NEHEMIYA 2 - BIBALDA TA PELDETTA

Nehemiya co hay Yerusalem

¹ Hay tilla vi Nisan, hay busata dok-ma'ta vi mulla Artakserses, (fat tara'a) sle ma tin ka lakay vokomu, nan sli vinna, nan vulum mi mulla, buur mara kep kaw nan bay col vok iram hiɗi yorta ki kayn nala tuwa.

² Mulla di tanu: Vokaŋ ka turkusiya kay mige? Naŋ may moyɗi lay; kayni mi yorta vi dikga ɦawa klasige. Hay na'ta nan muɗi nar ŋolo.

³ Nan hot dit tam mulla: Mulla, Lawn vulaŋ buura! Saraŋ tige! Hoyok-ziy ma yam-us sumiyan ka hayna ɦoy gaa'a, vun-galana valamu ŋalay goy kay kuta kaw, nala vokan as muɗ turkusiɗi kay mige?

⁴ Nala mulla di tanu: Wulini naŋ jobom kayn mi mige? Nan siɗaw Lawn ma dukalawna,

⁵ nan hot dit tam mulla: La naŋ mulla mina, la nan sa ma sunda vaŋu min fi slugot vok iraŋu, naŋ ma hinan tuɗ hay Yuda, kat hoyok-ziyna ma yam-us sumiyan ka hayna, kay nan min inim kulo'o lo.

⁶ Hay na'ta ca-mulda ka musi gaa galam dam', nam ka di tan ala: Rogoyta vaŋ ma mus atage? Naŋ ma hotay lancitige? Mulla dikam li ŋaa'a kay hinan tuɗa, nan dum kay ŋaɓta vi buura ma nan min lumi ɗawni.

⁷ Nan hot di mulla lo: La vaŋ kayni kiraŋ ŋaa'a, naŋ ma ɗon ɗerwel hay ɓanu tam guvernera sa goy bugol vi niy-lumna, kay nisi ma hinan jik hay nagata visiya ta-ta nan co hay Yuda,

⁸ naŋ ma vulan ɗerwel tam Asaf ma ŋom juruta vi mulla kep kaw, kay nam ma vulan guna kay kot vun-galana vi ziyna ma goboy hiɗi Tempella, kay kot gulmunna vi hoyok-ziyna hiɗi ziyda ta nan min mus haya. Mulla vulanta, kay ɓam ma gaŋeraŋa vi Lawna vanu ka koɗi kanu.

⁹ Nan kalay kat guvernera vi nagata ta goy gal hena vi niy-lumna, nan vulsi ɗerwelda vi mulla. Mulla cuk sa ŋulona vi sojena hiɗi sa ɓe kulumayn kuɗanu.

¹⁰ Hay li ma Sanballat ma Horonitna hiɗi Tobiya ma sunda ma Amonna hum kayni, diksi ɓulak ŋolo kay a san kep co'o kay gar kay li ŋaata tam gurona vi Israyel.

¹¹ Nan co hay Yerusalem, ɗawni nan li buur ɦidi.

¹² Bugolda nan fok kulo'o hay henjeta hiɗi sum sara kuɗanu, va ma Lawna vanu ɗek hay dikanu kay lum tam Yerusalem nan min dum goy mi saɗi. Va mara may kuɗanɗi, may mi kuro ma nan ɓe kalamna kep tuta.

¹³ Nan kalay goy hay henjeta hay vun-galana vi lokŋa, hay hagata vi kaara vi gana-ganna gal vun-galana vi zigidikŋa, nan ka peɗ gulmunna vi Yerusalem ma ɦoy gaana, hiɗi ma ŋalay kay kuta.

¹⁴ Nan jik goboy kat kaata vi vun-galana, goboy kat goloŋga vi mulla, liyn ma kurota ta nan ɓey ka'ta jik haya mayɗi.

¹⁵ Nala hay henjeta nan jik hay holokŋa, nan peɗ gulmunna. Bugolda nan jik hay vun-galana vi lokŋa, nan hotay vo'o.

¹⁶ Sa ɗiger-lawta may wi liyn ma nan kal haynɗi, wi va ma nan liɗi kaw. Kay ta-ta wulini nan bay di va tam sa Yudiyan tuwa, tam muliyan-sa-ɗifinnaɗi kaw, tam sa ŋulonɗi kaw, tam sa ɗiger-lawtɗi kaw, tam segena sa ka hiɗi lop hay ɓisinɗi kaw.

¹⁷ Nan di tisiya: Nigi wi lasta ta nay ka haya'ta, Yerusalem ɦoy gaa'a, vun-galana va' ŋalay goy kay kuta. Nigiyaya, inay gulmunna vi Yerusalem kulo'o lo, nala nay ma lak hay zulot loɗi.

¹⁸ Nan disi labara ala ir nanige ɓam ma donona vi Lawna van ay kanu, ir nanige mulla kus yoboyn tanu kaw. Nisi di'e: Yaway kulo'o, inay liyna. Nisi sli lopn kayn kulo'o hiɗi dono'o.

¹⁹ Sanballat ma Horonitna, Tobiya ma sunda ma Amonna, Gesem ma Arabna, hay li ma nisi hum kayni, nisi tun caw burahma'a, tun caw cen kuɗma'a kaw. Nisi di'e: Nigi lum lakŋ mi mige? Nigi yaw kulo'o kat mulla su?

²⁰ Nan hotsi dit ala: Lawn ma wuralawn ma vulma kolda, numa sa sunda valamu, numa ma yaw kulo'o, numa ma in gulmunna, may nigiya, galla vigi may hay kaynɗi, lawta vigi may hay kaynɗi, va ma humgi as gigi kalam hay Yerusalem mayɗi kaw.