ŊAƁTA 15 - BIBALDA TA PELDETTA

Gatta kay lawta vi ɗifinna

¹ Ma-Vatɗina di mi Musus:

² Naŋ ma di tam gurona vi Israyel ala: Nagata ta nan min vulgiya kay nigi ma cuk ziyna vigi haya'ta ɗawni hay li ma nigi coowa haya'a,

³ la nigi min li ɗifin tam Ma-Vatɗina, la mi ɗifin ma ŋal-goyna, la mi ɗifin ma hob vun va ma nigi yum kigina, lebo ɗifin ma kuɗ minda, lebo hay yuldena vigiya, kay vul his ma ŋaana tam Ma-Vatɗina hiɗi luwayna vigiya lebo fukunayna vigiya,

⁴ Sa ma min mar ɗifinna valam tam Ma-Vatɗina ma mar futuw digeɗna, ma hiliɓi hiɗi mula ir goto ɦidi,

⁵ nam ma mar vinna ir litir kep hiɗi gali kaw, kay goor ɦu-dimi kep kep, kay ɗifin ma ŋal-goyna hiɗi ma ɦawana.

⁶ La mi ɦu-gamala'a, naŋ ma mar futuw ma digeɗn kuɗum ir goto karkiya, rigasay hay mula ir litir ma'

⁷ tapam hiɗi vinna ir litir ma', kay hista valam ŋaa'a kiranu.

⁸ La naŋ maram kayn mi goor-putu, la ki ɗifin ma ŋal goyn nala lebo kay hob vun va ma yiy kaŋŋa, lebo ki ɗifinna vi lop ma slugon nala vok Ma-Vatɗina,

⁹ ma tap tam putna futuw ma digeɗna ir goto zleeŋe, hiliɓi hiɗi mula ir litir ɦidi.

¹⁰ Tapam hiɗi vinna ir litir ma' kaw, kay hista valam ŋaa'a kiranu.

¹¹ Nigi ma li ki kayn nala kay luwayn kaf, kay fok-gamalan kaf, kay guro fok-dimin kaf, lebo kay fok-meen kaf.

¹² La faray ma nigi ŋatamna gaage kaw, ɗifin kayni ma tap kuɗum kafe.

¹³ Goora vi nagat marige kaw ma li slen ki kayn nala, hay li ma nam li ɗifin ma ŋalam hay kuta, ma hista valam ŋaa'a ŋolo kir Ma-Vatɗina.

¹⁴ La sa ma pul ka li ziy jargiya lebo jafam joki jargiya, la nam min li ɗifin ma ŋal-goyna, ma hista valamu ŋaa'a kir Ma-Vatɗina, nam ma li ɗifin namna ŋray ca ki nigi nala.

¹⁵ Gatta vigi ma li ŋray ca ki tuwa'a nala, gat na'ta kigi nigi gurona vi nagata hiɗi sum sa pul sa li ziy jargina, na' ma li ki tuwa' nala. Kayni ti gatta ta hini kigi dok-doko vok iranu.

¹⁶ Gatta vigi ma col kepe, dita vigi ma col kepe kaw, kigi nigiya hiɗi sum sa pulla sa ka li ziy jargina.

Gatta kay vun-jaf ma jewna hiɗi poora vi suluk ma bay-wida

¹⁷ Ma-Vatɗin di tam Musus:

¹⁸ Naŋ ma di tam gurona vi Israyel ala, hay li ma nigi coowa hay nagata ta nam min nargi haya'ta,

¹⁹ hay li ma nigi co a ti fu ma hay naga na'ta ɗawni, nigi ma vul galla vi Ma-Vatɗin goyo.

²⁰ Nigi ma ka kuɗ fu ma nigi yumna hiɗi hambulla vigi kaw, nigi ma vulum goyo hiɗi ɓigi kulo meɗiya ki vulda ma yawam kuɗ sle ma hay muɗakŋa nala.

²¹ Nigi ma ka kuɗ fu ma nigi yumna, vulum tam Ma-Vatɗina dok-doko, tam jafgi vokgi ɗaw.

