MATEWUS 17 - BIBALDA TA PELDETTA

Yesu jok nafaramu

¹ Hay buur karkiya bugolda, Yesu yaw Peter hiɗi Yakub hiɗi ɓasulumna Yohana kuɗumu, kalsi kulo kay hiɗiyt fiyokka goy ŋayaya.

² Tuwam muɗ kirsi ir valamu, vokom muɗ wile'e ki fatta nala, sligara valamu muɗ haɓ tal-tal' ki haraŋa nala.

³ Musus hiɗi Eliyas vul tuwsi kirsiya, nam kus yoboyn hiɗi nisiya.

⁴ Peter sli ditiya di tam Yesu: Bum-Sumuna: Ŋaa'a kay nay lak tani. La naŋ mina, nan min pi guɗuk tan ɦidi: Kep kaŋ naŋu, kep kay Musus, kep kay Eliyas may.

⁵ Hay li ma vunam bay vat tuwan kayni, ɗugul ma haraŋa li kisi ŋusu, nisi hum della may goy hay ɗugulla pa ka di ala: Zawni mi goora van ma hayan kalamna, nam kiran ŋaa ŋolo, humgi kuɗumu.

⁶ Hay li ma sa hatayn hum kayni, nisi girif gaa'a, dab voksi gaa'a, muɗ nar ŋolo.

⁷ Yesu co tisiya, nam josiya disiya: Yawgi kulo'o, ligi narɗi.

⁸ Hay li ma nisi cuk irsi goyn kayni, nisi wum mi Yesu valam kep zaw'.

⁹ Hay li ma nisi jik goy gaa kay hiɗiyta pa, Yesu gatsi ala va ma nigi wumna nigi ma dum goy mi saɗi, ta-ta goora vi sana ma day kulo'o hay mitta tuwa.

¹⁰ Sa hatayna jobom ala: Sa wi-ɗota di ala Eliyas ma co jew tuwa kayn kay mige?

¹¹ Nam hot dita: Eliyas ma ma'a gasi, nam ma kot slen pet goy hay liyamu.

¹² May nan fi digi ala Eliyas miy vatiya, may nisi fi wumɗi, nisi lasamu ki nisi min nala. Nala kaw goora vi sana ma ci lasta hay ɓisiya.

¹³ Hay na'ta sa hatayn wi ala nam di tisi kayn kay Yohana ma Baptisma.

Yesu yer sa ma ful kalamna goyo

¹⁴ Hay li ma nisi co goboy tam sumuna, sa kep ma tam Yesu girif gaa vokomu di'e:

¹⁵ Bum-Sumuna, laŋ slugot kay goora vaŋ lige! Kay ul cumu, nam ka li las ŋolo, dok-dok nam nig hay kuta, nig hay niyna kaw.

¹⁶ Nan maram tam sa hatayna vaŋ kaw, may nam muɗ goy kisi ŋaaɗi.

¹⁷ Yesu hot dita: Nigi jaf ma bay-vina ma viyuk-viyukŋa, nan ma mus hiɗi nigi atage? Nan ma ziygiya ta-ta lancitige? Maramay tan tani.

¹⁸ Yesu bay fulla, fulla kal goy hay goor-goora, nam muɗ goy ŋaa'a hay leer namna de'.

¹⁹ Hay na'ta sa hatayna co tam Yesu goy ŋayaya dumu: Numa'a fi a digiɗ fulla goy kalamɗi kayn kay mige?

²⁰ Nam disiya: Kuɗ vida vigi ta kiɗayta. Nan digi gasita, la vida vigi ka ki jaf-seneve nala, la nigi di tam hiɗiyt zawn ala jokagis ɗaw goyni kaw, na' fi joka, va ma nigi as a liɗin mayɗi.

²¹ May jaf ful namna kayni, as digiɗim goy kayn hiɗi siɗawta hiɗi laata kaw.

Yesu di goy kay mitta hiɗi dayta-kulota valamu

²² Hay li ma nisi ka poy hay Galileya, Yesu disiya: Goora vi sana ma vulis goy hay ɓam sumuna,

²³ nisi ma cum goyo, hay buurta ɦidita nam ma day kulo'o. Nisi yor tuwsi ŋolo.

Yesu vul taara

²⁴ Hay li ma nisi co hay Kapernawum, nisi sa yaw taara vi drakma ma ma' ma'na tuɗ tam Peter dumu: Bum-yalla vigiya may tar drakma ma ma' ma'naɗi su?

²⁵ Nam di'e: Taramu. Hay li ma nisi co kalaf hay ziyda, Yesu sli diti jewe, nam ka job Peter ala: Naŋ var mige? Muliyan sa hay nagatna yaw taar kayn hay ɓam gige? Hay ɓam gurona visiya lebo hay ɓam sa pulla su?

²⁶ Peter hot dit ala: Hay ɓam sa pulla. Yesu hot dumu: Guron hayɗin taar may tuni kisiɗi.

²⁷ May kay nay ma li va ma dabsi sesiɗi, tuɗaŋ kel niy-lumna, gaŋ siwit goloŋ kepe, kuluf ta naŋ va' jewta naŋ ma sla'a, hay li ma naŋ mala' vuna'awa goyo, naŋ ma fi stater vuna' kepe, slaŋga, wuraka' kaŋu hiɗi nanu.