ŊAƁTA 27 - BIBALDA TA PELDETTA

Gatta kay vocota

¹ Guro-boyna vi Selofkad goora vi Heber, goora vi Galaad goora vi Makir, goora vi Manase, hay jafna vi Manase goora vi Yosef, sem guro-boy nisin ala Mahla, Nowa, Hogla, Milka hiɗi Tirsa.

² Nisi tuɗ vok Musus, vok mul-ma-ɗifinna Eliyazar, vok sumun kaf kaw, goy vun guɗuk ma fi-tuwna, nisi di'e:

³ Buma miti hay fulda, sumuna vi Kore sa yaw kulo kat Ma-Vatɗina nam may mit jarsiɗi, may nam mit kayni kay sulukŋa valam kay tuwamu, nam may hin goor jufɗi.

⁴ Nala sem buma ma ɦas goy jar jafna valamu kuɗ ta ala nam may hin goor jufɗita kayn kay mige? Naŋ ma vulma liy ir muma numa'a jar ɓosiyom buma'na.

⁵ Musus tuɗ lawt kayni vok Ma-Vatɗina.

⁶ Nala Ma-Vatɗina di tam Musus.

⁷ Lawta vi guro-boyna vi Selofkad hay liya'a. Naŋ ma vulsi liy ma voco ir misiya jar gurona vi busiya, ir vocota vi busiya naŋ ma vula' misi nisiya.

⁸ Naŋ ma di tam gurona vi Israyel ala: Hay li ma san mitawa bay goor juf baŋalamu, nigi ma vul vocota valam mi goota valam ta cata.

⁹ La nam may hin goot-caɗi, nigi ma vul vocota valam mi ɓosiyomna.

¹⁰ La ɓosiyom sayɗi lay ni, nigi ma vul vocota valam mi ɓosiyom bulumna.

¹¹ La ɓosiyom bulumna say noŋɗi lay ni, nigi ma vul vocota valam mi sugoliyom sa goboyna, nisi ma yaw vocot na'ta, sa Israyella ma col kay gat na'ta kayni, ki Ma-Vatɗina vul hagata tam Musus nala.

Vilek Yosuwa kay nam ma vurna baŋal Musus

¹² Ma-Vatɗina di tam Musus: Jikaŋ kulo kay hiɗiyta vi Abarim zawni, ɗuwaŋ nagata ta nan min vula' mi gurona vi Israyel.

¹³ Iraŋ ma wi naga na'ta, may naŋ ma tap kuɗ sumiyaŋu, ki ɓasuŋŋa Aaron kaw mit kayn nala;

¹⁴ kay nigi ŋelan vunanu hay fulda vi Sin, hay li ma sumun fok hiɗi ci-wayta, hay li ma niyn mun goyn kayni, nigi min ɗek peldetta van goy kir sum sa Israyelɗi. Kayni mi niyn ma ci-wayt fok kuɗumu hay Kades, hay fulda vi Sin.

¹⁵ Musus di tam Ma-Vatɗina ala:

¹⁶ Naŋ Ma-Vatɗina Lawna ma sukka vi sumun hay ɓaŋ kafna, tunaŋ sa mara kay sumuna,

¹⁷ ma lin mi sa ma kal goy voksiya, kal kalaf voksiya, ma kalsi goyo, hotsi kalafi, kay tokŋa vi Ma-Vatɗina ma li ki fok-dimina ma bay ŋomda naɗi.

¹⁸ Ma-Vatɗina di tam Musus: Slaŋ Yosuwa goora vi Nun, sa ma Ŋusta ka hayamu, naŋ ma tun ɓaŋ kalamu.

¹⁹ Naŋ ma colom vok mul-ma-ɗifinna Eliyazar, vok sumun kaf kaw, naŋ ma vulum gatta kirsi kafe.

²⁰ Naŋ ma vulum gajijita vaŋu, kay gurona vi Israyel kaf ma hum kuɗumu.

²¹ Nam ma col vok mul-ma-ɗifinna Eliyazar, Eliyazar ma job Urimna kalamu vok Ma-Vatɗina, Yosuwa hiɗi gurona vi Israyel kaf, ma cukay goyo kuɗ dita vi Eliyazar, nala nisi ma hum kuɗ gatta vi Yosuwa.

²² Musus li kuɗ va ma Ma-Vatɗin dumtina. Nam vi Yosuwa, colom vok mul-ma-ɗifinna Eliyazar hiɗi sumun kaf,

²³ nam tun ɓalam kalamu, hinim lawt hay ɓalamu, ki Ma-Vatɗina dum nala.