MIKKA 3 - BIBALDA TA PELDETTA

Joota vi sa ŋolona vi Israyel

¹ Humgiya, nigi sa ŋulona vi Yakub, nigi sa yerimana hay ziyna vi Israyel, lopna vigi kayni kay nigi ma di kay ɗigerta ɗisu?

² Nigi ka gaw tam gasita, nigi mina' ti joota, nigi sa jet bak sumun goyo, jetsi sliwsi goyo hinim mi zokŋa.

³ Awa, nisi mut sliw sumuna vanu, jetsi baksi goyo, kussi zoksi goyo; nisi cawsi sliwsi goyo, ki sliw ma tunum hay doŋolayta nala, ki sliwn ma ka zal nala.

⁴ Ki kayn nala nisi ma siwel tam Ma-Vatɗina; may nam ma hotsi ditɗi; hay buur namna ɗawni, nam ma ŋay iram goy kisiya, kay nisi li lop ma joonawa.

⁵ Humgi va ma Ma-Vatɗina min di'e kay sa jobta sa viy sumuna van goyo, nisi law ala sle'ta ka co'o, la va ma pasl ka vunsiya, may nisi di ala duur ka goboyo. Tam nisi sa vulsi va ma tiɗina.

⁶ Kuɗ kayni, liyn ma muɗ tigi henje'e, irgi ma wi ɗekka loɗi, liyn ma muɗ tigi jufunu, nigi ma di law ma vokgin loɗi, fatta ma ɗig gaa'a kay sa jobta nisina, falayta ma muɗ jufun kisiya.

⁷ Nisi sa wi sle ma voksina ma muɗ zulo'o, sa di gireyta ma vat goy waa'a, nisi kaf ma ŋay voksiya, kay Lawn ma hotsi dit loɗi.

⁸ May nanu, nan hobay hiɗi donota, kuɗ Ŋusta vi Lawna, nan hobay hiɗi ɗigerta hiɗi kursulita kaw, kay di tam gurona vi Yakub kay jiw-zlata visiya, kay di tam gurona vi Israyel kay sulukŋa visiya.

⁹ Humgi labar kayni, nigi sa ŋulona hay jafna vi Yakub, nigi sa yerimana hay ziyna vi Israyel, nigi sa gaw hiɗi ɗigerta, nigi sa gun law ma ɗigera,

¹⁰ nigi sa in Siyon kulo hiɗi busuwna, sa in Yerusalem kulo hiɗi jiw-zlata.

¹¹ Sa ŋulona vigiya ka kitat kuɗ gurjuta, muliyan-sa-ɗifinna hat kay wurakŋa, sa jobta vigi di law ma voksin kuɗ gurjuta, nisi tun sem Lawn voksiya, nisi di ala Ma-vatɗin may jarma damɗi su? Joo mara ma as fuma mayɗi.

¹² Ki kayn nala kuɗgi nigiya, Siyon ma zumis goyo ki sinen nala. Yerusalem ma muɗ goy goorhoyo'o, jurun ma si kulo'o kat hiɗiy ma tam Tempella.