ŊAƁTA 3 - BIBALDA TA PELDETTA

Ŋaɓta vi sum sa Levitna

¹ Kayni mi jafna vi Aaron hiɗi Musus, hay li ma Ma-Vatɗin law tam Musus, kulo kay hiɗiyta Sinay.

² Kayni mi semda vi gurona vi Aaron: Nadab, ma vuɗi jewna, Abihu, Eliyazar hiɗi Itamar.

³ Kayni mi semda vi gurona vi Aaron, sa nisi ɦoksi mul kisiya ki muliyan-sa-ɗifinna nala, sa nisi tunsi hay lopna kay li lopna vi ɗifinna.

⁴ Nadab hiɗi Abihu mit hay vok ir Ma-Vatɗina, hay li ma nisi mar kuta ta pulta vok ir Ma-Vatɗina, hay fulda vi Sinay, nisi may fi guroɗi. Eliyazar hiɗi Itamar ka li lopna vi ɗifinna vok ir busi Aaron.

⁵ Ma-Vatɗin ka di tam Musus ala:

⁶ Yaŋ jafna vi Levi aya, naŋ ma laksi kulo vok Mul-ma-ɗifinna Aaron, kay nisi ma sunumu.

⁷ Nisi ma kot tuw sle ma hini hay ɓam Aaron kay ŋomomna, hiɗi sle ma hini hay ɓam tokŋa, vok guɗuk ma fi-tuwna, nisi ma li lop ma hay tabernaklena.

⁸ Slen kaf ma ka hay guɗuk ma fi-tuwna nisi ma kotom tuwamu, hiɗi slen ma ka vuli ɓam gurona vi Israyel kay ŋomomu: Nisi ma li lop ma hay tabernaklena.

⁹ Sum sa Levitna naŋ ma vulsi hay ɓam Aaron hiɗi gurona valamu; naŋ ma vulsi goy malam noŋ kafe, hay sem gurona vi Israyel kaf.

¹⁰ Naŋ ma tun Aaron hiɗi gurona valamu hay lop ma ɗifinna; la sa ma pul coowa goboyo, nam ma mita.

¹¹ Ma-Vatɗina di tam Musus ala:

¹² Humaŋu, sum sa Levitna nan yawsiyawa goy jar gurona vi Israyel, hay baŋal guro sa vuɗi jewn kaf, sa vuɗi jewna jar gurona vi Israyel; sum sa Levitna nisi ir vanu.

¹³ Guro sa vuɗi jewn kaf nisi ir vanu, kay hay buur ma nan wat guro sa vuɗi jewn kaf hay nagat Egipte kayni, guro sa vuɗi jewna vi sa Israyel kaf nan muɗsi ir vanu, la si sumuna, la mi farayna kaw: Nisi ir vanu. Nanu mi Ma-Vatɗina.

¹⁴ Ma-Vatɗina di tam Musus hay fulda vi Sinay ala:

¹⁵ Naŋ ma li ŋaɓta vi gurona vi Levi goyo, li ŋaɓta kuɗ jafna vi sumaysiya, kuɗ ziyna visi kafe, naŋ ma li ŋaɓta vi sum sa jufayn goy kafe, tun caw tam til kepe ta-ta kulo kalam ɗaw.

¹⁶ Musus li ŋaɓta visi goyo ki Ma-Vatɗina vulum hagat nala, nam li kuɗ va ma Ma-Vatɗin dumtina.

¹⁷ Tan kayni mi semda vi gurona vi Levi: Gerson, Kehat hiɗi Merari.

¹⁸ Tan kayni mi semda vi gurona vi Gerson, kuɗ jafna visiya visiya: Libni hiɗi Simey.

¹⁹ Kayni si gurona vi Kehat, kuɗ jafna visiya visiya, Amram, Yitsehar, Hebron hiɗi Uziyel;

²⁰ gurona vi Merari kaw, kuɗ jafna visiya visiya: Makli hiɗi Muski. Nisi kayni si jafna vi Levi, kuɗ ziyna vi sumaysi kaf.

²¹ Jafna vi Libni hiɗi jafna vi Simey may goy hay Gerson pa, tun jafna vi sum sa Gersoniyan kayn si nisiya.

²² Sum sa nisi ŋaɓsi goyn kaf, ŋaɓta vi jufayn tun caw tam til kep ta-ta kulo kalam ɗaw kayni, nisi co pet ir birim siɗiya hiɗi diram kis-vasl.

²³ Jafna vi sum sa Gersoniyana farana visi viy goy bugol tabernaklena, hay gal ma vulatina.

²⁴ Sa ma ŋolla hay jafna vi sum sa Gersoniyan kayn mi Eliyasaf goora vi Layel.

²⁵ Lopna vi kot-tuwna vi guɗuk ma fi-tuwna nisi vulum hay ɓam gurona vi Gerson: Tabernaklena, hiɗi tantana, borgona, sligar-gaɓayna ma ka vun guɗuk ma fi-tuwna;

²⁶ kojolay ma ka hay wur-daŋŋa hiɗi sligar-gaɓayna ma ka hay vun wur-daŋŋa, ma ka ŋuyi tam tabernaklena hiɗi giwin-ma-ɗifinna, hiɗi zigew ma li lop hiɗi nam hay tabernaklen kaf.

²⁷ Jafna vi sum sa Kehatna may goy hay jafna vi sum sa Amramiyana, sa Yitseriyana, sa Hebronna, hiɗi sa Uzzeliyena, tun jafna vi sum sa Kehatna kayn si nisiya.

