MATEWUS 3 - BIBALDA TA PELDETTA

Kusta vi Yohana ma Baptisma

¹ Hay li namna Yohana ma Baptisma co'o, nam tun caw kus yoboyna hay fulda vi Yuda.

² Nam di'e: Hamgiya, kay mulda-wuralawna maawa goboyo.

³ Nam kayni mi ma Esaya ma jobta-Lawna di goy kalam ala: Del sana ma siwel hay fulda, pargi hagata vi Bum-sumuna goyo, Moɗgi hagata valam ta gurayta goyo kaw.

⁴ May Yohana sligara valamu mi ɗuŋus lamgana, kanti ma juni furamna mi ɗigiyna may, tina valamu mi baara hiɗi yumda hay fulda.

⁵ Sum sa hay Yerusalem, sum sa hay Yuda hiɗi nagata vi Yordan kaf co talamu,

⁶ nam lisi baptisma hay niy-lumna Yordan, hay li ma nisi ham sulukŋa visi goy hamna.

⁷ May hay li ma nam wi sa Farisena hiɗi sa Sadusena ŋolo ma talamu kay fi baptisma, nam di tisiya: Nigi jafna vi guyna, sa ma hatgi kay pir kay ɦiyda ta min maat ɗawni mi gige?

⁸ Kay na'ta, ligi lopna ma ŋray hiɗi hamda,

⁹ vargi hay dikgi ala bugiya mi Abraham, vargi naɗi, kay nan fi digi ala, Lawna as yaw kuɗ goorhoyon lakŋi kay muɗum goy guro'o mi Abraham.

¹⁰ Wulini ceɗna buri gaa zok guna, kay na'ta gu ma vuɗ vuɗ ma ŋaanɗina ma kaamis goyo, gumis hay kuta kaw.

¹¹ Nanu, nan ligi baptisma hiɗi niyna kay hamda, may nam ma co bugolan nan ɗawni, nam dono suwan nanu, tuguruna valam kaw nan may nagay kay ziyim noŋɗi. Nam ma ligi baptisma hiɗi Ŋusta-Peldetta, hiɗi kuta kaw.

¹² Dutta-siira valamu ka hay ɓalamu, nam ma tor muɗakŋa valam goyo, alkamarena nam ma kom hay feera, may burana nam ma ŋalam goyo hiɗi kuta tewɗita.

Baptisma vi Yesu

¹³ Hay na'ta Yesu may hay Galileya pa, nam co tam Yohana kel niy-lumna Yordan, kay Yohana ma lum baptisma.

¹⁴ May Yohana ci way hiɗi nam ŋolo ala: ŋaata naŋ lan nan baptisma, may naŋ co tanu kay nan ma laŋ baptisma kayn litige?

¹⁵ Yesu hotom dita: Hinaŋ slen li nala wulini, kay nay ma li slen pet hay liyam ɗigere. Kay na'ta Yohana li Yesu baptisma.

¹⁶ May hay li ma Yesu fi baptisma fina, hay li ma nam jikay goy hay niyn pa jikŋa, wulini wulini wuralawna mal goy kalamu, nam wi Ŋusta vi Lawna siray gaa kalamu ki gukka nala.

¹⁷ Ɗuw na kayni, del may goy wuralawn pa ka di ala: Zawni mi goora vanu ma hayan kamna, ma kiran ŋaa'a ŋolo.