²² La nigi li suluk ma kuɗ minda vigiɗina, hay li ma gatta ta Ma-Vatɗin vula' mi Musus kafta nigi li kuɗa'ɗi,

²³ gatta ta Ma-Vatɗin vulgit hay ɓam Musus kafta, tun caw tam buur ma nam vul vun-ma-gatna valamu ta-ta vok ɗaw;

²⁴ la nigi li suluk ma kuɗ minda vigiɗina, la tokŋa may wi kaynɗi, nisi kaf ma ŋat put ma joriyona, ŋalam goyo kay his ma ŋaana tam Ma-Vatɗina, tapay hiɗi sle ma vulda hiɗi sle ma yamam goyna, ki gatta coli nala, nisi ma ŋat ɦu-ŋek kep kaw kay ɗifin ma poora.

²⁵ Mul-ma-ɗifinna ma li poora kay tokŋa vi gurona vi Israyel kafe, nala nisi ma fi gida, kay nisi lum kayn mi suluk ma kuɗ minda visiɗina, kay nisi mar vulda visiyawa, mi ɗifin ma ŋalay hay kuta kay subur sem Ma-Vatɗina, hiɗi ɗifinna poora vok Iramu, kuɗ suluk ma nisi lum bay minda visina.

²⁶ Nala tokŋa vi gurona vi Israyel kaf hiɗi rogoy sa ka li ziy jarsina ma fi gida, kay nisi li suluk kayni may kuɗ minda visiɗi.

²⁷ La li suluk ma kuɗ minda valamɗin kayn mi sa kepe, nam ma vul ɦu-mee ta busata va' kepe, kay li ɗifin kay por sulukŋa.

²⁸ Mul-ma-ɗifinna ma li poora kay sa ma li suluk kuɗ minda valamɗina vok Ma-Vatɗina; hay li ma mul-ma-ɗifinna li poorawa kalamu, nam ma fi gida.

²⁹ Gatta ta tuni jargi kuɗ suluk ma bay-minda ma li jargi ŋray ca kay goora vi nagata, kay sa ma pul ma ka li ziy jargin kaw.

³⁰ May la mi goora vi nagata lebo sa ma pul jargi kaw, hay li ma nam li suluk ma iram kiramnawa nam ŋulum kayn mi Ma-Vatɗina, san kayni selem ma ka goy jar gurona vi Israyel.

³¹ Kay nam ɗuw yoboyna vi Ma-Vatɗin birek-ceke, nam raw gatta vi Ma-Vatɗin goyo, san ki kayn nala selem ma kaays goyo, nam ma ziy wurakŋa vi sulukŋa valamu.

Kitata vi sa ma raw gatta vi sabatna goyna

³² Hay li ma gurona vi Israyel ka hay fulda kayni, nisi fi san ay kepe, nam ka yaw gu-ma-ŋalla hay buur sabatna.

³³ Nisi sa fum yaw gun maram tam Musus, tam Aaron hiɗi tokŋ kaf.

³⁴ Nisi gum daŋgaya, kay gatta bay di kay va ma lum tam san ki kayn nala tuwa.

³⁵ Ma-Vatɗina di tam Musus: San kayni kitata valam ti mitta; nigi ma naram goy bugol guruna kay sumun kaf ma gum hiɗi goorhoyona.

³⁶ Nisi kaf tuɗum goy bugol guɗukŋa, nisi gum hiɗi goorhoyona, nam mita, ki Ma-Vatɗina vul hagata tam Musus nala.

³⁷ Ma-Vatɗina di tam Musus:

³⁸ Naŋ ma di tam gurona vi Israyel ala: Tam jafsi voksi ɗaw kayni, nisi ma kot vun sligara visi tisim-tisim, nigi ma cukum vun sligara vigi mi baraw ma tuwam zim-zimna.

³⁹ Hay li ma nigi cuk baraw ma tisim-tisimnawa hay vun sligara vigiya, nigi ma cuk irgi kalamu, nala humgi ma gigi kay vun-ma-gatna van kaf kay ŋomom kulo kigiya, nala nigi ma tap kuɗ varta vi dikgi loɗi, irgi ma nemgi hay law ma bay-ɗigera loɗi kaw.

⁴⁰ Nala humgi ma gigi kay vun-ma-gatna vanu, nigi ma ŋomom kulo kigiya, nigi ma lak peldete vok Lawna vigiya.

⁴¹ Nanu mi Ma-Vatɗina Lawna vigiya, ma yawgiyay goy hay nagata Egipte pa kay mus dok-dok Lawna vigiya, nanu mi Ma-Vatɗina, Lawna vigiya.