ŊAƁTA 21 - BIBALDA TA PELDETTA

Nisi kol kay sa Kanaaniyana, guy ma sinawna

¹ Mul ma hay Aradna, ma Kanaaniyana, ma ka musi ziy hay gal ma kayamna, hum ala sa Israyel ka tuɗay hay hagata vi Atarim. Nam dur sa Israyella, yaw segen kuɗsi daŋgaya.

² Bugol kayni sa Israyella yi va kisi vok Ma-Vatɗina di'e: Ma-Vatɗina, la sum nisin kayni naŋ vulsiyawa hay ɓuma'a, hoyok-ziyna visi noŋ kaf numa ɓulakam goyo.

³ Ma-Vatɗin hum dita vi sa Israyella, nam vul sa Kanaaniyan hay ɓisiya, nisi ɓulaksi goy kaf sumuna hiɗi hoyok-ziyn kafe; liy namna nisi tunum selem ala Horma.

⁴ Nisi yaways hay hiɗiyta vi Hor pa kal hay hagata vi niy-lum ma slawna, kay jik goy gal nagata vi Edom.

⁵ Hay li ma sumun ka hay hagat kayni, cubta-sle'ta visi vat goyo. Nisi tun caw law kat Lawna, kat Musus kaw ala: Nigi kalma'ay goy hay Egipte noŋ kayn kay mige? Kay a numa ma mit goy hay fulda su? Tan kayni fu mayɗi lay, niy mayɗi lay, tin namna ma liwisna ma yum ala manna kayni numa makawa kalamu.

⁶ Kuɗ kayni, Ma-Vatɗina cuk ay guyna ma sinawna kat sumuna; guy namna calsiya, sumun ŋolo hay Israyel fi mitta.

⁷ Sumun co kat Musus di'e: Numa li sulukawa, kay numa law joo kat Lawna, law kataŋ naŋ lay. Siɗawaŋ Ma-Vatɗina, kay nam nar guyn kayni goy katma gine'e. Musus siɗaw kay sumuna.

⁸ Ma-Vatɗina di tam Musus: Naŋ ma kot guy ma sinawna, naŋ ma gaɓam kulo tam guna; la sa calay kay guyn kaw, hay li ma nam ɗuwawa kulo talamu, nam ma mitɗi.

⁹ Musus kot guy-wayna, nam gaɓam kulo tam guna; la sa calay kay guyn kaw, hay li ma nam ɗuwawa kulo talamu, nam may mitɗi.

SUM SA ISRAYELLA HAY NAGATA VI MOWAB Nisi kol kay nagata ta goy bugol Yordan

¹⁰ Gurona vi Israyel kaliya, nisi lak ziy hay Obot.

¹¹ Nisi yaways hay Obot, nisi kal lak hay Iye-Abarim, hay fulda ta ka ɗiger vok Mowab, hay gal ma kuɗuwna.

¹² Nisi kalays hay ɗawn pa, tuɗ lak hay liyn ma beɗna vi Zered.

¹³ Nisi yaways hay ɗawn pa, tuɗ lak hay gal hena vi Arnon, niy-lum ma may goy vi sa Amoriyan pa, jik hay fulda jew a bur jar nagata vi Mowab hiɗi sa Amoriyana.

¹⁴ Kay mige, dit ka diy hay ɗerwel ma duura vi Ma-Vatɗin ala: Waheb hay Sufa, hiɗi niy ma vidikŋa vi Arnon,

¹⁵ hiɗi ɓam niy ma vidikŋa, ma fokay hay galla vi Ar pa, co tam jar-liyna vi Mowab.

¹⁶ Hay ɗawni nisi kal hay Beer. Beer kayn mi liyn ma Ma-Vatɗin di tam Musus ala: Tokaŋ sumuna, nan min vulsi niy ma ci'e.

¹⁷ Bugolda sa Israyella gi nulla ki kayn nala: Jikgi ay kulo'o, kaara, gigi nul hay semda valamu.

