ŊAƁTA 19 - BIBALDA TA PELDETTA

Put-sinita hiɗi niy ma poora

¹ Ma-Vatɗina di tam Musus hiɗi Aaron ala:

² Humaŋ va ma gatta di'e kay lumna: Naŋ ma di tam gurona vi Israyel ala: Nisi maraŋ putta ta tuwa' sini kepe, ta va jo may ta'ɗi, moy may ta'ɗi lay, putta ta bay tun juk kela' tuwa'a.

³ Nigi ma vula' mi mul-ma-ɗifinna Eliyazar, nam ma nara' goy bugol guruna, nisi ma ŋata' gaa kiramu.

⁴ Mul-ma-ɗifinna Eliyazar ma yaw busuwn hiɗi cita-ɓalamu, nam ma yamam kulo vok guɗuk ma fi-tuwn sem siɗiya.

⁵ Putta nisi ma ŋala gaa vok iramu, ma ŋala' baka' goy lay, sliwn lay, busuwn lay, bisima' lay.

⁶ Mul-ma-ɗifinna ma yaw gu-gamna, hiɗi hisopna, hiɗi baraw ma tuwam doy slawna, nam ma cukum jar kuta ta ka ŋal putta.

⁷ Mul-ma-ɗifinna ma muz sligara valam goyo, nam ma muz tuwam goy hiɗi niyna, bugol kayni nan ma hotay hay guruna, nam muɗi liwisi ta-ta vulatita.

⁸ Sa ma ŋal puttana ma muz sligara valam goy hay niyna, ma muz tuwam goy hay niyn lay; nam muɗi liwisi ta-ta hay vulatita.

⁹ Sa ma tuwam muɗi liwisɗina ma tok butuw-kuna vi putta, tuɗ kom goy gine hiɗi gurona, hay liy ma may liwisɗina, butuw-ku namna ma ŋomom mi gurona vi Israyel, kay li niy ma poor hiɗi namu. Nam muɗi niy ma poora.

¹⁰ Sa ma yaw butuw-kuna vi putta ayna ma muz sligara valam goyo, nam muɗi liwisi ta-ta hay vulatita. Gatta kayni hini jargi dok-dok, kigi nigi gurona vi Israyella, kay sum sa pul sa ka li ziy jargina kaw.

¹¹ La sa tun ɓalamawa tam sa ma mitiya lebo va ma miti mige kaw, nam muɗi liwisi ta-ta ir buur siɗiya.

¹² Nam ma por tuwam goy hiɗi niy namna hay buurta ɦidita hiɗi buurta siɗiyata, nala nam ma muɗ goy bay liwisi. May la nam por tuwam goy hay buurta ɦidita hiɗi ta siɗiyatɗi, nam dok-dok liwisi.

¹³ Sa ma tun ɓalamawa tam ŋumna, tam tuw sa ma mitina, la nam may por tuwam goyɗi, nam muɗ tabernaklena vi Ma-Vatɗina liwisi; san kayni ma kaam selem goy jar sa Israyella. Kay niy ma poora may ɦoki kalamɗi, nala nam liwisi, liwista ka talam tuwa.

¹⁴ Gatta kayni lo. Hay li ma san mitawa kalaf hay guɗukŋa, sa ma kal kalaf kuɗum hay guɗukŋa hiɗi sa ma ka kalaf hay guɗukŋ jewna nisi muɗi liwisi ta-ta ir buur siɗiya.

¹⁵ Dowayn kaf ma va ma kuluɓum vunamna may juni gaa talamɗina nam liwisi.

¹⁶ La sa tun ɓalam tam sa ma ciy goy ful hiɗi kew-gaferaŋa, lebo sa ma ka miti goy valamu, lebo tun ɓalam tam zok sa ma mitiya, lebo tam us sa'a, nam muɗi liwisi ta-ta ir buur siɗiya.

¹⁷ Kay por sa ma liwisn kayni, nigi yaw butuw-kuna vi putta ta la' ɗifini kay por sulukŋa, cukum hay tasata, ɦok niy ma kilir kalamu.

¹⁸ Sa ma bay muɗ tuwam liwisna kus hisopna, jiyobom goloŋ hay niyna; bugol kayni nam ma yam niy namna goy kay guɗukŋa, kay jakŋa, kay sum sa ka tokayna, kay sa ma jo zok sa ma mitina, lebo jo sa ma ci mati, lebo jo sa ma mit kay tuwamu, lebo jo yam-usu kaw.

¹⁹ Sa ma tuwam may muɗi liwisɗina as li poora kay sa ma tuwam muɗi liwisna, nam porom hay buurta ɦidita hiɗi buurta siɗiyata, nam ma muz sligara valam goloŋ hay niyna muz tuwam hay niyna, nala nam muɗi peldete.

²⁰ Sa ma tuwam muɗi liwisi, ma min por tuwam goyɗina, ma kaam selem goy jar tokŋa, kay nam muɗ liyn ma peldetn vi Ma-Vatɗin liwisi; kay niyn ma poora may ɦoki talamɗi, nala nam liwisi.

²¹ Kayni ti gatta ta hini jargi dok-doko. Sa ma yam niyn ma poora ma muz sligara valam goyo, sa ma tun ɓalam tam niy ma poora nam muɗi liwisi ta-ta vulatita.

²² Sa ma muɗi liwisna, la nam tun ɓalam tam va mige kaw, va namna muɗi liwisi ta-ta vulatita, sa ma tun ɓalam talamna kaw muɗi liwisi ta-ta vulatita.