MATEWUS 26 - BIBALDA TA PELDETTA

Nisi gar kay ci Yesu goyo

¹ Van li nala hay li ma Yesu vat yoboyna kaf vatna, nam di tam sa hatayna valamu:

² Nigi wi ala hini buur ma' Paskana ma li'e, hay na'ta nisi ma vul goora vi sana goyo kay ɓalam kat grakŋa.

³ Hay na'ta muliyan ŋulo sa-ɗifinna, hiɗi sa maariyana vi sumuna tok tuwsi hay wur-daŋŋa vi mul ŋol ma-ɗifinna ma yum Kayfas,

⁴ nisi ŋra vunsiya kay nisi min vi Yesu hiɗi yali, cum goyo kaw.

⁵ May nisi di'e: Vum hay buura vi yuldetaɗi, kay sumuna ɗawn ma ɦilay kulo jar-tuwsiya.

Doŋdoloŋ ta hiɗi mul-urdina

⁶ May hay li ma Yesu co hay Betaniya hay ziyna vi Simon ma moy-kuturuna,

⁷ Cat kepe ma talamu, doŋdoloŋ tara ka hay ba' kepe, hobay ŋub' hiɗi mul-urdina ma gusta valamu lop ŋolo, hay li ma nisi ka ti'e, na' ɦok mul namna kay Yesu.

⁸ May hay li ma sa hatayna wi kayni, nisi muɗ ɦiya. Nisi di'e: ɦok mula goy waa nala kay mige?

⁹ Urdin namna ma ti gurjuta ŋolla lali gusum goyo kay vul gurjuta mi sa hawna kayni may ŋaa'a ɗisu?

¹⁰ Hay li ma Yesu hum kayni, nam disiya: Nigi muɗ cat bis kay mige? Na' li lop ma ŋaanawa tanu.

¹¹ Kay sa hawna ka hiɗi nigi dok-doko, may nan may hiɗi nigi dok-dokɗi.

¹² Kay hay li ma na' ɦok mul kan kayni, na' kotan tuwanu kay pita vanu.

¹³ Nan digi gasita: Hay liyn kaf ma labara ma firina ma kusis hayamna, hay nagata kuɗulu, va ma na' li'e ma diys goyo kay humsi ma gisi ka'a.

Yudas di newta kay Yesu

¹⁴ Hay na'ta kep jar sa doogo yam ma'na, ma yum Yudas Iskariyot, nam tuɗ tam muliyan ŋulo sa-ɗifinna,

¹⁵ Nam disiya: Nigi ma vulantin mi mige la nan vulgi Yesu? Nisi vulum gurjuta dok-ɦidi.

¹⁶ Hay na'ti pa nam gar hagata kay di newt kalamu.

Ɓuraw-funa

¹⁷ May hay buurta jewta vi yuldeta vi fun-bay-kufna, sa hatayna tuɗ tam Yesu dumu: Naŋ min ala numa'a kotaŋ liyn ma ti tina vi Paskana gal arige?

¹⁸ Nam di'e: Tuɗgi hay hoyok-ziyna vo vi vane, nigi ma dum ala: Bum-yalla di ala liyna valam coowa goboyo, nam ma li yuldeta vi Paskata hiɗi sa hatayna valamu vo hay ziyna vaŋu.

¹⁹ Sa hatayna li ki Yesu vulsi hagat nala, nisi kot Paskata.

²⁰ Hay li ma vulatita coowa, nam musi gaa'a hiɗi sa hatayna valamu sa doogo yam ma'na kay ti'e.

²¹ Hay li ma nisi ka ti'e, nam di'e: Nan digi gasita, kep jargiya ma di newt kanu.

²² Diksi muɗ yor ŋolo, gige gige jarsiya tun caw jobom ala Bum-sumuna, mi nan su?

²³ Nam hotsi dita: Sa ma ka do fun hiɗi nan hay tasat kepe damni mi namu ma min di newt kanna.

²⁴ Goora vi sana ma kala ki ɗot di kalam nala, may joot kay sa ma di newt kay goora vi sana, san kayni lali nam vuɗ vuɗi goyɗi, kayni ŋaa'a suwa.

²⁵ Yudas sa ma di newti kalamna di'e: Rabbi, kayni mi nan su? Nam dumu: Naŋ daawa kay tuwaŋu.

²⁶ May hay li ma nisi lakay ti'e, Yesu sli fun kepe, ɓurawamu, vul mi sa hatayna di'e: Yawamu, ti'e, kayni mi tuwanu.

²⁷ Bugolda nam sli kaway-ma-cina kepe, gi deɓe, vulsiya di'e: cigi kaf hayamu;

²⁸ Kay kayni mi busuwna vanu, busuwna vi bonota wulita ma ɦoki goyo kay sumun ŋolo kay gida vi sulukŋa.

