ŊAƁTA 25 - BIBALDA TA PELDETTA

Nisi girif lawayn ma waana hay fulda vi Mowab

¹ Sa Israyella ka lakay hay Sittim; nisi tun caw li tuwsi viyuw hiɗi guro-boyna vi Mowab.

² Guro-boy sa Mowabna yi sumuni hay ɗifinna vi lawayna visiya; sumun ti'e, dab voksi gaa vok lawayna visiya.

³ Israyella jun tuwsi tam Baal-Pewor, nala Ma-Vatɗina muɗ ɦiya kat sa Israyella.

⁴ Ma-Vatɗina di tam Musus: Tokaŋ sa ŋulona vi Israyel kafe, sa li joona naŋ ma ɓalsi kulo kat guna vok ir Ma-Vatɗina goy hay fatta, kay ɦiyda vanu tam sa Israyella ma vat goyo.

⁵ Musus di tam sa ka kitana vi Israyel: Sa kuɗgi gigekaw ma ci sumuna valamu sa jun tuwsi tam Baal-Pewor.

⁶ Ɗuw na kayni, sa mara jar gurona vi Israyel kep co'o, nam mar cata Madiyanta kuɗum kepe jar guro-biyomna, Musus hiɗi gurona vi Israyel kaf wi kayni, kay nisi kaf ka tokay vun guɗuk ma fi-tuwna kay tiya.

⁷ Hay li ma Fineyas goora vi Eliyazar, goor-ŋolona vi mul-ma-ɗifinna Aaron wi kayni, nam fok kulo'o jar tokŋa, sli yakat hay ɓalamu.

⁸ Nam tap kuɗ sa namna hay guɗukŋa valamu, sana hiɗi cata nam jiksi haysi ma' pete, nala bakmaran vat goyo jar sa Israyella.

⁹ Sum sa bakmaran cisin noŋ pet co birim dok-ma' yam fiɗi.

¹⁰ Ma-Vatɗina di tam Musus ala:

¹¹ Wulin kayni, ɦiyda van ta tam gurona vi Israyella, Fineyas goora vi Eliyazar, goor-ŋolona vi Aaron vata'awa goyo, kay jar sa Israyel kayni, ciwerta van ka hay dikamu, hay ɦiyda vanu, nan may vat sa Israyel goy noŋɗi.

¹² Kuɗ kayni naŋ ma di ala nan min vi bonota ta toyta hiɗi namu.

¹³ Bonot na'ta ma hin kalamu hiɗi jafna valam ɗawni, ti bonota vi ɗifin ma vatɗina, kay nam li ciwer ŋolo kay Lawna valamu, kay nam li poorawa kay gurona vi Israyel.

¹⁴ Sa ma Israyel namna ma nisi cum goy hiɗi goota ta Madiyanta yum Zimri, nam mi goora vi Salu; mi sa ma ŋolla hay jafna vi Simeyon.

¹⁵ Cata ta Madiyanta ta ca' hiɗi namta ya 'ala Kozbi, goota vi Sur, nam mi ma ŋolla vi sum sa may goy hay jafna vi Madiyan pa.

¹⁶ Ma-Vatɗina di tam Musus ala:

¹⁷ Sa Madiyanna naŋ ma lassi ki sa gaw kaŋŋa nala, cisi goyo;

¹⁸ kay nisi ɗek tuwsi goyo ki sa gaw kigin nala, kay nisi ɗutgi goyo hiɗi mileta visiya hay lawta vi Pewor, hiɗi lawta vi Kozbi ta ɓasusita, goota vi sa ma ŋolla vi Madiyan, ta fi mitta hay liyn ma bakmaran li'e kuɗ lawta vi Pewor.

Ŋaɓta mara lo bugol kalta visi goy hay fulda

¹⁹ Bugol bakmara namna kayni,