¹⁸ Kaara ma yeriman comna, ma sa gumiyana comna, hiɗi zugulda mulda, hiɗi zugulayna visiya!

¹⁹ Hay fultis pa nisi kal hay Mattana, hay Mattana pa kal Nahaliyel, hay Nahaliyel pa kal hay Bamot;

²⁰ hay Bamot pa, co tam liyn ma beɗna ma ka hay nagata Mowab, kulo kay hiɗiyt Pisga, goy vok fulda.

²¹ Sa Israyella gi sun tam Sihon, mul ma Amoriyana, kay dum ala:

²² Naŋ hinma jik hay nagata vaŋu; numa as jik kulo hay sineɗi lay, numa jo gulda-guldanɗi lay, numa as ci niy ma hay kaarɗi lay; numa sla' ɗawn ti haga ta ŋolda, ta-ta numa jik goy kay nagata vaŋu.

²³ Sihon min hin sa Israyella jik hay nagata valamɗi; nam tok sumuna valam kafe, kalay goyo kir sa Israyella hay fulda. Nam co hay Yahat, nam dur sa Israyella.

²⁴ Sum sa Israyella cal sumuna valam hiɗi kew-gaferaŋa, yaw nagata valamu, vuna' ay hay Arnon zaw ta-ta hay Yabok, ta-ta vun nagata vi gurona Amon goŋ'. Kay vun nagata vi gurona vi Amon kayni ini hiɗi gulmunna.

²⁵ Sum sa Israyella yaw nagata kafe, nisi lak hay nagata vi sum sa Amoriyan noŋ kafe, hay Hesbon hiɗi naga ma juni kuɗumna kafe.

²⁶ Hay na'ta kayni, Hesbon mi hoyok-ziyna vi Sihon mul ma Amoriyana; kay nam dur hiɗi mul ma jewna ma hay Mowabna, nam yaw nagata valam kafe ta-ta hay Arnon.

²⁷ Kuɗ kayni sa di lawta ka di ala: Nigiyay hay Hesbon, hinsi in hoyok-ziyna vi Sihon kulo'o, hinsi in gulmun talam loge.

²⁸ Kay kut kalay goy hay Hesbon pa, kuta-ŋalda hay hoyok-ziyna vi Sihon pa; na' ŋal Ar-Mowab goyo, sum sa kulo kay Arnon.

²⁹ Joot kagu, Mowab, nak baawa goyo, sumuna vi Kemos, guro-jufayna valamu nam muɗsiyawa si sum sa mun jaŋi, guro-boyna valamu nam vulsiyawa goy gorvo'o, Sihon mul ma Amoriyana.

³⁰ Numa gisiyawa hiɗi ɓarawta; hay Hesbon ta-ta Dibon, slen kaf ɓulakay goyo, numa ɓulak liynawa ta-ta hay Nofak, ta-ta hay Medeba.

³¹ Sa Israyella tun hay nagata vi sa Amoriyana.

³² Musus cuk sumun kay ɗuw Yayezer, nisi yaw hoyok-ziy ma ta'na kafe, sa Amoriyan sa ka hay liy namna nisi digiɗsi goyo.

³³ Bugolda nisi sli hagat tara lo, nisi jik hay hagata vi Basan. Og, mul ma hay Basan, kalay goy kirsiya, hiɗi sumuna valam kafe, kay li duur hiɗi nisi hay Edrey.

³⁴ Ma-Vatɗina di tam Musus. Naŋ ma li nar kalamɗi, kay namu hiɗi sumuna valam kaf, hiɗi nagata valam kaf nan min vulsi hay ɓaŋu. Naŋ ma lassiya ki naŋ las Sihon mulla vi sa Amoriyana ma ay musi hay Hesbon nala.

³⁵ Nisi kol kalamu, namu hiɗi gurona valamu, hiɗi sumuna valam kaf, nisi hin sa goy kuɗsi kep noŋɗi, nisi sli nagata valamu kaw.