NEHEMIYA 6 - BIBALDA TA PELDETTA

Nehemiya kol kay sumun sem mara lo

¹ Hay li ma Sanballat, Tobiya hiɗi Gesem ma Arabna hiɗi segen sa gaw kuma'na hum ala nan in gulmunnawa kulo'o, baŋa may hayam loɗi -- hay na'ta kayni nan bay pi cokoromna vi vun-ziyna gaa tuwa --

² Sanballat hiɗi Gesem gi sunday tanu kay dan ala: Naŋaya, lay ŋra-vunda hay Kefirim, hay lokŋa vi Ono. Nisi ŋray vunsiya kay lan joo'o.

³ Nan cuk sumun tisi hiɗi hot-dita kayni ala: Nan ka hiɗi lop ma ŋolo kay li'e, la nan tuɗisawa katgiya ni, lopn ɗawn ma cola kayn hay liyam su?

⁴ Nisi jok sunda ay ki kayn nala sem fiɗi. Nan hotsi dit ŋray ca hay liya'na dok-doko.

⁵ Sanballat jokan sun na'tiya lo selem ma vaslna, hay vun sa ma sunda valamu ma joriyona, goor namna letreta ka hay ɓalam hiɗi vuna' goy maliya.

⁶ Dota haya'ta ala: Labara ka mer goy jar jaf-sumuna, Gasmu ka di ala naŋ hiɗi sa Yudiyana nigi ka var kay fok lawta, ala kuɗ na'ta kayni naŋ ka in gulmunna, dit ka di ala naŋ ma muɗ mi mulla visiya.

⁷ Ala nan tun sa jobtawa hay Yerusalem kay siwel goy kaŋ ala: Mul kep tunawa hay Yuda. Wulin kayni, (la li ŋalɗi) labar ma ki kayn nala mulla ma humumu. Wulin kayni naŋaya, ŋray vunay kuɗ tuwaya.

⁸ Nan ka hotom sunda ala: Labar ma ki yawn nala may noŋɗi, niŋam kayn mi naŋ kay tuwaŋu.

⁹ Sum nisin kaf min muɗma nari, nisi var kayn ala: Numa ma muɗ maŋaya, numa ɗawn ma hin lopna. Hih! Lawna, wulin kayni naŋ muɗan dono muɗge.

¹⁰ Nan kalay vo vi Semayeya goora vi Delaya, goora vi Mehetabeel. Namu vunam duki kalafi, nam di ala: Tuɗay kuɗ tuwaya hay ziyna vi Lawna, hay jar Tempella; kay nisi ka co'o kay caŋ goyo, nisi ma co kay caŋ goy ɗawni hay henjeta.

¹¹ Nan hot dita: San ki nan nala pir jaŋi? Sa ma ki nan nala fi tuɗ kalafi hay Tempella kay suɗ irita vanu kayn litige? Nan as kal kalaf hay Tempellaɗi.

¹² Kay nan wi goy haraŋ ala gumi kayni may mi Lawnɗi, nam ka di vun-jobta kanu ki kayn nala kay mige Sanballat hiɗi Tobiya ɗutum hiɗi gurjuta.

¹³ Hay li ma nisi ɗutum ki kayn nala, nisi ka hiɗi varta ala nan ɗawn ma ɓola, nan ma tap kuɗ dita valamu, nan ma li suluku, nala nisi ɗawn ma tiyan sen goy joo'o kay muɗan zulo'o.

¹⁴ Naŋ Lawna vanu, humaŋ ma gaŋ kay Tobiya, Sanballat hiɗi lopna visiya, hiɗi Nowadiya ta jobta, hiɗi sa jobta segena sa gar kay muɗan nari.

¹⁵ Lopna vi gulmunna vat hay buur ma dok-ma' yam vaslna vi tilla vi Elul, lopna liy ir buur dok-vasl yam ma'.

¹⁶ Hay li ma sa gaw kuma'na kaf hum kayni, sa bay-vina, sa ŋuyi katmana kaf muɗi nari, nisi muɗi kir tuwsi zulo'o, nisi wi ala lopna li kayni hiɗi minda vi Lawna vuma'a.

¹⁷ Hay buur na'ta kayni, sum sa ŋulona vi Yuda segen ka'a, nisi ka ɗo ɗerwelda dok-dok tam Tobiya, ɗota vi Tobiya kaw ka co katsiya.

¹⁸ Kay sumun ŋolo hay Yuda va yiy kisiya kuɗ bonota ta juni jarsiya hiɗi namta, lo kay nam mi kuno Sekaniya goora vi Arah, goora valam Yohanan kaw sli goota vi Mesullam goora vi Berekiya.

¹⁹ Nisi di sle ma ŋaan kalamu vok iranu kaw, nisi ka tuɗum law ma nan dumna kaw. Tobiya ka ɗo ɗerwelda aya kay muɗan nari.