MATEWUS 10 - BIBALDA TA PELDETTA

Yesu cuk sa hatayna sa doogo yam ma'na

¹ Bugolda Yesu yi sa hatayna valamu doogo yam ma' talamu. Nam vulsi donota kay digiɗ fuliyan ma liwisna goyo, kay muɗ sa moyna hiɗi sa maŋayna kaf goy ŋaa'a.

² Kayni semda vi sa hatayna sa doogo yam ma'na: Ma jewna mi Simon ma yum Peter, hiɗi ɓasulumna Andre, Yakub goora vi Sebedew, hiɗi Yohana ɓasulumna,

³ Filip hiɗi Bartelemi, Tomas hiɗi Matewus ma tar vun-lumuna, Yakub goora vi Alfewus hiɗi Tadewus,

⁴ Simon ma Kanaaniyana, hiɗi Yudas Iskariyot ma di newt kalamna.

Nisi cuki sunu

⁵ Kayni nisi sa doogo yam ma'na sa Yesu cuksi sunna. Hay li ma Yesu cuksi sunu, nam disi ala:

⁶ Nigi ma tuɗ tam sa ɦawanɗi, nigi ma cuk kulo hay hoyok-ziyna vi sa Samariyanɗi, may tuɗgi tam fok-dimi ma bay-goyna hay jafna vi Israyel.

⁷ tuɗgi goy hay hagata, kusgi yoboyna, digi ala: Mulda-wuralawna maawa goboyo.

⁸ Yergi sa moyn goyo, daygi sa mitin kulo'o, porgi sa moy-kuturun goyo, digiɗgi fuliyan goyo kaw. Nigi fi ɦawa'a, nigi ma vul goy ɦawa'a kaw.

⁹ Ora hiɗi doorota hiɗi wayna nigi ma yawam kigi hay birimna vigiɗi.

¹⁰ Sligi birim ma rogoy kigiɗi, sligara ma cukŋa ma' ma'ɗi, tugurunɗi, zugulɗi kaw, kay sa ma li lopna nagay kay wurakŋa valamu.

¹¹ La nigi cuk hay hoyok-ziyna ma ŋolla lebo ma goora kaw, nigi ma job labara, la sa ma nagay kay vigi ka'a, nigi ma lak vo valamu ta-ta hay li ma yam rogoyt vata.

¹² Hay li ma nigi min cuk vo hay ziyna, nigi ma li juway' jewe.

¹³ La ziyna nagay kay kayni, toyta vigiya ma mus kalamu. May la nam nagay kay kaynɗi, toyta vigiya ma hot tigiya.

¹⁴ La sum sa hay ziyna min vigiɗi, hum yoboyna vigiɗi kaw, hay li ma nigi cuk goy hay ziyna hiɗi hoyok-ziyna kayni, nigi ma po butuw ma segin goyo.

¹⁵ Nan digi gasita, hay fatta kitata ɗawni, hoyok-ziy namna ma fi joota ŋolo suw Sodoma hiɗi Gomora.

Nisi ma fi lasta

¹⁶ Ɗuwgiya, nan cukgi ɗawni ki fok-dimina jar hotna nala, nigi ma li yali ki guyna nala, ŋali ki gukka nala may.

¹⁷ Ŋomgi tuwgi kay sumuna, kay nisi ma vulgi goyo hay ɓam sa kitana, nisi ma watgiya hay sinagogayna visiya,

¹⁸ awa, kuɗan nanu nisi ma nargi vok guvernera hiɗi muliyana kaw, kay nigi ma li di-goyta tisiya, tam sa waana kaw.

¹⁹ May hay li ma nisi vulgi goyo, hingi dikgi ɓirgi kay va ma nigi ma dumnaɗi, va ma nigi ma dum tisina nigi ma fum ɗawn hay liy namna.

²⁰ Kay di ɗawni may si nigi kay tuwgiɗi, may Ŋusta vi bugiya ma ɗekgi va ma nigi ma dumna.

