MATEWUS 13 - BIBALDA TA PELDETTA

LAW MA NIR-NIRAMNA KAY MULDA Law ma nir-niramna kay sa ma cuk jafna

¹ Hay buur na'ta Yesu kal goy hay ziyn pa, tuɗ mus goy kel niy-lum ma ŋolla.

² Sumun dak talam ŋolo, ta-ta nam tuɗ mus goy goloŋ hay lumda, sumun kaf mol kulo deŋele may.

³ Nam kus yoboyn tisi ŋolo hay law ma nir-niramna, disiya:

⁴ Sa ma was-jafna kal goyo kay wasam gaa'a. Hay li ma nam ka was jafna, jaf hena wasi gaŋ hagata, layayna ma'a tumu.

⁵ Hena wasi kay liy ma hiɗiyna, hay li ma nam fi nagat gaa kuɗum ŋolɗi, nam dayay kulo gosoyo, kay nagata may gaa kuɗum zulɗi.

⁶ Hay li ma fatta dayawa kulo'o, nam war goyo, kay sutiyam mayɗi, nam cap so goyo.

⁷ Hen wasi jar zigiyna, zigiyna wul kulo'o, muruɗumu.

⁸ Hen wasi hay nagata ta ŋaata, nam li jafi, hen yaw kis, hen yaw dok-karkiya, hen yaw dok-ɦidi.

⁹ Sa ma humam ka'a, nam ma huma.

¹⁰ Sa hatayn ma talamu dumu: Naŋ di yoboyn tisi hay law ma nir-niramna kayn kay mige?

¹¹ Yesu hotsi dita: Vuli tigi nigiya kay wi caw ŋayayta vi mulda-wuralawna, may kayni may vuli tisiɗi.

¹² Kay sa ma falam ka'ana, talamu ma vulumis lo, kay nam ma hob hiɗi slen ŋolo. May sa ma falam mayɗina, va ma ka kalamu ma sliys goy kalamu.

¹³ Kay na'ta nan kus yoboyn tisi hay law ma nir-niramna kayni, kay nisi ma wi'e, may wi ŋaaɗi, kay nisi ma huma, may humum cawamɗi.

¹⁴ Va ma Esaya di vokom kisina vunam hobiya, ma nam di ala: Nigi ma hum ŋaa'a, may nigi ma humum cawam noŋɗi, nigi ma ɗuwa, may nigi ma fi wi noŋɗi.

¹⁵ Kay sumun kayni diksi muɗi liŋ-liŋi, Humsi muɗi hum zeŋ-zeŋe kaw, Irsi kaw nisi dukum duk' Kay nisi may wi hiɗi irsiɗi, Hum hiɗi humsiɗi kaw, Wi goy haraŋ hay diksiɗi kaw, Fi hama kay nan ma muɗsi goy ŋaaɗi kaw.

¹⁶ May sle'ta ka kay irgiya, kay irgi ka wi'e, sle'ta ka kay humgiya kaw, kay humgi ka huma.

¹⁷ Nan digi gasita, sa jobta-Lawna hiɗi sa ɗigera ŋolo gar a wi sle ma nigi ka wum wulini, may nisi as a wumɗi, nisi gar kay hum caw sle ma nigi ka humum wulini, may nisi as a humumɗi.

¹⁸ Humgi caw law ma nir-niramna kay sa ma cuk jafna:

¹⁹ Hay li ma san hum yoboyna kay mulda may nam humum cawamɗi, hay na'ta ma joona ma'a, yaw yoboyna ma wasay hay dikamna goyo. Kayni mi nam ma wasay gal hagatna.

²⁰ Nam ma wasay kay liyn ma hiɗiyna, kayni mi nam ma hum yoboyna, wulini wulini nam vum hiɗi firita,

²¹ may sutayn may hayamɗi, nam mus hay vid neeɗa, may hay li ma zumalda hiɗi lasta fokawa kulo'o kuɗ yoboyna, nam hor de'.

²² Nam ma wasay jar zigiyna kayni, mi nam ma hum yoboyna, may varta kay slena vi nagata hiɗi nemda vi farayna muruɗ yoboyn goyo, nam li jafɗi may.

²³ May nam ma wasay kay nagata ŋaata kayni, mi nam ma hum yoboyna, humum cawam kaw, nam li jafi, hen yaw kis, hen yaw dok-karkiya, hen yaw dok-ɦidi may.

Ciŋira

²⁴ Nam di law ma nir-niramna mara lo ala: Mulda-wuralawna ŋray ca hiɗi sa ma was jaf ma ŋaana hay sinena valamu.

²⁵ May hay li ma sumuna ka buri sene, sa ma gawt kalamna co'o, nam was ciŋira jar alkamarena, kalay malamu may.

²⁶ Hay li ma alkamarena wulawa kulo'o, yalam cukawa kaw, ciŋira ɗek tuwam goyo kaw.

²⁷ Wulini sa sunda vi bum-ziyna co'o dumu: Bum-ziyna, naŋ wasam hay sinena vaŋ kayni may mi jaf ma ŋaana ɗisu? Ciŋira may hayam kayn arige pa?

²⁸ Nam disiya: Lum kayni si sa gawt kanna. Sa sunda valamu dumu: Naŋ min ala numa'a ma tuɗ patam kulo'o su?

²⁹ Nam disiya: A'a patamɗi, kay la li ŋalɗi, alkamaren ma pat kulo kuɗ ciŋira.

³⁰ Hinim wul ma' pete ta-ta hay feɗna. Hay li ma feɗna maawa, nan ma di tam sa feɗna kay nisi ma tok ciŋira jewe, junumu ŋalam goyo; tok alkamarena hay feera vanu may.

