ŊAƁTA 5 - BIBALDA TA PELDETTA

Gatta kay kot-tuwna, kulda hiɗi hunayta

¹ Ma-Vatɗina di tam Musus ala:

² Naŋ ma vul hagata tam gurona vi Israyel ala: Sum sa moy-kuturun tisin kaf, hiɗi sa slen jaŋ goy kuɗsina, lebo sa muɗ tuwsi liwisi hiɗi sa mitina kaf nisi ma digiɗsi goy hay guruna.

³ La sa jufu lebo ca'a kaw nigi ma gisi irsi goyo, a nisi ma muɗ guruna vigi liwisɗi, kay liyn ma musta van ka haya.

⁴ Gurona vi Israyel li ki kayn nala kaw, nisi digiɗsi goy hay guruna, ki Ma-Vatɗina vul hagat mi Musus nala.

⁵ Ma-Vatɗina di tam Musus ala:

⁶ Naŋ ma di sa Israyella ala: La sa jufu lebo ca'a kaw, hay li ma nam li sulukawa kat sugolomna, la nam li law ma may hay liyamɗinawa kat Ma-Vatɗina, la nam muɗ tuwamawa joo,

⁷ nam ma ham sulukŋa valam goyo, va ma nam slum hiɗi hagata gunit kayni, nam ma hotom goyo, nam ma gi gal ma vasln vunamu, hot vulum mi mulamna ma nam lum joona.

⁸ Va namna hay li ma nam hotomawa goyo, la mulamna mayɗi, va namna vulum mi Ma-Vatɗina, kayn di ala mi muliyan-sa-ɗifinna. Sa namna as vul ɦu-gamala kep lo kay li ɗifin ma poora, nisi ma li poor kalamu may,

⁹ kay slen kaf ma gurona vi Israyel vulum goyo, la maramawa tam mul-ma-ɗifinna, galla valam ka haya.

¹⁰ Slen ma vuli goyna nam valamu, slen ma vuli goy ɓalamna nam valamu kaw.

¹¹ Ma-Vatɗina di tam Musus ala:

¹² Naŋ ma di tam gurona vi Israyel ala, la cat hin jufa' bugola'a, muɗ tuwa' viyuwu;

¹³ la na' vi cile hiɗi sa mara'a, bur hiɗi nalam goy ŋayaya; may la jufa' bay wi van kayni goy haraŋi, la sa mara kaw bay wi van kayni goy haraŋi, la sa bay va' hiɗi sa namna tuwa,

¹⁴ la jufa' hunayt kalawa hay dikamu, la nam ka var ala na' buri tam sa namna ni; la na' buriya buriɗi kaw;

¹⁵ nam ma nara' tam mul-ma-ɗifinna, nam ma yaw futuwna vi orgena ir gal-ma-doogona vi gotota; nam ma yam mul kalamɗi, yam urdi ma hisn kalamɗi kaw, kay kayni mi ɗifinna vi hunayta, ɗifinna vi gi-humda, ma gi-humda kay jiw-zlata.

¹⁶ Mul-ma-ɗifinna ma yi cata, cola' kulo'o vok Ma-Vatɗina.

¹⁷ Mul-ma-ɗifinna ma ɦok niy ma peldetna hay dowayta; nam ma yaw butuwna vi tabernaklena, nam ma cukum hay niyna.

¹⁸ Mul-ma-ɗifinna ma col cat kulo'o vok Ma-Vatɗina; nam ma fok sligar ma ka'n goyo, ɗifinna vi gi-humda hiɗi ma kay hunayta nam ma tunum hay way ɓa'a; niy ma galakŋa ma mar be'da nam ma vum hay ɓalam may.

¹⁹ Mul-ma-ɗifinna ma halaf cata, nam ma da' ala: La sa may bur hiɗi nak noŋɗi, la, gaa kuɗ gaŋeraŋa vi jufagu, nak may muɗ tuwag liwisɗi ni, niy ma galak namna ma mar be'da kayni ma lak va ma jooɗi.

²⁰ May, gaa kuɗ gaŋeraŋa vi jufagu, la nak muɗ tuwag liwisi, la sa mara ma may jufagɗi bur hiɗi naku,

²¹ mul-ma-ɗifinna ma yi va kalamu, nam ma da' ala: Hin Ma-Vatɗina beɗag goyo, muɗag bisi jar sumuna vagu, hinim muɗak getiya, gerag hayagu may,

²² niy namna ma mar be'da kayni, hay li ma nam kal hayag ɗawni, nam ma gerag hayagu, muɗag getiya may. Cat ma hot dit ala Amen! Amen!

²³ Mul-ma-ɗifinna ma ɗo vunam ma beɗna gaa hay ɗerwele, bugol kayni nam ma ɦasam goyo hiɗi niy ma galakŋa.

²⁴ Niy galak namna ma mar be'da nam ma vulum mi cata kay na' ma cumu, niy ma mar be'da ma kal haya'a kay muɗa' haya' galaki.

²⁵ Jew kayni mul-ma-ɗifinna ma vi ɗifinna vi hunayta ma ka hay bam cata, nam ma muɗum galam kulo kaf vok Ma-Vatɗina, nam ma lum ɗifini kulo kay giwin-ma-ɗifinna;

²⁶ mul-ma-ɗifinna ma hob way-ɓalamu hiɗi futuw ma ɗifinna ma gi-humda, nam ma ŋalam kulo'o kay giwin-ma-ɗifinna, bugol kayni nam ma vul niy namna mi cata.

²⁷ Hay li ma na' ci niy namnawa, bugol ɗawni, la tuwa' muɗi liwis gasiya, la na' muɗi viyuw kat jufa' gasiya, niy ma mar be'da ma kal haya'a, ma muɗa' haya' galaki; haya' ma gera, na ma geta, sumuna va' ma muɗ wi joota vi be'da kata'a.

²⁸ May la cat may ɓulak tuwa'ɗi, na' ka bay joo'o, ma ɗuwa' ki na' may li va ma jooɗi nala, na' ma fi guro'o kaw.

²⁹ Kayni ti gatta kay lawta vi hunayta, hay li ma cat ka hay gaŋeraŋa vi jufa'a, may na' hinim bugola'a, muɗ tuwa liwisi,

³⁰ lebo hay li ma jufna hunayt kal hayamu, nam tun caw niŋa cata valamu: Mul-ma-ɗifinna ma cola' kulo'o vok Ma-Vatɗina, gat na'ta kayni nam ma la' ta' kafe.

³¹ Jufn hayɗin joo valam may hay kaynɗi, may cata, na' ma ziy zumalda vi joota va'a.