MATEWUS 15 - BIBALDA TA PELDETTA

Sa Farisena hiɗi data vi sumaysiya

¹ Hay na'ta sa Farisena hiɗi sa wi-ɗota may hay Yerusalem pa, co tam Yesu dumu:

² Sa hatayna vaŋu hin data vi sumiyay goyo kay mige? Hay li ma nisi min ti funa, nisi muz ɓisi goy jewɗi.

³ May nam hot dita disiya: May nigiya, nigi raw vun-ma-gatna vi Lawn goyo kuɗ data vigiya kay mige?

⁴ Kay Lawna di'e: Slaŋ yam buŋu hiɗi suŋ kulo'o, sa ma ŋul bulumu kla sulumu kla, nam ma fi mitta.

⁵ May nigi di'e: Sa ma di tam bulum kla sulum kla ala: Va ma nan min gut kuɗaŋ hiɗi namna vuli goy tam Tempella, san ki kayn nala bal may kalamu kay sli yam bulumu hiɗi sulum kuloɗi.

⁶ Ki kayn nala yoboyna vi Lawna nigi muɗumawa goy waa'a kuɗ data vigiya.

⁷ Nigi sa milena, Esaya di sle ma vokŋa kigiya hay li ma nam di ala:

⁸ Sumun kayni slan yan kulo'o hiɗi vunsiya, may diksi ka goy gine'e hiɗi nanu.

⁹ Nisi girifan kayni waa'a ɦawa, hay li ma nisi hata' ti hatta vi sumuna ɦawa.

¹⁰ Yesu yi sumun talamu nam disiya: Humgi slen kayni,

¹¹ humgit cawam kaw: Va ma kal kalaf hay vun sana may muɗum liwisɗi, may va ma kalay goy hay san pan kayni muɗum liwisi.

¹² Hay na'ta sa hatayna valam ma talamu dumu: Sa Farisena hay li ma nisi hum kayni, nisi var joo'o, naŋ wiy nala su?

¹³ May nam hotsi dita: Jafna mige kaw ma bun ma hay wuralawna may pumɗina, nam ma patis kulo'o hiɗi sutiyam kaw.

¹⁴ Nigi hinsi nala, nisi kayni si sa dukina sa tan sa dukina. La sa ma dukina tan niram ma dukina, nisi ma' pet ma cuk gaa hay zulla.

¹⁵ Peter sli ditiya dumu: Law ma nir-niramna namna kayni naŋ duma'ti cawam goy haraŋi.

¹⁶ Yesu dumu: Nigi kaw bay yal nala lay su?

¹⁷ Slen kaf ma kal hay vun sana, cap hay ruwatamu, bugolda nam rawis goy jiya, nigi may wi naɗi su?

¹⁸ May sle ma kal goy vun sana ma may goy hay dikga pana, kayni mi slen ma muɗ san liwisi.

¹⁹ Kayni mi slen ma may goy hay dikga pana: Varta joota, ci matta, zlata-bulota, viyuwta, kulda, sinda ŋulda,

²⁰ Cani mi slen ma muɗ sa liwisi. May kay ti hiɗi ɓam bay muza, kayni may muɗ san liwisɗi.

Cata Kanaaniyata

²¹ Yesu fokis ɗawn pa, kal hay nagata vi Tirus hiɗi Sidon.

²² Cata Kanaaniyata kepe may goy hay hoyok liy namna pa, ka siwel talam ala: Bum-Sumuna, naŋ goora vi David, laŋ slugota kan lige! Goota vanu fuliya ma joona ka lasa' dono ŋolo.

²³ May nam min hota' dit noŋɗi. Sa hatayna valamu ma talamu siɗawamu di'e: Gaŋgi ira'a, kay na' ka pat winek kaya.

²⁴ May nam hot dita di'e: Bun ganay kayni tam fok-dimi ma bay goyna hay jafna vi Israyel tuta.

²⁵ May na' ma'a girif gaa vokomu di'e: Bum-Sumuna, Gutaŋ kuɗan gutge!

²⁶ May nam hot ditiya di'e: A yaw funa vi gurosgurayna cukum goy mi durnayna kayni may hay liyamɗi.

²⁷ May na' di'e: Gasiya Bum-Sumuna, durnayn kaw mut helekŋa ma cuk gaa kuɗ tablena vi mulamna.

²⁸ Kay na'ta Yesu hot ditiya da'a: Cata vida vag ŋolo, van ma li tagu ki nak mini nala. Ki kayn nala goota va' muɗi goy ŋaa'a hay na'ta de'.

Yer-goyta mara'a mara'a

²⁹ Yesu hin liy namna, tuɗ kel niy-lumna Galileya. Ɗawni nam jik kulo kay hiɗiyta, mus gaa'a.

³⁰ Sumuna ŋolo ma talamu. Nisi mar kuɗsiya sa dirlayna, sa dukina, sa gidiŋŋa, sa hurɓulina hiɗi segen sa moyna ŋolo. Nisi laksi gaa vok gayamu, nam muɗsi goy ŋaa'a.

³¹ Sumun muɗ ɦuyum' hay li ma nisi wi sa gidiŋŋa muɗi lawa, sa hurɓulina hiɗi sa dirlayna muɗi ŋaa'a, sa dukina muɗi ɗuwa kaw. Nala sumun subur Lawna vi Israyel.

Yesu muɗ fun goy ŋol dak-dak sem ma ma'na

³² Yesu yi sa hatayna valamu disiya: Sumun muɗi kiran haw ŋolo, kay wulini buur ɦidi nisi ka lakay hiɗi nanu, may va ma nisi tum mayɗi. Nan min gisi irsi hiɗi maytɗi, kay la naɗina, mayt ma cosi zuroɓsi hay hagata.

³³ Sa hatayna valamu dumu: Sum sa ŋol ki kayn nala numa ma fi fun a hobsi hay fulda tan ɗawn arige?

³⁴ Yesu disiya: Fun ka kigi gaage? Nisi di'e: Fun siɗiya hiɗi kuluf guray neeɗa may.

³⁵ nam vul hagata tam sumuna kay mol gaa'a kay nagata,

³⁶ Nam yaw fu ma siɗiyana hiɗi kulufna kaw, bugol nam gi deɓ gina, ɓurawam goyo, vulum mi sa hatayna, sa hatayna vulum tam sumuna may.

³⁷ nisi ti'e hobiya kaw. Diram ma hinina nisi yawam kulo'o, nam oy tikisi siɗiya.

³⁸ Sa tina noŋ pet jufayna birim ɦidi. Boyna hiɗi gurosgurayn may ŋaɓay hayɗi.

³⁹ Hay li ma nam gi ir sumun gina, nam jik hay lumda, kal hay nagat Magadan.