MATEWUS 7 - BIBALDA TA PELDETTA

Kitata, siɗawta

¹ Kaagi kitatɗi, kay kitat ma kaays kigi nigiɗi kaw.

² Kay kitata ma kaays kigiya hiɗi kitata ta nigi ka'ta, dutta-kusta ta nigi li ŋaɓta hiɗi na'ta kayni ma ŋaɓgi hiɗi na'a kaw.

³ Naŋ wi usna ma ka nigiy kir ɓasuŋŋa, may gu-malla ma ka kiraŋ naŋŋa naŋ wumɗi kay mige?

⁴ Naŋ fi di tam ɓasuŋŋa ala hinan sli us ma kiraŋŋa goyo, may gu-malla ma ka kiraŋ naŋŋa naŋ wumɗi may nanige?

⁵ Naŋ sa ma milena, slaŋ gu-malla goy hay iraŋ naŋ jewe, bugolda naŋ muɗ wi goy haraŋi kay sli usna goy hay ir ɓasuŋŋa.

⁶ Vulgi sle ma peldetna mi durnaynɗi, cuk kermena vigi gaa vok bagumnaɗi kaw, kay la naɗi nam ɗawn ma tayam gaa kuɗ selemu, muɗ kigiya, vurumgiya kaw.

⁷ Siɗawgiya, slen ma vulis tigiya; gargiya, nigi ma fi'e; dabgiya, vun-ziyn ma malis goy kigiya kaw.

⁸ Kay gigekaw ma siɗawa fi'e, sa ma gara fi'e, sa ma daba, vun-ziyn mal goy kalamu kaw.

⁹ Sa jargiya ma min vul hiɗiyn mi goora valamu hay li ma goora valam siɗawam kay funa ka su?

¹⁰ Lebo nam as vulum guyna hay li ma nam siɗawam kay kulufna su?

¹¹ Kay na'ta la nigi sa joon kaw wi yal kay vul sle ma ŋaana mi gurona vigiya, nala kaw bugi ma hay wuralawna ma vul sle ma ŋaana mi nisi sa siɗawamna suwa sem gaage?

Lita kuɗ yoboyna

¹² Kay na'ta slen pet ma nigi min ala sumun ma lum tigiya na, nigi ma lum tisi nala kaw, kay kayni mi va ma vun-ma-gatna hiɗi sa jobta-Lawna dumna.

¹³ Cukgi kalafi hay vun-gala ma hebayna, kay vun-gala ma kal hay ba-goyta nam ŋol hiriŋ', hagata ta kal hayta beɗay kaw, nisi sa cuk hayamna ka ŋolo.

¹⁴ May vun-gala ma kal hay irita nam hebiya, hagata ta kal haya na' zeh-zeh' kaw, nisi sa fumna ka kiɗaya.

¹⁵ Ŋomgi tuwgi ŋaa'a kay sa jobta-Lawna sa sinda, nisi sa co tigiya hiɗi sligara vi fok-dimina, may haysi kalafi mi hotna ma gawta.

¹⁶ Nigi ma wisi ɗawni kuɗ lopna visiya, sa fi ja vuɗna vi gu gulda-guldana goy hay hum gu-zigiyna pa su? Lebo san fi ja vuɗ gu-gumna goy hay zigiy-olla pa su?

¹⁷ Nala kaw gu ma ŋaana vuɗum mi vuɗ-gu ma ŋaana, gu ma joona vuɗum mi vuɗ-gu ma joona may.

¹⁸ Gu ma ŋaana fi vuɗ vuɗ-gu ma joonɗi, gu ma joona fi vuɗ vuɗ-gu ma ŋaanɗi kaw.

¹⁹ Gun kaf ma vuɗ vuɗ-gu ma ŋaanɗi, nam ma kaam goyo, gum hay kuta kaw.

²⁰ Kay na'ta nigi ma wisiya kuɗ lopna visiya.

²¹ Nisi sa yan ala Bum-Sumuna Bum-Sumuna kaf zawni as kal hay mulda-wuralawn kafɗi, may kal haya' ɗawni si nisi sa li minda vi bunu ma hay wuralawna tuta.

²² Hay buur namna ɗawni, sumun ŋolo ma dan ala Bum-Sumuna, Bum-Sumuna, numa kus yoboyn kay sle ma vokayna hiɗi semda vaŋu, numa digiɗ fuliyan goyo hiɗi semda vaŋu, numa li ɗekka ŋolo hiɗi semda vaŋu kaw ɗisu?

²³ Hay na'ta nan ma disiya: Nan may wigi noŋɗi, patgi goyo hinanu, nigi sa li jiw-zlata.

²⁴ Kay na'ta gigekaw ma hum yoboyna vanu, li kuɗum kaw, nam ŋray ca ki sa ma in ziyna valamu kulo kay hiɗiyta nala:

²⁵ Niyn si ŋolo, niy-ɓatna ma'a, birina li kaw, wat ziyna, may nam ɦo gaaɗi, kay sem-ziyna tuni kay hiɗiyta.

²⁶ May gigekaw ma hum yoboyna vanu, may la nam li kuɗumɗi, nam ŋray ca ki sa ma bay-yalla ma in ziyna valamu kay ŋeslna nala:

²⁷ Niyn si ŋolo, niy-ɓatna ma'a, birina li kaw, wat ziyna, nam ɦo gaa'a, ɓulakka valamu li ŋolo.

²⁸ Hay li ma Yesu vat hatta valam vatna, sumun kaf lak ɦuyum' jiɓer kay hatta valamu.

²⁹ Kay nam hatsi kayni ki sa ma donot kuɗum nala, may ki sumuna visi sa wi ɗota naɗi.