ŊAƁTA 4 - BIBALDA TA PELDETTA

Lopna vi sum sa Levitna

¹ Ma-Vatɗina di tam Musus hiɗi Aaron ala:

² Sum sa Kehatna sa kuɗ vuɗna vi Levitna naŋ ma ŋaɓsi goyo, ŋaɓsi goy kuɗ jafna visi kaf, kuɗ ziyna vi sumaysi kaf kaw,

³ tun-caw tam busat dok-ɦidi ta-ta kulo kay busata dok-vaslta ɗaw, kayn di ala sum sa nagay kay li lop hay guɗuk ma fi-tuwn kaf.

⁴ Lop ma nisi ma lum hay guɗuk ma fi-tuwn ɗawni, mi ŋomda vi liyn ma suwi peldetna

⁵ hay li ma nisi min joka, Aaron hiɗi gurona valam ma co'o kay gra sligar ma gaɓayn gaa'a, nisi ma bar yam timgilla vi di-goyta kaw;

⁶ nisi ma baram yalam hiɗi borgona ma koti hiɗi bakŋa vi dofeŋŋa, sligar ma tuwam zim-zimna nisi ma baram kulo kalam lo, nisi ma kal zugulayna gaa gal timgilla may.

⁷ Nisi ma bar sligar ma tuwam zim-zimna kulo kay tablena, ma fun ma vuli goyna ka lakay kulo kalamna. Zlarakŋa, tasa ma niyna, tasana hiɗi ŋalayna ma yam niyn goyna kaf nisi ma lakam kulo kalamu; fun ma hin lakay kalam na lak' dok-doko;

⁸ sle namna nisi ma bar sligar ma slaw cih-cihna talamu, nisi ma baram tuwam hiɗi borgona ma koti hiɗi bak dofeŋŋa, bugolda nisi ma cuk zugul ma ziy tablena talamu.

⁹ Nisi ma yaw sligar ma tuwam zim-zimna, nisi ma bar yam va ma tun fitilla, sle ma do kuna, ŋarak ma yaw butuw-kuna, hiɗi doway ma hok mula, ma li lop hiɗi namna;

¹⁰ hiɗi jak ma talamna kaf, nisi ma bar bak dofeŋŋa kulo kalamu, bugolda tunum kulo kay gu ma ziy slen hiɗi namna.

¹¹ Nisi ma bar sligar ma tuwam zim-zimna kulo kay giwin-ma-ɗifinna ma ora, nisi ma baram yalam hiɗi borgon ma koti hiɗi bak dofeŋŋa; bugolda nisi ma cuk zugul tam giwin-ma-ɗifinna.

¹² Jakŋa ma li lop hiɗi namu hay liyn ma peldetna nisi ma yawam kafe, nisi ma junum hay sligar ma tuwam zim-zimna, nisi ma gi borgon ma koti hiɗi bak dofeŋŋa talamu; bugol kayni nisi ma tunum kulo'o kay gu ma ziy slen kalamna.

¹³ Butuw-kuna ma ka kulo kay giwin-ma-ɗifinna nisi ma yawam goyo, bugolda nisi ma bar sligar ma tuwam wura zim-zimna kulo kalamu;

¹⁴ jak ma li lop hiɗi namna kaf nisi ma lakam kulo kalamu: Ganuna, ɗamna, pella, gof ma yam niyna, nisi ma bar borgon ma koti hiɗi bak dofeŋŋa kulo kalam lo; bugol kayni nisi ma cuk zugulayn tam giwin-ma-ɗifinna.

¹⁵ Hay li ma Aaron hiɗi gurona valam vat lop ma bar tuw liyn ma peldetnawa, hiɗi sle ma hayam petna kaw, gurona vi Kehat ma co yo, kay ziy sle namna, hay li ma nisi min joka, kay nisi kay tuwsi ma jo sle ma peldetnaɗi, a nisi ma mitɗi. Lop ma vuli hay ɓam gurona vi Kehat kayni kay ziy jakŋa.

