MATEWUS 14 - BIBALDA TA PELDETTA

Mitta vi Yohana ma Baptisma

¹ Hay na'ta Herod mul ma fiɗina hum labara kay Yesu. Nam di tam sa sunda valamu:

² Kayni mi Yohana ma Baptisma, nam dayawa kulo'o hay mitta pa, kuɗ na'ta nam ka hiɗi gaŋeraŋa kay li ɗekka.

³ Kay jewe Herod vi Yohana, junum hiɗi jaɓna, gum daŋgaya kaw, kuɗ Herodiya cata vi ɓasulumna Filip.

⁴ Kay Yohana di tam Herod ala vun-ma-gatna hinaŋ va'ɗi.

⁵ Nam gar kay ci Yohana goyo, may tuwam nar kay sumuna, kay sumuna ka ɗuw Yohana ki sa ma jobta-Lawna nala.

⁶ May hay buurta vi yuldeta vi busata vi vu'da vi Herod, goota vi Herod pir nulla vok sa yiyna, liwta va'a firi dik Herod ŋolo,

⁷ ta-ta nam yi va kalam ala la na' jobom mige kaw nam min vula'ta.

⁸ May su' ga' ya'a: Na' ka jobom ala: Naŋ ma vulan yam Yohana ma Baptisma tani hay tasata.

⁹ Mulla dikam muɗ yora, may kay va ma nam yum kalamna, kuɗ nisi sa dakay ti hiɗi namu kaw, nam vul hagata kay nisi ma vula'ta.

¹⁰ Nam gi sunu hay liy ma daŋgayna kay ka yam Yohana.

¹¹ Nisi mar yam Yohana hay tasata, vulum mi goota, goota tuɗum tam su'a.

¹² Sa hatayna valam ma'a, nisi slum tuwamu, pumu may. Nisi kaliya, vi labar namna mi Yesu.

Yesu muɗ fun goy dak-dak sem ma jewna

¹³ Hay liy ma Yesu hum kayni, nam ɓe hay lumna, kal goy hay liyn ma ŋayaya hay fulda; hay li ma sumuna hum kayni, nisi hin hoyok-ziyna, pat kuɗum hiɗi sesiya.

¹⁴ Hay li ma nam kalay goy hay lumda, nam wi sumun ŋol ɦini ɦini', nisi muɗ kiram hawi, nam muɗ sa moyna visi goy ŋaa'a.

¹⁵ May hay li ma liyn laawa vulatiya, sa hatayna valamu ma talamu dumu: Liyn kayni goy fulu, fatta kalay kaw, kay na'ta hinaŋ sumun mera, kay nisi fi tuɗ hay hoyok-ziyna, gus sle ma ti vunsiya.

¹⁶ Yesu disiya: Nisi may tu'ɗi, nigi kay tuwgiya vulsi va ma tina.

¹⁷ May nisi dumu: Tani numa ka hiɗi fun vasl ɦawa, kuluf ma' may.

¹⁸ Nam disiya: maramay tani.

¹⁹ Nam vul hagata tam sumuna kay nisi ma mol gaa'a kay usna. Nam yaw fu ma vaslna hiɗi kuluf ma ma'na, ɗuw iram kulo wuralawna gi bolo, nam ɓuraw funa, vul mi sa hatayna, sa hatayna ɓurawam tam sumuna may.

²⁰ Nisi kaf ti'e hobay kaw. Diram ma hinina nisi yawam kulo'o, nam oy tikisin doogo yam ma'.

²¹ Jufayna sa ti fu namna ir birim vasl, boyna hiɗi gurosgurayna may ŋaɓay hayɗi.

Yesu poy kay niyna

²² Bugol kayn neeɗa, nam so'ot sa hatayna valam hiɗi dono'o kay nisi ma jik hay lumna, kay tuɗis vokomu hay gal hena vi niy-lumna, may nam kay tuwamu hinis bugolo kay gi ir sumuna.

²³ Hay li ma nam gi ir sumun gina, nam jik kulo kay hiɗiyta goy ŋayaya kay siɗawa. Hay li ma vulatit coowa, nam ay ɗawni valam kepe.

²⁴ Hay na'ta lumda kalay goy way niyna ir gine neeɗa hiɗi deŋella, ɓalla ka ɦiwir lumda, kay simeɗ ma biwna ka tuɗay kirsi hay'.

²⁵ May hay ŋomda fiɗita hay henjeta, nam ka tuɗ kulo kay niyna, nam ma tisiya.

²⁶ Hay li ma sa hatayna wum tuɗ kulo kay niyna, nisi muɗi nari, nisi di'e: Kilan mi fulu, nisi ciriy ŋolo kay narta.

²⁷ May gosoy na wit', Yesu ka di tisi ala: Vigi dikgiya, kilan mi nanu, ligi nar noŋɗi.

²⁸ Peter hot dumu: Bum-sumuna, la kilan mi naŋu, vulan hagatiya kay nan min tuɗis kay niyn taŋu.

²⁹ Yesu dumu: Naŋaya. Peter jikay goy hay lumda pa ma tam Yesu.

³⁰ May hay li ma nam wi simeɗn biw ŋolo, nam muɗ nari, tun caw sir gaa'a, nam siwela di'e: Bum-Sumuna, suɗan suɗge!

³¹ Wulini wulini, Yesu meɗ ɓalam goyo vumu dumu: Naŋ ma vida vaŋ kiɗayna, naŋ giriŋa kay mige?

³² Hay li ma nisi jik kulo hay lumda, simeɗna tun gaa'a.

³³ May nisi sa hay lumda girif gaa vokomu di'e: Naŋu mi goora vi Lawna gasi.

³⁴ Hay li ma nisi jik kulo gal hena jikŋa, nisi ma hay nagata vi Genesaret.

³⁵ Hay li ma sum sa hay liy namna wumu, nisi gi sunu hay naga ma ŋuyi galamna kaf, nisi mar sa moyna kaf talamu.

³⁶ Nisi siɗawam kay nisi min jom mi vun-sligara valam ɦawa. Nisi kaf sa jo vun-sligara valamna muɗi goy ŋaa'a.