MATEWUS 18 - BIBALDA TA PELDETTA

Ma ŋol suwna gige? Slen ma puk san gaana ƁAKŊA KAY SUM-WURANA HIƊI GIDA VI SULUKŊA

¹ Hay liy namna sa hatayna ma tam Yesu jobom ala: Ma ŋolla hay mulda-wuralawna mi gige?

² Yesu yi goor-goor ay kepe, nam musum jarsi dam', ka disi ala:

³ Nan min digi gasita: La nigi hamgiɗi, la nigi muɗ tuwgi ki gurosgurayn naɗi, nigi as cuk hay mulda-wuralawn noŋɗi.

⁴ Hay na'ta gigekaw ma hot yalam gaa'a ki goor-goor damni nala, nam ma muɗ mi ma ŋolla hay mulda-wuralawna.

⁵ Gigekaw ma vi goor-goor ki damni nala hiɗi firita hay semda vanu, nam vanti nanu.

⁶ May gurosguray sa viy hay nan lakŋi, la san ɗut mara jarsi kep goyo, ŋaata hiɗiyt nekka ma jun kelemu, kay sirim gaa'a hay zulla vi niyn ma ŋolla.

⁷ Joot kay sa nagatna kay ɗutta-goyta. Kay la linigekaw ɗutta-goyta ma ma'a, may joot kay sa ma mara'na.

⁸ La ɓaŋu kla, seŋu kla nemaŋu, kaam goyo, gum goy gine'e hiɗi naŋu, kay a kal hay irita hiɗi ɓaŋ kepe dirlaya kaw, kayni ŋaa'a kaŋu suw ma naŋ kal hiɗi seŋ ma' pete, ɓaŋ ma' pete may gaŋis hay kuta tewɗita.

⁹ La iraŋ nemaŋu, hulotom goyo, gum goy gine hiɗi naŋu. Kay a kal hay irita hiɗi iraŋ kepe, kayni ŋaa'a kaŋu suw ma naŋ kal hiɗi iraŋ ma' pete, may gaŋis hay kuta tewɗita.

¹⁰ Nigi ma li ŋali kay guron lakŋi, nigi ma ɗuw mara jarsi kep birek-cekɗi, kay nan digi ala sunda-wuralawna visiya hay mulda-wuralawna ka ɗuw ir bunu ma hay wuralawna dok-doko.

¹¹ Kay goora vi sana maawa kay suɗ ma bay-goyna.

Ɦu-dimita ta bay-goyta

¹² Nigi var mige? La fok-dimina vi san ka kis, may la kep jaram ba goyo, nam ma hin ma dok-zleeŋe yam zleeŋena, tuɗ kulo'o kay hiɗiyta kay gar ta bay goytɗi su?

¹³ La nam fa'a ni, nan digi gasita: Nam as li firi ka'a suw ma dok-zleeŋe yam zleeŋe ma ba goyɗin ɗisu?

¹⁴ Nala kaw bugi ma hay wuralawna min ala gurosgurayn lakŋi kep kaw ma ba goy kuɗsiɗi.

Vulda vi gida

¹⁵ May la ɓasuŋ li sulukawa (kataŋu), tuɗaŋ gatam goy valamu. La nam humawa kuɗaŋu, naŋ fi ɓasuŋawa.

¹⁶ May la nam min hum kuɗaŋɗi, vaŋ sa kep lebo yaw sum ma' kuɗaŋu, kay lawt kaf kota kuɗ yoboyna vi sa di-goyna ma' lebo ɦidi.

¹⁷ May la nam min hum kuɗsiɗi, naŋ ma di kayni tam tapna, la nam min hum kuɗ tapnaɗi lay ni, hinim muɗ kiraŋu ki sa ma waana ma tar vun-lumuna nala.

¹⁸ Nan digi gasita: Slen pet ma nigi junum gaa kay nagat tani, nam juni hay wuralawna, slen pet ma nigi butum goyo gaa kay nagat tani, nam buti hay wuralawna kaw.

¹⁹ Nan digi gasit lo ala: Slen pet ma sumun ma' jargiya tap vunsi kay siɗaw kalamna, kayni bunu ma hay wuralawna ma vulsita.

²⁰ Kay la arigekaw sumun ma' kla, ɦidi kla dak tuwsiya hay semda vanu ni, nan ka jarsi dam'.

²¹ Hay na'ta Peter tuɗ talamu dumu: Bum-Sumuna, nan ma vul gida mi ɓasunna sem gaage la nam li suluk katanu? Co ta-ta sem siɗiya su? Yesu dumu:

²² Nan may daŋ ala sem siɗiya ɦawaɗi, may ta-ta dok-siɗiya sem siɗiya.

Sa ma sunda ma wi haw saɗina

²³ Kay na'ta mulda-wuralawna ŋray ca hiɗi sa ma min ala sa sunda valamu vum caw sle ma kisin goyo.

²⁴ Hay li ma nam tun caw joba, nisi mar talamu sa kep ma as vulum gurjuta ir talente birim doogo.

²⁵ May kay sle ma nam hotom goyna may kalamɗi, mulamna vul hagata kay nisi ma gusum goyo hiɗi cata valamu, hiɗi gurona valamu hiɗi slena valam noŋ kaf, kay wurakam slena valamu.

²⁶ Sa ma sunda girif gaa'a, nam dab vokom gaa'a vok mulamna dumu: mulanna, vaŋ ŋalaŋ tan neeɗa, nan ma wurakam goy kafe.

²⁷ May sa ma sunda nam muɗ hawi kir mulamna, nam butum goyo, hinim balla valam kafe.

²⁸ May hay li ma sa ma sunda kayni kalawa goyo, nam ŋaf hiɗi niram ma sunda kepe, ma balla valam ka kalamu ir sulay kis-kepe. Nam bowom kelemu, dumu: Wurakan balla van ma kaŋŋiya.

²⁹ Niram ma sunda girif gaa'a, siɗawamu di'e: Vaŋ ŋalaŋ tan neeɗa, nan ma wurakaŋu.

³⁰ May nam minɗi, kaliya, gum daŋgaya, ta-ta nam wurak bal ma kalamna goy kafe.

³¹ May hay li ma nuriyom sa sunda wi va ma lina, diksi tisi ŋolo, nisi ma'a di tam mulsina kay sle ma lina.

³² Hay na'ta mulamna yum talamu dumu: Naŋ sa ma sunda ma dikaŋ joona, nan hinaŋ balla van ma kaŋŋa kay naŋ siɗawanawa,

³³ naŋ kaw as li slugot tam niraŋŋa ki nan li slugot taŋ naŋ nala ɗisu?

³⁴ Mulamna muɗ ɦiya, vulum goy tam sum sa las sumuna, ta-ta nam wurak bal ma kalamna goy kafe.

³⁵ Bunu ma hay wuralawna ma li tigi ɗawn nala kaw, la nigi vul gida mi ɓosiyogina hiɗi dikgi kafɗi.