Wal gu-seneve, fun-bay-kufna

³¹ Nam di law ma nir-niramna mara tisi lo ala: Mulda-wuralawna na' ŋray ca hiɗi jaf gu-seneve ma san yawamu, wasam gaa hay sinena valamu.

³² Nam gooro suw jaf-gun kafe, may hay li ma nam wulawa, nam muɗ ŋolo suw hadafna kafe, muɗ goy guwa, ta-ta layayn ma dukalawna kaw ma'a tun tokosayna valam hay humamu.

³³ Nam disi law ma nir-niramna mara lo ala: mulda-wuralawna ŋray ca hiɗi isna ma cat yawamu, kom jar futuw ma ir tasa ɦidina, ta-ta futuwn muɗ kuf kafe.

³⁴ Slen kayni Yesu dum tisiya hay law ma nir-niramna, nam may law tisiya bay law ma nir-niramna noŋɗi.

³⁵ Kay sle ma sa jobta-Lawna dumna vunam ma hoba, ma di ala: Nan ma mal vunan goyo kay law hay law ma nir-niramna, nan min di goy kay sle ma ay ŋayay ŋay hay cawa'ta tunita vi nagata pa.

Nam di caw law ma nir-niramna kay ciŋira goyo

³⁶ Bugol kayni nam hin sumun kala. Nam kal kalaf hay ziyda. Sa hatayna valamu ma talamu dumu: Law ma nir-niramna kay ciŋira ma hay sinen kayni naŋ dumat cawam ay goyo.

³⁷ Nam disiya: Sa ma was jaf ma ŋaana kayni mi goora vi sana.

³⁸ Sinena kayn ti nagata, jaf ma ŋaana kayni si gurona vi mulda, may ciŋira kayni gurona vi ma joona.

³⁹ Sa ma gawta ma wasam hay sinen kayni mi Matna, feɗna kayni mi vun dabaŋ-gu'ta vi nagata; sa feɗna kayni si sa sunda-wuralawna.

⁴⁰ Ki nisi tok ciŋira ŋalam goyo hay kuta nala, hay dabaŋ-gu'ta vi nagat ɗawn kaw van ma li ki kayn nala.

⁴¹ Goora vi sana ma cuk sa sunda valam goyo, sle ma dab sem sumuna hiɗi sa li jiw-zlata kaf nisi ma patsi goy hay mulda valamu.

⁴² Nisi ma cuksi hay zul ma kuta, hay liyn ma nisi ma tiya, mut siysiya kaw.

⁴³ Hay na'ta sa ɗigera ma wile ki fatta nala hay mulda vi busiya. Sa ma humam ka'a, nam ma huma.

Farayna ma ŋayayna

⁴⁴ Lo mulda-wuralawna ŋray ca hiɗi va ma jifiya ma gusta valam ti ŋolo ma ŋayay gaa hay sinena; ma san fumu, ŋayam mara lo. Hay firita vi dikamu nam kal goyo, gus slena valam kaf goyo, nam gus sine namna.

⁴⁵ Lo mulda-wuralawna ŋray ca hiɗi sa ma tok yam farayna ma gar kerme ma ŋaana.

⁴⁶ Hay li ma nam wi kermenawa kep ma gusta valam ti ŋolo, nam kal goyo, slena valam kaf nam gusum goyo kay gus kerme namna.

⁴⁷ Lo, mulda-wuralawna ŋray ca hiɗi dena ma san cukum goloŋo, nam vi kulufn kuɗ jafam kaf.

⁴⁸ Hay li ma den hobawa, nisi tanam kulo deŋele, bugolda nisi lak gaa'a kay vilek kuluf ma ŋaana hay kacegara, may ma joona nisi cukum goyo.

⁴⁹ Van ma li ki kayn nala kaw hay vun dabaŋ-gu'ta vi nagata, sunda-wuralawna ma tuɗ goyo kay poŋ ir sa joona goy hiɗi sa ɗigera,

⁵⁰ Sa joona nisi ma cuksi hay zul ma kuta, hay li ma nisi ma tiya, mut siysiya kaw.

⁵¹ Nigi hum caw slen kaynawa kafe su? Nisi hotom dit ala awa.

⁵² Nam hot disi lo ala: Sa ma wi-ɗota ma hatay kay lawta vi mulda-wuralawna, nam ŋray ca hiɗi bum-ziyna ma yaw sle ma wulina hiɗi sle ma busayna ay goy hay timgilla valam pa nala.

VATTA VI LOPNA VI YESU HAY GALILEYA Yesu hay Nasaret

⁵³ Hay li ma Yesu vat law ma nir-niramna kayni vatna, nam hin liy namna, kalay goyo.

⁵⁴ Nam ma hay nagata valamu, hatsi hay sinagogayna visiya. Ta-ta nisi muɗ ɦuyum', nisi di'e: San kayni fi yalla hiɗi lop ma gaŋeraŋ ki kayn nala ay gal arige pa?

⁵⁵ Kayni may mi goora vi sa ma ceɗ gun kilanɗi su? Sulumu ya' Mariya ɗisu? Ɓosiyomna Yakub, Yosef, Simon hiɗi Yudas kaw naɗi su?

⁵⁶ Ɓosiyom sa boyna ka jaray wulin kaf lak' ɗisu? Slen ma ki kayn nala nam fumi pet kayn arige?

⁵⁷ Nam muɗ mi va ma dabsi sesiya. May Yesu disiya: Sa ma jobta-Lawna sa ɗuwum birek-cek kayni hay nagata valamu, hay ziyna valamu kaw.

⁵⁸ Ɗawni nam may li ɗekka ŋolɗi kuɗ bay-vida visiya.