MATEWUS 22 - BIBALDA TA PELDETTA

Law ma nir-niramna kay dabayna

¹ Yesu disi law ma nir-niramna lo ala:

² Mulda-wuralawna na'a ŋray ca hiɗi mulla ma min li dabayna kay goora valamu.

³ Nam cuk sa sunda valam goyo kay yi sa fi yita hay dabayna; may nisi min maɗi.

⁴ Nam cuk sa sunda sara'a lo, ka disi ala: Nigi ma di tam sa fi yitna ala: tin koti kanu, luwayna hiɗi faray ma ɗorayna ŋatiya, slen kaf kotiya, nigiyay hay dabayna.

⁵ May nisi min tun ŋalda visi kay yitɗi; sla' ti hagata visiya visiya, sa hena tun iram hay sinena, sa hena tun iram hay lumuna.

⁶ Segena yaw sa sunda valamu, ŋulsiya, cisi goyo may.

⁷ Mulla muɗ ɦiya, nam cuk sojena valamu, ci sum nisin goyo, ŋal hoyok-ziyna visi goyo kaw.

⁸ Nam di tam sa sunda valamu: Yuldeta vi dabayna kotawa, may sa fi yita may nagay kay kaynɗi.

⁹ Kay na'ta tuɗgi goy hay hagana, sum sa nigi fisin kaf nigi ma yisi ay hay yuldeta.

¹⁰ Sa sunda nisina kalay goy hay haga ma grana, sum sa nisi fisin kaf nisi toksi aya, sa joona hiɗi sa ŋaana kaf, ziyna vi yuldeta oyawa hiɗi sa dabayna.

¹¹ May hay li ma mulla ma kalafi kay ɗuw sa dabayna, nam wi sa kepe ma bay cuk sligara vi yuldeta vi dabayna talamu.

¹² Nam dumu: Bananna, naŋ ma kalaf tani bay cuk sligara vi yuldeta vi dabayn taŋu kay mige? May nam mus kiliŋ.

¹³ Hay na'ta mulla di tam sa sunda: Jungit gayam hiɗi ɓalamu, gum goy jiy hay jufunda, hay li ma nam ma tiya, mut siyamu kaw.

¹⁴ Kay sa yiyna ka ŋolo, may sa vileki-goyna ka kiɗaya.

Taara mi Cesar

¹⁵ Hay na'ta sa Farisena cuk goyo, nisi ŋra vunsiya, kay gar law ta nisi min vi Yesu hay jawta hiɗi dita vi vunamu.

¹⁶ Nisi cuk sa hatayna visiya hiɗi sa Herodiyan talamu, ka dum ala: Bum-yalla, numa wi ala naŋ sa ma di gasita, naŋ hat hagata vi Lawn tam sumuna hiɗi gasita kaw, naŋ li nar kay saɗi, ka ir saɗi kaw.

¹⁷ Naŋ duma varta vaŋ tige: Hagat ka kay vul taara mi Cesar lebo mayɗi su?

¹⁸ May Yesu wi mileta visiya, nam di'e: Nigi sa milena, nigi min neman kay mige?

¹⁹ Vulan gurju ta li taar hiɗi na'ta ay kepe. Nisi maram denariyus kepe.

²⁰ Nam disiya: Haya' damni mi yam gige hiɗi ɗota vi gige?

²¹ Nisi dumu: Vi Cesar. Nala nam disiya: Kay na'ta vulgi mi Cesar slena vi Cesar, mi Lawna slena vi Lawna may.

²² Hay li ma nisi hum kayni, nisi muɗ ɦuyum', kaliya may.

Sa Sadusena hiɗi dayta-kulota

²³ Hay na'ta sa Sadusena sa di ala dayta-kulota tayɗina ma talamu, nisi jobomu:

²⁴ Bum-yalla, Musus di ala la san mit bay gooro, ɓasulumna ma vi cata valamu kay vuɗ goor hay selemu.

²⁵ Ɓosiyom-tuwsin ay jarma siɗiya. Ma jewna sli cata, nam cap mit bay vuɗ goor hiɗi na'a, ɓasulumna vi ca na'ta.

²⁶ Ma ma'na mit lo, ma ɦidin mit lo, ta-ta tam ma siɗiyana.

²⁷ Bugolsi kafe cata miti lay.

²⁸ May hay dayta-kulot ɗawni, jarsi kaf lakŋi na' ma mus ca kuɗ marige? Kay nisi kaf musa' ca'a?

²⁹ May Yesu hot dita disiya: Nigi viy goyo, kay nigi wi caw ɗotɗi, nigi wi donota vi Lawnɗi kaw.

³⁰ Kay hay dayta-kulot ɗawni, sa juf ma sli ca mayɗi, ca ta sli sa juf tayɗi kaw, may nisi ma muɗ ki sunda-wuralawna vi Lawna hay wuralawna nala.

³¹ Kuɗ dayta-kulota vi sa mitina, va ma Lawn dum tigin kayni nigi bay jaŋam tuwa su?

³² Ala: nanu mi Lawna vi Abraham, Lawna vi Isaak, Lawna vi Yakub kaw. Lawna may mi Lawna vi sa mitinɗi, may vi sa irina.

³³ Sum sa hum kayni muɗ ɦuyum' kay hatta vi Yesu.

Vun-ma-gatna ma suw kafna

³⁴ Hay li ma sa Farisena hum ala nam zan vun sa Sadusenawa, nisi tok tuwsiya.

³⁵ Kep jarsiya mi sa ma wi vun-ma-gatna, nam job Yesu kay nememu.

³⁶ Nam job Yesu ala Bum-Yalla, hay gatta vi Musus vun-ma-gatna ma ŋol suw kafna mi marige?

³⁷ Yesu hotom dita: Naŋ ma min Bum-Sumuna Lawna vaŋu hiɗi dikaŋ kaf, hiɗi ciwta vaŋ kaf, hiɗi varta vaŋ kaf.

³⁸ Kayni mi vun-ma-gatna ma jewna, mi ma ŋolla kaw.

³⁹ Ma ma'na ma ŋray hiɗi namna kayn ala: naŋ ma min sugoloŋu ki sliw tuwaŋ nala.

⁴⁰ Slen ma diy hay gatta vi Musus hiɗi ma sa jobta-Lawna dumna kaf ka juni kuɗ vun-ma-gatna ma' lakŋi.

Kristu goora vi David

⁴¹ Hay li ma sa Farisena ay tokiya, Yesu ka jobsi ala:

⁴² Nigi var mige kay Kristu? Namu mi goora vi gige? Nisi hotom dita; Goora vi David.

⁴³ Nam disiya: Hay li ma David hobay hiɗi Ŋusta, nam yum ala Bum-Sumuna kayn kay mige? Kay David di'e:

⁴⁴ Bum-Sumuna di tam Bum-Sumuna vanu: Musaŋ gaa'a hay gal ɓan ma jufna, ta-ta nan ma cuk sa gawt kaŋŋa gaa kuɗ wur-seŋu.

⁴⁵ La David yum ala bum-sumuna, Bum-Sumuna as li mi goora vi David kayn nanige?

⁴⁶ Sa ma as kay dum va kep kaw may noŋɗi, bugol buur namna pa, sa ma co talam kay jobom va may noŋɗi.