¹⁶ Eliyazar, goora vi mul-ma-ɗifinna Aaron, lopna valam kayni mi ŋomda vi mul ma ɦokom hay fitilla, urdi ma hisna, sle ma vuli goyo kay dok-dokŋa, hiɗi mul ma ɦok kamna, tabernaklena hiɗi sle ma talamna kaf, guɗukŋa hiɗi jak ma hayamna kaw, ŋomom kaf ɗawn mi namu.

¹⁷ Ma-Vatɗina di tam Musus hiɗi Aaron ala:

¹⁸ Jafna vi sum sa Kehatna nigi hinsi cim goy jar gurona vi Leviɗi.

¹⁹ Kayni mi va ma nigi ma li'e a nisi ma mitɗi: Hay li ma nisi coowa tam liyn ma suwi peldetna, Aaron hiɗi gurona valam ma co'o, nisi ma lak bugolsiya kay gutsi hay lopna.

²⁰ Nisi ma cuk kalafi kay ɗuw sle ma peldetna ma ka ɗutinɗi, kay a nisi ma mitɗi.

²¹ Ma-Vatɗina di tam Musus ala:

²² Gurona vi Gerson kaw naŋ ma ŋaɓsi goyo, kuɗ ziyna vi sumaysiya hiɗi jafna visi kaf;

²³ naŋ ma li ŋaɓta visi goyo, tun caw tam busat dok-ɦidi ta-ta co busat dok-vasl, kay sumun kaf sa nagay kay li lop hay guɗuk ma fi-tuwna.

²⁴ Kayni mi lop ma jafna vi Gerson ma lumu hiɗi sle ma nisi as ziyimna:

²⁵ Nisi ma ziy tapi ma kay tabernaklena hiɗi guɗuk ma fi-tuwna, borgon ma talamna hiɗi borgon ma koti hiɗi bak dofeŋŋa ma baram kalamna, sligara ma ka vun guɗuk ma fi-tuwna;

²⁶ kojolay ma ka vun wur-daŋŋa hiɗi sligara ma hay vunna vi wur-daŋŋa hiɗi giwin-ma-ɗifinna, ma ka ŋuyi tam tabernaklena hiɗi giwin-ma-ɗifinna, zigewna valamu hiɗi jak ma talamna kafe. Lop ma talamna kaf nisi ma lumu.

²⁷ Hay li ma gurona vi Gerson li lopna visi ɗawni, nisi ka gaa kuɗ gaŋeraŋa vi Aaron hiɗi gurona valamu, hay sle ma nisi ma ziyimna hiɗi lop ma nisi ma lumna kaf; sle ma nisi ziyimna nigi ma hinim ŋomda valam hay ɓisiya.

²⁸ Kayni mi lopna vi sum sa hay jafna vi Gersonna, lop ma nisi ma lum hay guɗukŋa, hiɗi slen ma nisi ma ŋomom gaa kuɗ gaŋeraŋa vi Itamar, goora vi mul-ma-ɗifinna Aaron.

²⁹ Naŋ ma ŋaɓ gurona vi Merari goyo, kuɗ jafna visiya, kuɗ ziyna vi sumaysiya kaw;

³⁰ naŋ ma li ŋaɓta visi ɗawni, tun caw tam busat dok-ɦidi ta-ta co tam busat dok-vasl, kayn di ala nisi kaf sa nagay kay li lop hay guɗuk ma fi-tuwna.

³¹ Kayni mi sle ma hini hay ɓisi kay ŋoma hiɗi sle ma nisi ma ziyimna, hiɗi lopna visi kaf hay guɗuk ma fi-tuwna: Biremna vi tabernaklena, malla valamu, dolla valamu hiɗi diram ma moki gaana;

³² dolla ma ka hay wur-daŋŋa, sle ma moki gaa kuɗumna, gu-ɓalla valamu, zigewna valamu, jak ma talamna kafe hiɗi sle ma li lopna valam hiɗi namna, sle ma nisi ma ŋomomu hiɗi ma nisi ma ziyimna nigi ma ɗeksit selem goy kafe.