²⁹ May nan digiya: Tun cawis wulin pa, nan ma ci gulda-guldan loɗi, ta-ta hay buur ma nay ma cum kuɗ tuwaya hay mulda vi bunu.

³⁰ Hay li ma nisi gi nul ma suburta gina, nisi tapay kuɗ tuwsiya, kalay kay hiɗiyt Olive.

³¹ Hay na'ta Yesu disiya: Hay henjeta vaydit zawni nan ma muɗ mi va ma dabgi segiya, kay ɗot ɗo'ay ala: Nan min ci sa ma ŋomda, may fok-dimina ma mer goyo.

³² May hay li ma nan dayawa kulo'o, nan min tuɗis vokgiya hay Galileya,

³³ May Peter sli ditiya di'e: La segen kaf hinaŋ goyo kaw, nan as hinaŋɗi.

³⁴ Yesu dumu: Nan daŋ gasita, hay henjet zawni, naŋ ma puw vunaŋ kan sem ɦidi jew a slek-gulokŋ hela.

³⁵ Peter dumu: La nan mit man hiɗi naŋ kaw, nan as puw vunan kaŋɗi. Sa hatayn kaf di nala kaw.

Getsemani

³⁶ Hay na'ta Yesu co hiɗi sa hatayna valamu hay liyn ma yum Getsemani. Nam di tam sa hatayna valamu: Lakgi gaa tani, nan min tuɗ goy gine'e kay siɗawa.

³⁷ Nam yaw Peter hiɗi gurona vi Sebedew sa ma'na kuɗumu, nam tun caw yora, dikam ɓirim ŋolo.

³⁸ Nam di tisiya lo: Ciwta vanu ka yor ŋolo ta-ta hay mitta, nigi ma lak tani jiger hiɗi nanu.

³⁹ Nam raw vokom neeɗa, guɗof gaa'a, dab vokom gaa'a, ka siɗaw ala: Bunu, la van fi li nala, hin kaway-ma-cin kayni raw goy kanu, nir na'ta kepe, ki nan min naɗi, may ki naŋ min nala.

⁴⁰ Nam hotay tam sa hatayna, fisi cuki sene. Nam di tam Peter: Nigi may asay kay lak iri hiɗi nan ir leer kep noŋɗi su?

⁴¹ Lakgi jigere, siɗawgiya, kay nigi ma kal hay nemdaɗi, Ŋusta mina, may sliwna maŋaya.

⁴² Nam kal goy lo sem ma ma'na, kay siɗaw ala: Bunu, la a kaway-ma-cin kayni jik goy kanu bay nan cumɗi, hin minda vaŋ li'e.

⁴³ Nam hotay tisi lo: Fisi cuki sene, kay irsi muɗi nek zil'.

⁴⁴ Nam hinsi lo, hot goyo hay selem ma ɦidina, dum mi yoboyn namna lo.

⁴⁵ Nam ma tam sa hatayna, disiya: Wulini burgi sene, tungi sukgiya kaw. Humgiya, leer hebawa, leer ma goora vi sana ma vulis goyo hay ɓam sum sa sulukŋa.

⁴⁶ Yawgi kulo'o, tuɗaygiya, nam ma di newt kanna ka tuɗay ɗaw'.

Nisi vi Yesu

⁴⁷ Hay li ma vunam ka law tuwa, Yudas kep jar sa doogo yam ma'na co'o, sumun kuɗum ŋolo, nisi ganay hiɗi kew-gaferaŋa, hiɗi zugulayna kaw, cuksiyay si muliyan ŋulo sa-ɗifinna hiɗi sa maariyana vi sumuna.

⁴⁸ Nam ma di newti kalamna ka ɗeksi ala: Sa ma nan ŋaf vunan hiɗi namna ɗawni mi namu, nigi vumu.

⁴⁹ Wulini wulini nam ma tam Yesu dumu: Gaŋ deɓawa Rabbi, nam ŋaf vunam hiɗi namu kaw.

⁵⁰ May Yesu dumu: Bananna, laŋ va ma naŋ ma kay lumna. Nisi ma'a ŋuy Yesu, vumu.

⁵¹ Kep jar nisi sa ay hiɗi Yesu meɗ ɓalam goyo, pat kew-gaferaŋa valam goyo, nam cal sa ma sunda vi mul ŋol ma-ɗifinna, nam kaam humam goyo.

⁵² Hay na'ta Yesu dumu: Hotaŋ kew-gaferaŋa vaŋu hay faara valamu, kay nisi kaf sa yaw kew-gaferaŋa hay ɓisina ma cisi goy ɗawn mi kew-gaferaŋa lay.

