ma jik kuɗ ɗuŋus yalam noŋɗi, kay tuwam giy ɗifin mi Ma-Vatɗina, nam peldete, nala nam ma hin ɗuŋusam wula; ta-ta nam hob vun buur namna tuwa.

⁶ Jar buur ma nam vul tuwam mi Ma-Vatɗin kaf lakŋi, nam ma nar tuwam kulo goboy tam sa ma miti noŋɗi;

⁷ la mit mi bulumu lebo sulumu lebo ɓasulumu kaw, nam as muɗ tuwam pur noŋɗi, kay ɗuŋus ma kalam tani ɗek ala tuwam giy ɗifin mi Ma-Vatɗina.

⁸ Jar buura valam ma nam goy kemeleŋ kaf lakŋi, tuwam giy ɗifin mi Ma-Vatɗina.

⁹ La sa ma ziyam galamna mitawa, ɗuŋus ma ka siy kalamna ɓulakawa kuɗ kayni, hay buur ta siɗiyat ɗawni nam ma wel yalam goyo, muz tuwam goyo kaw.

¹⁰ Hay buurta glafandit ɗawni, nam ma yaw guk-gulin ma' lebo guk-gabayn ma', maram hay vun guɗuk ma fi-tuwna.

¹¹ Mul-ma-ɗifinna ma ŋat guk ma kepna kay li ɗifin ma poora hiɗi namu, guk hena nam ma li ɗifin ma ŋal-goyna hiɗi namu may. Nam ma li poora kay san kayni, kay mit ma co kalamna. Hay buur namna kayni sa namna as li ɗuŋusam goy peldet lo.

¹² Nam as fok hiɗi buur mara lo kay gi tuwam ɗifin mi Ma-Vatɗina, nam ma li ɗifin hiɗi goor ɦu-dimi ma busata valam kepna, kay sulukŋa valamu; buur ma jewna as ŋaɓam loɗi, kay kemeleŋga valam ta jewta muɗi liwisi.

¹³ Kayni ti gatta kay sa ma li tuwam kemeleŋŋa: Hay buur ma lopna vi kemeleŋga valam vatawa, nigi ma maram hay vun guɗuk ma fi-tuwna.

¹⁴ Nam ma mar vulda valam tam Ma-Vatɗina: Nam ma mar goor ɦu-dimi ma busata valam kep ma moy may talamɗina, kay li ɗifin ma ŋal goyn hiɗi namu, ɦu-dimita ta busata va' kep, ta moy may ta'ɗita kay li ɗifin ma poora, ɦu-gamala ma moy talamɗin kep kaw, kay li ɗifinna vi lop ma slugona;

¹⁵ nam mar tikisit kep hiɗi fun ma bay-kufna, hambulla ma koti hiɗi futuw ma digeɗna, ma hiliɓi hiɗi mula, hiɗi hambul ma bay-kufna ma mul yamay kalamna, hiɗi sle ma vulda hiɗi sle ma yamam goyna.

¹⁶ Mul-ma-ɗifinna ma nar kayni vok ir Ma-Vatɗina, sle ma li poor hiɗi namna hiɗi ma ŋalam goyna nam ma li ɗifin hiɗi namu.

¹⁷ Nam ma ŋat ɦu-gamalana kay li ɗifinna vi lop ma slugona tam Ma-Vatɗina, tapay hiɗi tikisita, ta fun-bay-kufna, hiɗi sle ma vulda, hiɗi sle ma yamam goyna kaf ka haya'ta.

¹⁸ Sa ma li tuwam kemeleŋŋa ma wel ɗuŋusna ma kalamna goyo, hay vun guɗuk ma fi-tuwna, ɗuŋus namna nam ma cukum hay kuta, ta ka ŋal kuɗ sle ma ɗifinna vi lop ma slugona.

¹⁹ Hay li ma sa ma kemeleŋŋa wel yalamawa goyo, mul-ma-ɗifinna ma sli bigiy ɦu-gamala ma zalay kepe, sli hambul ma bay-kufn ma hay tikisit kepe, sli fun-bay-kufn kepe, nam cukum hay ɓam sa ma li tuwam kemeleŋŋa.

²⁰ Mul-ma-ɗifinna ma geɗem galam kaf kulo'o vok Ma-Vatɗina: Nam kayni mi va ma peldete, nam vi mul-ma-ɗifinna, war-digŋa ma geɗem kulona hiɗi bigiyna ma vum kulona. Bugol kayni sa ma li tuwam kemeleŋŋa ma ci vinna yo.

²¹ Kayni ti gatta na'ta ta vuli kay sa ma yi va kalamu kay nam min mus kemeleŋe, hiɗi ɗifin ma nam lumu tam Ma-Vatɗina kay kemeleŋga valamu. La nam vul suw kayni kaw law mayɗi. May sle ma wurakam kay hob vun va ma yiy kamna nam as wurakamu, kuɗ gatta vi kemeleŋga.

Dita ta gi bol hiɗi na'ta

²² Ma-Vatɗina di tam Musus ala:

²³ Naŋ ma di tam Aaron hiɗi gurona valam ala: Nigi ma gi bol kay gurona vi Israyel, nigi ma disi ala:

²⁴ Ma-Vatɗina gi bol kigiya, ŋomgi kaw.

²⁵ Ma-Vatɗina hin haraŋa vi vokomu fo gaa kigiya, nam vulgi slugota valam tage!

²⁶ Ma-Vatɗina muɗ iram kirgi muɗge vulgi toyta valam tage!

²⁷ Ki kayn nala nisi ma jaɓan semda van tam gurona vi Israyel, nala nisi ma fi bolda vanu.