³³ Kayni mi lop ma gurona vi Merari ma lumna, lopn kaf ma nisi ma lum hay guɗuk ma fi-tuwna, gaa kuɗ gaŋeraŋa vi Itamar, goora vi Aaron mul-ma-ɗifinna.

³⁴ Musus hiɗi Aaron hiɗi sa ŋulon kuɗ jafna li ŋaɓta vi gurona vi Kehat goyo, kuɗ jafna visiya hiɗi ziyna vi sumaysiya kafe,

³⁵ nisi sa busata visi tun caw tam dok-ma' ta-ta co dok-vasl, sa asay kay li lopo hay guɗuk ma fi-tuwna.

³⁶ Sa nisi li ŋaɓta visi goy kuɗ jafna visi petna co birim ma' hiɗi kis-siɗiya kalam dok-vasl.

³⁷ Kayni si jafna vi Kehat sa nisi li ŋaɓta visi goyna, nisi kaf sa li lopo hay guɗuk ma fi-tuwna, Musus hiɗi Aaron li ŋaɓta visiya, ki Ma-Vatɗina vul hagat tam Musus nala.

³⁸ Gurona vi Gerson sa nisi li ŋaɓta visi goyo, kuɗ jafna visiya hiɗi ziyna vi sumaysiya,

³⁹ tun caw tam busat dok-ɦidi ta-ta busat dok-vasl, nisi kaf sa nagay kay li lopo hay guɗuk ma fi-tuwna,

⁴⁰ sa nisi li ŋaɓta visi goyo, kuɗ jafna visiya, kuɗ ziyna vi sumaysiya, nisi co noŋ pet birim ma' hiɗi diram kis-karkiya kalam dok-hidi.

⁴¹ Kayni si jafna vi Gerson sa nisi li ŋaɓta visi goyna, nisi kaf sa li lopo hay guɗuk ma fi-tuwna; Musus hiɗi Aaron li ŋaɓta visiya ki Ma-Vatɗina vul hagata mi Musus nala.

⁴² Sa hay jafna vi Merari sa nisi li ŋaɓta visi goyo, kuɗ jafna visiya, kuɗ ziyna vi sumaysiya,

⁴³ tun caw tam busat dok-ɦidi ta-ta co tam busat dok-vasl, nisi kaf sa nagay kay li lopo hay guɗuk ma fi-tuwna,

⁴⁴ sa nisi li ŋaɓta visi goyo kuɗ jafna visiya, nisi co noŋ pet birim ɦidi hiɗi kis-ma'.

⁴⁵ Kayni mi jafna vi gurona vi Merari sa nisi li ŋaɓta visi goyna; Musus hiɗi Aaron li ŋaɓta visiya ki Ma-Vatɗina vul hagat mi Musus nala.

⁴⁶ Sa hay jafna vi Levitna, sa Musus hiɗi Aaron hiɗi sa ŋulona vi Israyel kaf li ŋaɓta visi goyo, kuɗ jafna visiya hiɗi ziyna vi sumaysi kaf kayni,

⁴⁷ tun caw tam busat dok-ɦidi ta-ta busat dok-vasl, nisi kaf sa nagay kay li lopo, ziy jakŋa kaw hay guɗuk ma fi-tuwna.

⁴⁸ Sa nisi li ŋaɓta visi goy noŋ kafna, co birim glafandi hiɗi kis-vasl kalam dok-glafandi.

⁴⁹ Nisi li ŋaɓta visi kayn kuɗ hagat ta Ma-Vatɗin vula' tam Mususta. Nam ɗek mi gigekaw kay lop ma nam ma lumna hiɗi jak ma nam ma ziyimna; nisi li ŋaɓta visi goyo ki Ma-Vatɗina vul hagata tam Musus nala.