MATEWUS 4 - BIBALDA TA PELDETTA

Matna nem Yesu Kristu

¹ Kay na'ta Ŋusta kal Yesu goy hay fulda kay Matna ma nememu.

² Nam li laata ir buur dok-fiɗi': falayta hiɗi henjeta kaw, bugol kayni mayta tun caw cumu.

³ Bum-nemda co talamu dum ala: La naŋ mi goora vi Lawna ni, vulaŋ hagat tam hiɗiyn lakŋi kay nam ma muɗ goy fuwa.

⁴ Yesu hot dita: ɗot ɗo'ay ala: Sana mus iriya kay fu ɦawaɗi, may kay yoboyn kaf ma may goy hay vun Lawna pa.

⁵ Bugol kayni Matna kalam kulo hay hoyok-ziy ma peldetna, nam musum kulo kay yam Tempella,

⁶ ka dum ala: La naŋu mi goora vi Lawna, gaŋ tuwaŋis gaa'a, kay ɗot ɗo'ay ala: Nam ma vul hagata tam sa sunda-wuralawna valamu, Nisi ma ziyaŋ kulo'o hay ɓisiya, Kay seŋ ma dab tam hiɗiyn noŋɗi.

⁷ Yesu dumu: ɗot ɗo'ay ala: Naŋ ma nem Bum-Sumuna Lawna vaŋɗi.

⁸ Lo Matna slumu, kalam kulo kay hiɗiyta ta fiyok ŋolta, ɗekem kay mulda ta kay nagat kafe, hiɗi gajijita va'a kaw,

⁹ ka dum ala: Slen kayni kaf nan ma vulaŋga, la naŋ guɗof gaa vokanu kay girifanu.

¹⁰ Yesu dumu: Tuɗaŋis goyo Satan, kay ɗot ɗo'ay ala: Naŋ ma girifim mi Bum-Sumuna Lawna vaŋu, naŋ ma sunumtin mi nam kepe.

¹¹ Hay na'ta Matna hinimu, sunda-wuralawna ma talamu kay sunumu may.

Yesu hay Kapernawum, yita vi sa hatayna sa fiɗina

¹² Hay li ma Yesu hum ala nisi gi Yohanawa daŋgaya, nam kal goy hay Galileya.

¹³ Nam hin Nasaret, co mus hay Kapernawum, ta ka goboy hiɗi niy-lum ma ŋolla, jar nagata vi Zabulon hiɗi Neftali.

¹⁴ Kay hob vun dita vi Esaya ma jobta ta di ala:

¹⁵ Nagata vi Zabulon hiɗi nagat vi Neftali, Gal niy-lumna goy bugol Yordan, Galileya vi sum sa waana,

¹⁶ Sumuna sa lakay hay jufunda wi haraŋ ma ŋolla, Nisi sa lakay hay nagata hiɗi ŋus-mitta kaw, Haraŋa foowa goy kisiya.

¹⁷ Hay na'ta pa Yesu tun caw kus yoboyn ala: Hamgiya, kay mulda-wuralawna maawa goboyo.

¹⁸ Hay li ma nam ka poy kel niy-lumna Galileya, nam wi ɓosiyom-tuwsin ma': Simon ma yum Peter, hiɗi ɓasulumna Andre, nisi ka cuk luwanna visi goloŋo, kay nisi si sum sa ciwna.

¹⁹ Nam disiya: Tapgiyay kuɗanu, kay nan min muɗgi goy si sa ciw sumuna.

²⁰ Wulini wulini nisi hin luwanna visiya, tapay kuɗumu.

²¹ Hay li ma nam raw vokomu, nam wi ɓosiyom-tuwsi segen ma' lo, Yakub goora vi Sebedew hiɗi ɓasulumna Yohana ka lakay hay lumda hiɗi busi Sebedew lak' kay taɓ ir luwanna visiya.

²² Nam yisiya, wulini wulini nisi hin lumda hiɗi busiya, tapay kuɗumu.

²³ Yesu poy hay Galileya pet, nam hat hay sinagogayna visiya, kus labara ma firina vi mulda, sa moyna hiɗi sa maŋayna jar sumun kaf nam muɗsi goy ŋaa'a.

²⁴ Labara valam mer goy hay Siriya noŋ kaf, nisi mar talamu sumun kaf sa las kuɗ moyna hiɗi tuw-tita tara'a tara'a, sa fuliyan kisina, sa ul cisina hiɗi sa dirlayna kaw. Nisi kaf nam muɗsi goy ŋaa'a.

²⁵ Sumun ŋolo tuɗ kuɗumu, sa hay Galileya hiɗi Dekapolis, hiɗi Yerusalem, hiɗi Yudiya, hiɗi nagat goy bugol Yordan kaw.