²⁸ Ŋaɓta vi sum sa jufayna visiya, tun caw tam til kep ta-ta kulo vok ɗaw kayni, tapay pet birim glafandi hiɗi kis-karkiya, kayni si sa lop kot-tuwna vi guɗukŋa ma peldetna hini hay ɓisina.

²⁹ Jafna vi sum sa Kehatna guɗukŋa visi viy hay gal ma kayamna vi tabernaklena.

³⁰ Ma ŋolla hay jafna vi Kehat kayni mi Elisafan, goora vi Uziyel.

³¹ Lopna vi kot tuwna vi Arkena, tablena, va ma tun fitilla, giwin-ma ɗifinna, hiɗi jakŋ ma hay liyn ma peldetna, ma li lop hiɗi namna kaf, sligar-gaɓayna hiɗi sle ma talamna kaf nisi hinim hay ɓisiya.

³² Ma ŋolla vi sa ŋulona vi Levitna mi Eliyazar, goora vi Mul-ma-ɗifinna Aaron, namu mi ma ŋom nisi sa lopna vi kot-tuwna vi liyn ma peldetna hini hay ɓisina.

³³ Jafna vi Makli hiɗi jafna vi Muski may goy hay jafna vi Merari pa.

³⁴ Sa nisi li ŋaɓta visi goy kafna, ŋaɓta vi sa jufayn kaf, tun caw tam til kep ta-ta kulo kalam ɗaw kayni, nisi birim karkiya hiɗi kis-ma'.

³⁵ Ma ŋolla hay jafna vi Merari kayni mi Suriyel, goora vi Abihayil. Guruna visi viy hay gal ma gaana vi tabernaklena.

³⁶ Lop ŋomda hiɗi kot-tuwna vi biremna vi tabernaklena, gu-malla valamu, dolla hiɗi sle ma mokom gaa kuɗumna, jak ma hayamna hiɗi sle ma talamna kaf; ŋomom nisiya;

³⁷ dolla ma ka ŋuyi tam wur-daŋŋa kaf, sle ma moki gaa kuɗumna, gu-ɓalla hiɗi zigew ma talamna kaf kaw.

³⁸ Musus hiɗi Aaron hiɗi gurona visiya, guɗukŋa visi ka viy goy vok tabernaklen ɗiger, hay gal ma kuɗuwna, goy vok guɗuk ma fi-tuwna, hay gal ma fatta dayna; nisi ka ŋom liyn ma peldetna, kotom tuwamu kaw, hay sem gurona vi Israyel. La sa ma pul min ma talam goboyo, nam ma fi mitta.

³⁹ Sum sa Levitn kaf sa Musus hiɗi Aaron li ŋaɓta visi goyo, ki Lawn vulsi hagat nalana, kuɗ ŋaɓta vi jafna visiya, sum sa jufayn kaf, tun caw tam til kep ta-ta kulo kalam ɗaw kayni, nisi tapay pet birim dok-ma' yam ma'.

Gusta vi guro sa vuɗi jewna

⁴⁰ Ma-Vatɗina di tam Musus: Naŋ ma li ŋaɓta vi guro sa jufayna sa vuɗi jewna jar gurona vi Israyel kafe, tun caw tam til kep ta-ta kulo kalam ɗaw, naŋ ma ŋaɓsi sesi goy kaf.

⁴¹ Sum sa Levitna naŋ ma laksi goy ir van nan Ma-Vatɗina, hay baŋal guro sa vuɗi jewna vi Israyel kafe, farayna vi sa Levitna hay baŋal faray ma vuɗi jewna jar farayna vi Israyel.

⁴² Gurona vi Israyel sa vuɗi jewn kaf Musus li ŋaɓta visi goyo, ki Ma-Vatɗina vulum hagat nala.

⁴³ Jufay sa vuɗi jewn kaf, sa nisi li ŋaɓta visi goyna, sa nam ŋaɓsi sesi goyna, tun cawis tam til kep ta-ta kulo kalam ɗaw kayni, nisi co birim dok-ma' yam ma', diram kis-ma' kalam dok-siɗiya yam ɦidi.

⁴⁴ Ma-Vatɗina di tam Musus ala:

⁴⁵ Sum sa Levitna naŋ ma yawsi hay baŋal guro sa vuɗi jewna vi Israyel kafe, farayna vi sa Levitna hay baŋal farayna visiya: Nala sum sa Levitna nisi ma muɗ ir vanu. Nanu mi Ma-Vatɗina.

⁴⁶ Kay gus gurona vi Israyel sa vuɗi jewna, sa suw goy kay sa Levitna ir kis-ma' hiɗi diram dok-siɗiya yam ɦidin kayni,

⁴⁷ naŋ ma yaw sikel vasl kay sa ma kepna, ŋram kuɗ sikel ma ka li lop hay Tempella, sikel kep ir gera dok-ma'.

⁴⁸ Naŋ ma vul gurjut mi Aaron hiɗi gurona valamu, kay gus sum sa suwi goy kay sa Levitna.

⁴⁹ Musus yaw gurjuta kay gus sum sa suwi goy ŋol kay sa Levitna;

⁵⁰ nam yaw gurjuta vi guro sa vuɗi jewna vi Israyel: Gurjuta ir sikel birim kep hiɗi diram kis-ɦidi kalam dok-karkiya yam vasl, ŋray hiɗi sikel ma ka li lop hay liyn ma peldetna.

⁵¹ Ki kayn nala Musus vul gurjut ta gusna mi Aaron hiɗi gurona valamu, nam li kuɗ dita ta Ma-Vatɗin dumtita.