⁵³ Naŋ var ala la nan siɗaw tam bunu, wulini wulini nam as cukan sa sunda-wuralawna ay ir vokŋ doogo yam ma' ɗisu?

⁵⁴ La ɗot di ala van kayni ma li'e, vuna' ma hob ɗawn nala ɗisu?

⁵⁵ Hay liy namna Yesu di tam tokŋa: Nigi maawa ki nigi min vi sa ma coŋcoloŋŋa nala, hiɗi kew-gaferaŋa, hiɗi zugulla, kay nigi min vanu. Buurta kaf nan ay musi hay Tempella, nan ay hata, may nigi vanɗi.

⁵⁶ May slen kayni pet li'e kay ɗota vi sa jobta-Lawna vuna' ma hoba. Hay na'ta sa hatayn kaf hinimu, piriya.

Yesu vok sa ɗiger-lawta

⁵⁷ May nisi sa vi Yesuna kalam tam Kayfas mul ŋol ma-ɗifinna, hay li ma sa wi-ɗota hiɗi sa maariyana dakay hayna.

⁵⁸ Peter ay tuɗ bugolo goy gine'e, ta-ta nisi co hay wur-daŋŋa vi mul ŋol ma-ɗifinna, nam mus gaa tam sa ŋomda kay ɗuw va ma min muɗna.

⁵⁹ May muliyan sa ŋulona hiɗi sa ɗiger-lawta kaf gar a tun law ma sinna kay Yesu, kay nisi min cum goyo.

⁶⁰ Sa li di-goyta ta sinda co ŋolo, may nisi fi vaɗi. Bugolda sumuna ma' co'o, nisi di'e:

⁶¹ San zawni di ala nam as ɦo Tempella vi Lawn gaa'a, nam hot inim kulo'o lo hay buur ɦidi bugolda.

⁶² Hay na'ta mul ŋol ma-ɗifinna fok kulo'o, nam dumu: Slen ma sumuna lakŋi ka dum kaŋŋa naŋ as hot dit kuɗum noŋ ne'ɗi su?

⁶³ Yesu mus kiliŋ'. Mul ŋol ma-ɗifinna dumu: Nan min ala naŋ ma yi sem Lawn ma irin kaŋu: Naŋu mi goora vi Lawn gasiya su?

⁶⁴ Yesu dumu: Ki naŋ di nala. Suw pet lo nan fi digi ala: Hay wulini pa nigi ma wi goora vi sana musi hay gal ɓam ma jufna vi ma Gaŋeraŋ-Petna, nam ma co'o jar ɗugulla ma dukalawna.

⁶⁵ Hay na'ta mul ŋol ma-ɗifinna jet sligara valamu goyo, nam di'e: Nam ŋul Lawnawa, nala nay ma lum hiɗi sa di-goyna mi meloge? Nigi hum ŋulda valamawa kay tuwgiya. Nigi var mige kay kayni?

⁶⁶ Nisi kaf hot ditiya di'e: Nam nagay kay mitta.

⁶⁷ Bugol kayni nisi tun caw tufum nenen kulo kiramu, cum kutopoŋo, segena cum kulo geliyamu, nisi ka di'e:

⁶⁸ Kristu, daŋay tige, caŋ zawn gige?

Peter puw vunam kay Yesu

⁶⁹ Hay na'ta Peter ay musi goy jiya hay wur-daŋŋa. Goota ta sunda ta vo hay ziyna kep co talamu dumu: Naŋ kaw ay hiɗi Yesu ma Galileyana.

⁷⁰ May nam puw vunam voksi kaf di'e: Va ma nak dumna zawni nan wum cawamɗi.

⁷¹ Hay liyn ma nam co tam diɓira vi vun-galana, goot-cat tara kep wumu, na' di tam sa tokayna ala: San zawni ay hiɗi Yesu ma Nasaretna.

⁷² Nam puw vunamu, yi va kalam kaw ala: Nan wi sa namnaɗi.

⁷³ May mus ne' bugolda, nisi sa lakay goboyo ma'a dumu: Gasiya, naŋ kaw ka jarsiya, kay vunaŋ ma dina ɗek goy kaŋu.

⁷⁴ Hay na'ta Peter tun caw yi va kalamu, tun caw sumal tuwam kaw ala: San kayni nan may wumɗi. Wulini wulini slek-gulokŋ hela.

⁷⁵ Hay na'ta Peter humam gum kay yoboyna vi Yesu ma nam dum ala: Naŋ ma puw vunan kan sem ɦidi jew a gulokŋ hela. Nam kalay goyo, nam tiy ŋolo.