MATEWUS 6 - BIBALDA TA PELDETTA

Law kay vulda tam sa hawna, siɗawta, vulda-gida, laata

¹ Ŋomgi tuwgi ŋaa'a kay nigi ma li ɗigerta vigiya kir sumuna a nisi ma wigiyaɗi, kay la naɗina, nigi ma fi wurakŋa hay ɓam bugiya ma hay wuralawnɗi.

² Hay li ma nigi min vul va goyo, hinsi buw togolomna vokgiɗi, sa milena ka li ki kayn nala vun sinagogayna, hay hagana kaw kayn kay sumuna ma subursiya. Nan digi gasita: Nisi fi wurakŋa visi vatawa.

³ May hay li ma naŋ vul va goyo, hin ɓaŋ ma gulla wi va ma ɓaŋ ma jufna liɗi,

⁴ Kay vulda vaŋu ma li goy ŋayaya, buŋu ma wi kayni goy ŋayaya ma wurakaŋ goy haraŋi kaw.

⁵ Hay li ma nigi siɗawa, nigi ma li ki sa milena ka li naɗi, Nisi min siɗaw kulo coli hay sinagogayna, goy gaŋ hagana vi hoyok-ziyna kaw kay sumun ma ɗuwsiya. Nan digi gasita, nisi fi wurakŋa visi vatawa.

⁶ May hay li ma naŋ siɗawa, tuɗaŋ ŋayaŋ kalaf hay ziyda, dukaŋ vun-ziyn kulo kaŋu, naŋ ma siɗaw buŋu ma ka goy ŋayaya, nam ma wurakaŋu goy haraŋi.

⁷ Hay li ma nigi siɗawa, nigi ma di yoboyn dak-dak ki sa waan naɗi, kay nisi var ala Lawn humsi ɗawn kuɗ yoboy ma nisi dum hay siɗawt ŋol dak-dakŋa.

⁸ Kay na'ta nigi ma li ki nisi naɗi, kay bugi wi sle ma ŋom ŋil tuwgi petna jew a nigi siɗawamu.

⁹ Kay na'ta siɗawta vigi ma li ki kayn nala: Buma'a hay wuralawna,

¹⁰ Hin semda vaŋu li goy peldete, Hin mulda vaŋu ma'a; Hin minda vaŋu li gaa kay nagata, Ki naŋ la' hay wuralawna nala kaw,

¹¹ Vulma tina vuma'a ma numa tum vaydina,

¹² Vulma gida kay sulukŋa vuma ta', ki numa vul gida mi sa li suluk katma nala kaw.

¹³ Hinma cuk hay nemdaɗi, may suɗma goyo hay joota suɗu. Kay mulda kaw vaŋu, gaŋeraŋa kaw vaŋu, ŋolda kaw vaŋu ta-ta hay vatɗita. Amen.

¹⁴ Kay la nigi vul gida mi sumuna kay sulukŋa visiya, bugiya ma hay wuralawna ma vulgi gida kaw,

¹⁵ may la nigi vul gida mi sumunɗi, bugiya ma vulgi gida kay sulukŋa vigiɗi kaw.

¹⁶ Hay li ma nigi li laata, nigi ma liwek irgi ki sa milena naɗi, nisi kirap irsi kulo kayni kay sumun ma wi ala nisi ka li laata, may nan digi gasita, nisi fi wurakŋa visi vatawa.

¹⁷ May naŋu hay li ma naŋ li laata, setaŋ yaŋ hiɗi mula, muz iraŋ goyo kaw.

¹⁸ Kay naŋ li laat kayni may kir sumunɗi, may kir buŋu ma ka goy ŋayaya, buŋu ma wi kayni goy ŋayaya ma wurakaŋu.

Faray ma gasina

¹⁹ Tokgi farayn kigiya hay nagatɗi, hay li ma fotna fi tumu, hay li ma nam as saŋa, hay li ma kulla co kalafi kay kula kaw.

²⁰ May tokgi farayn kulo'o hay wuralawna, hay li ma fotna as tumɗi, nam as saŋɗi, hay li ma kulla co kalafi kay kulɗi may.

²¹ Kay hay liy ma farayna vaŋ ka haya, dikaŋ min mus kayn hay liy namna kaw.

²² Ira kayni mi fitilla vi tuwna, la iraŋ ka goy ŋaa'a, tuwaŋ pet ma hob hiɗi haraŋa.

²³ May la iraŋ moyo, tuwaŋ pet muɗ jufunu may. La haraŋ ma hayaŋŋa muɗ jufunu, jufunda ma li ŋolo sem gaage?

²⁴ Sa ma kepna fi sun muliyan ma'ɗi, kay la nanige kaw nam as ka gaw tam hena, min hena may, tap hiɗi ma kepna, ɗuw hena birek-ceke may. Nigi fi sun Lawna hiɗi Mamon ma' petɗi.

²⁵ Kay na'ta nan digiya, yorgi tuwgi kay irita vigiɗi, yorgi tuwgi kay va ma nigi ma tumnaɗi, yorgi tuwgi kay sligar ma nigi ma cukum tiginaɗi kaw. Irita kayni ŋol suw tin ɗisu? Tuwn kaw suw sligara ɗisu?

²⁶ Ɗuwgi layayn ma dukalawn tige, nam was jafɗi, fe'ɗi, cuk va hay feeraɗi kaw, may bugi ma hay wuralawna vulum tina valamu. Nigi suw layayn hiɗi ŋoldaɗi su?

²⁷ Jargi kayni, la san yor tuwam ŋol nanige kaw, nam as ɦur buura vi irita valam voko ir goldoŋ kep su?

²⁸ Nigi yor tuwgi kay sligara kay mige? Sargi tayna ka wul hay sinena tige: Nam li lopɗi, nam duɓar barawɗi kaw;

²⁹ may nan fi digi ala Salomon hay gajijita valam pet kaw, bay gan tuwam ki tayna nala tuwa.

³⁰ May la Lawna cuk sligara nala tam us ma hay sinena ma vaydi colay zawni kay gum goy hay kut jifini, nam ma cuk sligar tigi nigi suwɗi su? Nigi sa vida vigi kiɗayna!

³¹ Kay na'ta yorgi tuwgiɗi, digi ala numa ma tum mige? Numa ma cum mige? Numa ma cukum sligar mige? Digi naɗi.

³² Kay slen kayni garam si sum sa waana, may bugi ma hay wuralawna wi ala nigi minimu.

³³ May gargi mulda-Lawna hiɗi ɗigerta valamu jewe, bugolda nam ma tapgi sle hen kaf kuɗum kaw.

³⁴ Kay na'ta yorgi tuwgi kay jifintaɗi, hin jifinta yor tuwa' kay tuwa' ɗeŋe. Buur tarige kaw as ziy zumalda va' kay tuwa'a tuwa'a.