ŊAƁTA 12 - BIBALDA TA PELDETTA

Miriyam hiɗi Aaron ŋurnay hay Hatserot, Miriyam moy-kuturun co ta'a

¹ Miriyam hiɗi Aaron law tam Musus kay cat ta Etiopiyata ta nam sla'ta. Kay nam sli cat ta Etiopiyat kepe.

² Nisi di'e: Lawn law kayn hiɗi della vi Musus kep tuta su? Numa kaw nam asay a law hiɗi della vumaɗi su?

³ Ma-Vatɗin hum kayni. May Musus kayni, nam mi sa ma ŋalda valam suwi ŋolo, sa mara ma gaa kay nagat ki nalam nala mayɗi.

⁴ Wulin na kay' Ma-Vatɗina di tam Musus hiɗi Aaron hiɗi Miriyam ala: Nigi ɦidi kafe, tuɗgi kalaf hay guɗuk ma fi-tuwna. Nisi ɦidi kaf kaliya.

⁵ Ma-Vatɗina jik gaa hay ɗugul ma mokayna, nam col vun guɗukŋa, nam yi Aaron hiɗi Miriyam, nisi ma' pet ma goboyo.

⁶ Nam disiya: Humgi dita van ŋaa'a, hay li ma sa ma jobta ka jargiya, nan Ma-Vatɗina as vul tuwan kiramu lebo nan as law talam kayn hay duwayta.

⁷ May sa ma sunda vanu Musus nam may naɗi, nan hum kuɗan ŋolo jar sum sa hay ziyna van kafe.

⁸ Numa ka kasla vun tuwma'a, nan ɗek tuwan goy kiram haraŋi, nam ka wan jifanu, nigi may li nar kay law kat sa ma sunda van Mususɗi kay mige?

⁹ Ma-Vatɗin ka ɦiy ŋolo katsiya, nam kaliya.

¹⁰ Ɗugulla vi tuwam goy kay guɗukŋa. Ɗuw na kayni, Miriyam moy-kuturun jaŋa' dil', tuwa' nus goy haɓ kaŋ-kaŋ', Aaron muɗ iram kira' kayni; na' jaŋay kay moy-kuturun vatiya.

¹¹ Aaron di tam Musus: Wulin kayn numa muɗ tuwmaawa joo'o, may naŋ hinma ziy zumalda vi suluk ma numa lum hay ɦay-ɦayt kaynɗige!

¹² Hih! Naŋ ma hin Miriyam muɗ ki goor ma vuɗay goy hay sulum mitiya, galam hena goy loɗiya naɗige.

¹³ Musus siwel tam Ma-Vatɗina nam di'e: Ma-Vatɗin Lawna, nan siɗawaŋu, yera' goy yerge.

¹⁴ Ma-Vatɗina hot di tam Musus: La bu' tufa' nenen hay voka'a, na' as ziy zulot ir buur siɗiyaɗi kay mige? Nigi ma ga' vuna' kalaf ir buur siɗiya goy bugol guruna, bugol kayni nigi ma tapa' jargi may.

¹⁵ Nisi duk vun Miriyam kalaf ir buur siɗiya, goy bugol guruna, nisi may tuɗ voksi loɗi, ta-ta Miriyam hotay jarsi tuwa.

¹⁶ Bugol kayni nisi yaways hay Hatserot pa, tuɗ vi guruna visi hay fulda vi Paran.