MATEWUS 25 - BIBALDA TA PELDETTA

Law ma nir niramna kay guro-boy sa doogona

¹ Kay na'ta mulda-wuralawna ma ŋra ca hiɗi guro-boy sa doogona sa yaw fitilla visiya kay tuɗ ŋar ir juf-cata.

² May sa vaslna jarsi ɦay-ɦaya, sa vaslna yali may.

³ Sa ɦay-ɦayna yaw fitilla visiya, may gar mul kisiɗi.

⁴ May sa yalla yaw mul kisi hay bidoŋŋa, tapam hiɗi fitilla.

⁵ May hay li ma juf-cata may co gosoyɗi, nisi kaf senda visiya, nisi cuki sene.

⁶ May hay henje daŋalta, siwelda ka siwel ala: Humgiya: juf-cata ka ma'a, tuɗgi kay ŋafam iramu.

⁷ Kay na'ta guro-boyn kaf zliy kulo'o, kot fitilla visiya.

⁸ May sa ɦay-ɦayna di tam sa yalla: Nigi vulma mul vulge, kay fitilla vuma teway goyo.

⁹ May sa yalla di tam sa ɦay-ɦayna: Naɗi, kay nam as kuma'a hiɗi kigiya kafɗi, tuɗgi tam sa gusna kay gus kay tuwgiya.

¹⁰ May hay li ma nisi kalay goy gus mulla, juf-cata co'o, nisi sa tuwsi kotina cuk kalaf hiɗi namu hay yuldeta vi dabayna, nisi duk vun-ziyn kulo kisiya may.

¹¹ Bugolda guro-boy segen co'o, nisi di'e: Bum-Sumuna! Bum-Sumuna! Malaŋ goy kuma'a malge.

¹² May nam hot dita disiya: Nan digi gasita, nan wigiɗi.

¹³ Kay na'ta lakgi jigere, kay nigi wi fattaɗi, wi leeraɗi kaw.

Law ma nir-niramna vi talentena

¹⁴ Kayni ki sa ma min kal hay rogoyo, nam yi sa sunda valamu, vulsi slena valam hay ɓisiya nala.

¹⁵ Nam vul talente vasl mi ma kepna, talente ma' mi hena, talente kep mi ma ɦidina, nam vul mi gigekaw kuɗ donota valamu valamu. Bugol kayni nam kalay hay rogoyta valamu.

¹⁶ Wulini wulini, sa ma fi talente vaslna kaliya, nam dokom yalamu, nam fi talente mara talam vasl lo.

¹⁷ Nam ma fi talente ma'na li nala kaw, nam dokom yalamu, nam fi mara talam ma' lo.

¹⁸ May nam ma fi talente kepna kalay goyo, vurok zulla, nam ŋay gurjuta vi bum-ziyna gaa'a hay nagata.

¹⁹ Mus bugolda ŋol neeɗa kayni bum-ziyna maawa, nam yisiya kay nisi dum kay sle ma nisi lumna.

²⁰ Sa ma fi talente vaslna ma'a, nam fi talente mara talam vasl. Nam di'e: bum-ziyna, ɗuwaŋ tige, naŋ vulan talente vasl, nan dokom yalamu, fi mara talam vasl.

²¹ Bum-ziyna valam dumu: Ŋaa'a, naŋ sa ma sunda ma ŋaana, ma gasina, naŋ li ŋaa'a tam sle ma kiɗayna, may nan min musaŋ kay sle ma ŋolla, tuɗan kalafi hay firita vi bum-ziyna vaŋu.

²² Nam ma fi talente ma'na kaw maawa di'e: Bum-ziyna, ɗuwaŋ tige, naŋ vulan talente ma'ɗi su? Nan dokom yalamu, fi mara talam ma' lo.

²³ Bum-ziyna valam dumu: Ŋaa'a, naŋ sa ma sunda ma ŋaana, ma gasina, naŋ li ŋaa'a tam sle ma kiɗayna, may nan min musaŋ kay sle ma ŋolla. Tuɗaŋ kalafi hay firita vi bum-ziyna vaŋu.

²⁴ Nam ma fi talente kepn kaw maawa di'e: Bum-ziyna, nan wi ala naŋ mi sa ma hirliŋi, naŋ feɗ hay liy ma naŋ cuk jaf hayamɗina, naŋ tok slena hay liy ma naŋ was hayamɗina,

²⁵ Kay na'ta nan li nari, nan kalay goyo, ŋay talentena vaŋ gaa'a jar nagata, wulini nam yawni.

