MATEWUS 11 - BIBALDA TA PELDETTA

¹ Hay li ma Yesu vul hagata tam sa hatayna valamu sa doogo yam ma'na vulla, nam kal goy ɗawni pa, kay hata, kay kus yoboyna kaw hay hoyok-ziyna visiya.

SUMUN TUN CAW TEL LOPNA VI YESU Jobta vi Yohana ma Baptisma tam Yesu

² May hay li ma Yohana ma Baptisma ka hay daŋgayna, nam hum labara kay lopna vi Kristu. Nam cuk sa hatayna valamu kay tuɗ di tam Kristu ala:

³ Naŋu mi nam ma min ma'a lebo numa'a ma cub sa mara su?

⁴ Yesu hot dita disiya: Tuɗgiya, digi Yohana kay sle ma nigi humumna, ma nigi wumna kaw:

⁵ Sa dukina muɗi wi'e, sa dirlayna muɗi poya, sa moy-kuturuna yeray goyo, sa gidiŋŋa muɗi huma, sa mitina fokay kulo'o; labara ma firina ka kusis tam sa hawna.

⁶ Sle'ta ka kay sa ma nan muɗ kiram bisɗi.

⁷ Hay li ma sa hatayna vi Yohana kalawa, Yesu tun caw law goy kay Yohana tam sumun ala: Nigi kal goy hay fulda kayni kay ɗuwum mi mige? Cerewna ma geɗ kuɗ simeɗna su?

⁸ Nigi kal goy kayni kay ɗuw mige? Kay ɗuw sa ma cuki hiɗi sligara ma ŋaan su? May nisi sa cuk sligar ma ŋaana ka vo hay ziyna vi muliyana.

⁹ Nigi kal goy kayni kay ɗuw sa ma jobta-Lawna su? Awa, nan fi digi ala nam suw sa ma jobta-Lawna.

¹⁰ Nam kayni mi ma ɗot di kalam ala: Humaŋu nan gi sa ma sunda vanu vok iraŋu, Nam ma par hagata goy vokaŋu.

¹¹ Nan digi gasita: Jar nisi sa boyn vuɗsin kaf sa ma ŋol suw Yohana ma Baptisma bay fok kulo tuwa, may sa ma goora hay mulda-wuralawna suwum namu.

¹² Hay liyna vi Yohana ma Baptisma pa ta-ta wulini, mulda-wuralawna muɗi dono'o, nisi sa cuk haya'na kirit hiɗi dono'o.

¹³ Kay sa jobta-Lawna kaf hiɗi gatta kaw di goy kay sle ma vokayna ta-ta tam Yohana;

¹⁴ La nigi min vi kayni, namu mi Eliyas ma min ma'a.

¹⁵ Sa ma humam ka'a kay huma, nam ma huma.

¹⁶ Jaf-sum nisin kayni nan ma ŋrasi hiɗi gige? Nan ma ŋrasi hiɗi gurosgurayna sa lak hay lumuna siwel tam nuroysin ala:

¹⁷ Numa'a buw difna, may nigi min pir nulɗi, Numa gi nul ma yorta, may nigi min yor tuwgiɗi.

¹⁸ May hay li ma Yohana ma'a, nam tiɗi, ciɗi kaw, may nisi di'e: fuliyan ka kalamu.

¹⁹ Wulini goora vi sana maawa, nam ti'e ci'e, may nisi di'e: Ɗuwgi sa ma haramna ma ci vinna tige, boniyomna si sa tar vun-lumuna hiɗi sa sulukŋa. May yalda muɗawa goy ɗigere kuɗ lopna valamu.

Yesu ka law tam sumuna

²⁰ Hay na'ta Yesu tun caw law dono ŋolo tam hoyok-ziy ma nam li ŋol ɗekka valam hayna, kay sum sa hayamna min hamɗi.

²¹ Joot kagu Korasin, joot kagu Betsayda, kay lop ŋulo ma gaŋeraŋ ma nan lum haygin lakŋi, lali nan lum liy hay Tirus hiɗi Sidon, nisi hamay ɓa-ɓa, lak dawni hay sligar bolla hiɗi butuwna kaw.

²² May nan digiya: Hay buura vi kitat ɗawni, nigi ma fi joot suw Tirus hiɗi Tirus hiɗi Sidon.

²³ Nak Kapernawum, nak ma wul kulo'o ta-ta dukalawna su? Yag ma hot gaa'a ta-ta hay liyna vi sa mitina, kay lop ma gaŋeraŋa ma li hayagŋa lum liy hay Sodoma ni, ta-ta vaydi kaw Sodoma bay ɓulaka.

²⁴ May nan digiya: Hay buura vi kitata nigi ma fi joot suw Sodoma.

Labara ma firina ɗeki goy kir gurosgurayna

²⁵ Hay na'ta Yesu sli ditiya di'e: Nan gaŋ deɓe bunu, mul ma wuralawna ma nagatna kaw, kay naŋ ŋay slen kayni kir sa yalla hiɗi sa hum caw yoboyna, may naŋ vulum goy haraŋi kir gurona.

²⁶ Awa bunu, kay a li nala kayni may goy hay varta vaŋ pa.

²⁷ Slen kaf vulanti ay mi buni pa, sa ma wi goora mayɗi, wum mi bumna kepe; sa ma wi bumna mayɗi, wum mi goora kepe, hiɗi nam ma goora min vulum goy haraŋi kiramu.

²⁸ Nigiyay tanu, nigi kaf sa makaya, hiɗi nigi sa jak ma nekŋa tuni kigina, nan min vulgi tun-suku.

²⁹ Sligi jukŋa van kigiya, vigi hatta vanu, kay nanu mi sa ma ŋali, dikan ŋal klasi kaw, nala nigi ma fi tun-sukka kay ciwta vigiya.

³⁰ Kay jukŋa van kayni golɓoto, jakŋa vanu hefteŋe kaw.