MATEWUS 8 - BIBALDA TA PELDETTA

ƊEKKA TARA'A TARA'A Yer-goyta vi sa ma moy-kuturuna

¹ Hay li ma Yesu jikay gaa kay hiɗiyta pa jikŋa, sumun ŋolo tap kuɗumu.

² Sa ma kuturuna ma talamu, girif gaa vokomu di'e: Bum-Sumuna, la naŋ mina, naŋ yeran goy yerge!

³ Yesu meɗ ɓalam goyo, jomu di'e: Nan mina, yeraŋ goyo. Wulini wulini nam yeray goyo kay moy-kuturuna.

⁴ Yesu dumu: Naŋ ma li ŋali kay di kayni goy mi saɗi, may tuɗaŋu ɗekaŋ tuwaŋ kir mul-ma-ɗifinna, laŋ ɗifini ki gatta vi Musus di nala, kay kayni ma li di-goyt tisiya.

Yer-goyta vi sa ma sunda vi sa ma sojen kalam kisna

⁵ May hay li ma Yesu kal hay Kapernawum, sa ŋolla ma sojen kalam kisna ma talamu,

⁶ siɗawamu di'e: Bum-Sumuna, sa ma sunda vanu ay gaa vo buri waŋ', nam toy gaa hurɓuliya, nam ka las ŋolo kaw.

⁷ Yesu dumu: Nan min tuɗis kay muɗum goy ŋaa'a.

⁸ May sa ŋol ma sojen kalam kisna hot dita di'e: Bum-Sumuna nan nagay kay naŋ kal vo vanɗi, may la naŋ di yoboyn ay kep ɦawa kaw, goora van as muɗ goy ŋaa'a.

⁹ Kay nan kaw mi sa ma gaa kuɗ gaŋeraŋa vi sa mara'a, may sojena ka gaa kuɗ gaŋeraŋa vanu kaw. La nan di tam soje mara'a ala tuɗaŋu, nam tuɗa, la nan di tam hen ala naŋaya, nam ma'a, la nan di tam sa ma sunda van ala laŋ van kayni, nam as lumu may.

¹⁰ May hay li ma Yesu hum kayni, nam muɗ ɦuyum', nam di tam sa tapay kuɗumna ala: Nan digi gasita, vida ta ŋol ki kayn nala nan bay fa' hay sa tuwa, jar sa Israyel kaw nan bay fa' tuwa.

¹¹ May nan digi ala sumun ŋolo ma may gal kuɗuwu hiɗi gal vulatiya pa, nisi ma lak ti'e hiɗi Abraham, hiɗi Isaak, hiɗi Yakub hay mulda-Lawna.

¹² May gurona vi mulda ma cukis goy hay jufunda, hay li ma nisi ma tiya, mut siysiya kaw.

¹³ Yesu di tam sa ŋolla ma sojen kalam kisna: Tuɗaŋ maŋu, van ma li taŋu ki naŋ vi'e nala. Sa ma sunda valamu muɗi goy ŋaa'a hay na'ta.

Yer-goyta mara'a mara'a

¹⁴ Hay li ma Yesu co vo hay ziyna vi Peter, nam fi kuno Peterta buri moyo, kay tuwa' zumaliya.

¹⁵ Nam jo' ɓa'a, moyna hina'a, na' fok kulo'o, tun caw sunumu may.

¹⁶ Hay li ma vulatita coowa, nisi mar talamu sa fuliyan kisi ŋolla, nam digiɗ fuliyan goyo hiɗi yoboyna valamu, sa moyna kaw nam muɗsi goy ŋaa'a.

¹⁷ Kay hob vun dita vi sa ma jobta-Lawna Esaya, ta di ala: Nam yaw maŋga vaya kalamu, nam ziy moyna vaya kaw.

Tap kuɗ Yesu ir taptige?

¹⁸ Hay li ma Yesu wi sumuna ŋuyi talam ŋolo, nam vul hagata kay nisi ma tuɗ kulo gal hena.

¹⁹ Sa ma wi ɗota ma talamu di'e: Bum-yalla, nan min tap kuɗaŋu hay liyn arige pet ma naŋ min tuɗ haya.

²⁰ Yesu dumu: Cekemna zulla valam ka'a, layayn ma dukalawna tokosayna valam ka'a kaw, may goora vi sana va ma nam fi deŋ yalam talam mayɗi.

²¹ Sa mara kep jar sa hatayna di talamu: Bum-yalla, hinan tuɗ pi bun ay goy jew pit'.

²² May Yesu dumu: Tapaŋay kuɗanu, hin sa mitina pi sa mitina visiya.

Yesu ci vun birin gaa'a

²³ May hay li ma nam kal hay lumna, sa hatayna valamu tapay kuɗumu.

²⁴ Ɗuw na kayni, simeɗna tun caw biw ŋolo kay niyna, billa min hob lumna hiɗi niyna. May nam buri sene.

²⁵ Nisi ma talamu, zliyim kulo'o dumu: Bum-sumuna, suɗma suɗge, numa min sir goloŋo.

²⁶ Nam disiya: nigi li nari kay mige? Nigi sa vida vigi kiɗayna! Nam fok kulo'o, ci vun birina hiɗi niyna kaw, wulini wulini liyn tun gaa kiliŋ.

²⁷ sumun muɗ ɦuyum', nisi di'e: Sa namna ma birina hiɗi niyna gat kuɗum kayni mi sa mige?

Sum sa ful kisin ma' yer goyo

²⁸ Hay li ma nam co goy gal hena hay nagata vi sa Gadarenena, nam ŋaf hiɗi sumun ma' sa fuliyan kisina, nisi kalay goy hay zul pa, nisi co ŋafam iramu. Sumun muɗi nar kisi ŋolo, ta-ta muɗ kayni sa jik hay hagata na'ta noŋɗi.

²⁹ Nisi ka siwel talam ala: Naŋ min lum tuma'a mi mige, naŋ goora vi Lawna? Naŋ co tan kayni kay lasma jew liyn su?

³⁰ Bagumna fara ɗaw lakay ti hatna goy gine'e hiɗi nisiya.

³¹ Fuliyan joona siɗawamu di'e: la naŋ min digiɗma goyo, bagumna fara kla' kayni hinma cuk hayam cukge.

³² Nam disiya: Tuɗgiya! Nam cukay goyo, cuk hay bagumna, ɗuw na kayni, farana vi bagumna patay jaŋi gaa hay boŋoloŋŋa, koy goloŋo, capi mitiya may.

³³ Sa ŋom bagumna pir jaŋi hay hoyok-ziyna, nisi di sle namna goy pet, slen ma li tam sa ful kisina kaw.

³⁴ Ki kayn nala sum sa hay hoyok-ziyn kaf cukay goyo kay ŋaf ir Yesu, hay li ma nisi wumu, nisi siɗawamu kay nam ma tuɗ goyo, hin nagata visiya.