²⁶ May bum-ziyna hot ditiya dumu: Naŋ sa ma sunda ma joona ma zulomda, naŋ wi ala nan feɗ hay liyn ma nan cuk jaf hayamɗina, naŋ tok slena hay liyn ma naŋ was hayamɗina kaw;

²⁷ kay na'ta la litigekaw naŋ vul gurjuta van goy mi sa ni gurjuta, kay hay li ma nan hotay ɗawni, nan ma fi gurjuta van hiɗi niya' kuɗa'a.

²⁸ Nala yawgi talente ma kalamna goyo, vulum mi nam ma fi talente doogona.

²⁹ Kay na'ta gigekaw ma falam kaana, ma vulum mara talam lo, nam ma as ŋolo hiɗi namu. May sa ma falam mayɗina, va ma ka kalamna ma slumis goyo may.

³⁰ Sa ma sunda ma as li va ma ŋaaɗina nigi ma gum goy jiy hay jufunda, hay liyna ma tiyna hiɗi mut-siyna ka hayna.

Kitata vi jaf-sumuna

³¹ May hay li ma goora vi sana ma ma'a hay gajijita valamu hiɗi sa sunda-wuralawna valamu kuɗum ɗawni, nam ma mus kay zlamda-kitata vi gajijita valamu,

³² jaf-sumun kaf ma dak vokomu, nam ma kaasi irsiya ki sa ma ŋomda ka ir fok-dimina hiɗi fok-meena nala.

³³ Nam ma lak fok-dimin hay galam ma jufna, fok-meen hay galam ma gulla may.

³⁴ Hay na'ta mulla ma di tam sa galam ma jufna: Nigiyay tani, nigi sa bolda vi bun ka kigina, vigi mulda ta koti kigi voco'o, hay li ma caw nagata bay tuni pa.

³⁵ Kay mayt canu, nigi vulan va ma ti'e, laat lanu, nigi vulan va ma ci'e, nan ay sa ma pulu, may nigi tapan jargiya;

³⁶ nan ay goy nala'a, may nigi cukan sligar tanu; nan ay moyo, may nigi co ɗuwanu; nan ay daŋgaya, may nigi co tanu.

³⁷ Hay na'ta sa ɗigera ma hot dit talam ala: Bum-Sumuna, numa waŋ hay mayta vulaŋ va ma ti'e lancitige? Lebo hay laata vulaŋ va ma ci'e lancitige?

³⁸ Numa waŋ goy pulu tapaŋ naŋ jarma'a lancitige? Lebo goy nala'a, vulaŋ sligara lancitige?

³⁹ Numa waŋ moyo lebo daŋgaya kaw, tuɗis ɗuwaŋu lancitige?

⁴⁰ Mulla ma hotsi dita ala: Nan digi gasita, hay li ma nigi li va tam kep jar sa ɓosiyon sa gurayn lakŋi, va namna nigi lum kayn tan nanu.

⁴¹ Bugolda nam ma di tam nisi sa hay galam ma gulla: Tuɗgis goyo hinanu, nigi sa beɗay-goyna, tuɗgis hay kuta tewɗita ta koti kay Matna hiɗi sa sunda valamu.

⁴² Kay mayt canu, nigi vulan va ma tiɗi, kay laat lanu, nigi vulan va ma ciɗi;

⁴³ Nan ay sa ma pulu, may nigi min tapan jargiɗi; nan ay goy nala'a, may nigi min vulan sligarɗi; nan ay moyo, hay daŋgayn kaw, may nigi co ɗuwanɗi.

⁴⁴ Hay na'ta nisi kaw ma hot dit talam ala: Bum-sumuna, numa waŋ naŋ hay mayta lebo, laata lebo, pulta lebo, nalata lebo moyna lebo, daŋgayna lebo, numa sunaŋɗi kayn lancitige?

⁴⁵ Hay na'ta nam ma hot dit tisi ala: Nan digi gasita, hay li ma nigi li va tam ɓosiyon sa gurayn lakŋɗi, nigi lumɗi kayn tan nan kaw.

⁴⁶ Nisiya ma tuɗ hay kuta ta vatɗita, may sa ɗigera ma tuɗ hay irita vatɗita.