²¹ Sa hena ma vul ɓasulumna goy tam mitta, bumna ma vul goora valam goyo kaw, gurona ma yaw kulo'o kay sumaysiya, ma cisi goyo kaw.

²² Sumun kaf ma ka gawt kigiya kay semda vanu, may sa ma vi'e ta-ta hay dabaŋ-gu'ta, nam ma fi su'da.

²³ La nisi lasgi hay hoyok-ziy mara'a, pirgi hay hoyok-ziyn hena kaw, nan digi gasita, nigi ma ŋuy hoyok-ziyna vi Israyel kafɗi, ta-ta goora vi sana ma co'o.

Deŋga

²⁴ Sa ma hatayna nam ŋol suw sa ma hatamnaɗi, gorvona nam ŋol suw mulamnaɗi kaw.

²⁵ Sa ma hatayna ma li ki sa ma hatamna nala, gorvona ma li ki mulamna nala kaw. May la bum-ziyna nisi yum ala Beelzebul, sa vo valamna nisi ma yisi nala suwa.

²⁶ Ligi nar kisiɗi, kay va ma yalam baray bar ma ba bay ma goy haraŋɗi mayɗi,

²⁷ Va ma ŋayaya ma sa ba bay wum mayɗi. Va ma nan digit hay jufunda kayni nigi ma dum goy hay haraŋa, va ma nan kuɗukum hay humgina, nigi ma siwelem kulo'o kay yam-ziyna.

²⁸ Sum sa ci tuwn goyo may ci ciwt goyɗina nigi ma li nar kisiɗi, may ligi nari kay nam ma as ci ciwt goyo, ci tuwn goyo kaw, cukum goy hay kuta tewɗita.

²⁹ san as gus colgon goy ma' kay sisi kepɗi su? Kep jaram kaw ma nig gaa kay nagata bay minda vi bugiya mayɗi.

³⁰ Ɗuŋus ma kigin kaw ŋay kalam kafe.

³¹ Kay na'ta ligi narɗi, kay nigi gus lopo suw colgona.

³² Kay na'ta la san di goy kanu vok sumuna, nan ma di goy kalamu vok bunu ma hay wuralawna;

³³ may la san puw vunam kanu vok sumuna, nan ma puw vunanu kalamu vok bunu ma hay wuralawna.

Sa ma hatayna hiɗi ziyna valamu

³⁴ Nigi ma var ala nan mar sle'tawa hay nagata nigi ma var naɗi, may nan maram kayn mi kew-gaferaŋa.

³⁵ Nan ma kayni kay san ma ɓuraw goy hiɗi bulumu, kay goota ma ɓuraw goy hiɗi su'a, kay cata ma ɓuraw goy hiɗi sum jufa'a.

³⁶ Sana ma ka gawt hiɗi sum sa vo valamna.

³⁷ Sa ma min bulumu kla sulumu kla suwan nanu, nam may nagay kanɗi. Sa ma min goora lebo goota suwan nanu, nam may nagay kanɗi.

³⁸ Sa ma ziy grakŋa valamu kay tuwamu kay tap kuɗanɗi, nam may nagay kanɗi.

³⁹ Sa ma fi irita valamawa, nam ma ba'a, may sa ma ba irita valamawa kuɗan nanu, nam ma fa'a.

⁴⁰ Sa ma vigiyawa hiɗi firita, nam van nanawa hiɗi firita kaw, sa ma van nan hiɗi firita, nam vum kayn mi bun ma ganina.

⁴¹ Sa ma vi sa ma jobta-Lawnawa hiɗi firita hay semda vi sa ma jobta, nam ma fi wurakŋa ki sa ma jobta-Lawna nala, sa ma vi sa ma ɗigera ki sa ma ɗigera nala, nam ma fi wurakŋa ki sa ma ɗigera nala may.

⁴² Nan digi gasita: La san vul niy ma sleɗna ne' ɦawa kaw a ci'e mi kep jar guron lakŋi kuɗ ta ala nisi si sa hatayna ni, wurakŋa valamu ma ba goy ɦawa noŋɗi.