MARKUS 9 - BIBALDA TA PELDETTA

¹ Bugol kayni Yesu disiya: nan digi gasita, sum sara ka jaray tan lak, nisi ma jugo mittaɗi, ta-ta nisi ma wi mulda-wuralawna ma hiɗi donota tuwa.

Yesu jok nafaramu

² Buur karkiya bugolda, Yesu yaw Peter hiɗi Yohana hiɗi Yakub kuɗumu, kalsi kulo kay hiɗiyt fiyokka goy ŋayaya, tuwam muɗ goy kirsi haraŋi.

³ Sligara valam muɗ wile pirik pirik, haɓ tal-tal', haɓ tara ta gaa kay nagata ta ŋra hiɗi kayn tayɗi.

⁴ Eliyas hiɗi Musus vul tuwsi kirsiya, nisi kus yoboyn hiɗi Yesu.

⁵ Peter sli ditiya di tam Yesu: Rabbi, ŋaa'a kay nay lak tani, nay inay guɗuk hiɗi: kep kaŋ naŋu, kep kay Musus, kep kay Eliyas may.

⁶ Peter di ki kayn nala kayni, kay nisi wi va ma diɗi, kay nisi muɗi nar ŋolo.

⁷ Ɗugulla ma'a, duksi gaa'a, del may kulo hay ɗugullay pa, ka di ala: zawni mi goora ma hayan kalamna, humgi kuɗumu.

⁸ Bugolda sa hatayn ɗuw jar-tuwsi kayni, liyn wah', nisi wi sa mara loɗi, may nisi wum mi Yesu jarsi valam kep zaw.

⁹ Hay li ma nisi jikay gaa kay hiɗiyt pa jikŋa, Yesu gatsi vunsi ala va ma nisi wumna nisi ma dum goy mi saɗi, ta-ta hay li ma goora vi sana ma day kulo'o hay mitta tuwa.

¹⁰ Nisi hum dita na'ta. May nisi ka job tuwsi jar-tuwsi ala: Va ma yum ala dayta-kulota jar sa mitin pa kayni mi mige?

¹¹ Sa hatayna ka jobom ala: sa wi-ɗota di ala Eliyas ma co jewe kayn kay mige?

¹² Nam hotsi dit ala: Eliyas ma co jewe, nam ma kot slen goy kafe. May ɗot ɗo'ay kay goora vi sana anige? Ala nisi ma lasam ŋolo, ma ɗuwum birek-ceke kaw ɗisu?

¹³ May nan digiya: Eliyas may vatiya, may sumuna li talamu ki nisi min nala kuɗ va ma ɗot di kalamna.

Sa ma ful kalamna yeray goyo

¹⁴ Hay li ma nisi hotay tam sa hatay segena, nisi fi sumun tokay tisi ŋolo, sa wi ɗota ka ci way hiɗi nisiya.

¹⁵ Hay li ma sumun wi Yesu, suksi yaw kelsiya, nisi jaŋay talamu kay gum deɓe.

¹⁶ Yesu jobsiya: Nigi ci wayt hiɗi nisi kayn kuɗ mige?

¹⁷ Sa kep jar tokŋa hot dit talam ala: Bum-yalla, nan maraŋ goora vanawa kay ful ma numulla ka kalamu.

¹⁸ Arigekaw hay li ma fulla tunawa lumu, nam gum gaa kay nagata, nam tir tuwam goyo, vunam gi kufa'a, nam tun caw mut siyamu, nam so goy ɗeŋe. Nan siɗaw sa hatayna vaŋu kay nisi digiɗim goyo, may nisi as kay kaynɗi.

¹⁹ Nam hot dit tisi ala: Nigi jaf ma bay-vina, nan ma mus hiɗi nigi ir atage? Nan ma li ŋal hiɗi nigiya ir atage? Maran gooray tani.

²⁰ Nisi maram tam Yesu, hay li ma goora wi Yesu, fulla tirim goy dono'o, nam nig gaa kay nagata, vunam gi kufa kiɗif kiɗif.

²¹ Yesu job bulumu, moyn vum ki kayn nala kayn lancitige? Bulum di'e: hay gooromi pa.

²² Sem ŋolo moyn gum hay kuta, hay niyn kaw, kay cum goy mati. May la naŋ fi li va'a, hinma muɗ kiraŋ hawi muɗge, gutaŋ kuɗma gutge.

²³ Yesu dumu: La nan fi li va'a? Slen pet fi li'e kay sa ma min vi'e.

²⁴ Wulini wulini bum goora siwela di ala: nan vi'e, gutaŋ kuɗ bay-vida vanu gutge.

²⁵ Hay li ma Yesu wi sumun ka jaŋay tisiya, nam bay ful ma numulla dumu: Naŋ ful ma vunaŋ diɗi lay humɗi layna, nan daŋu, kalaŋay goy kalamu, hot cuk kalam loɗi.

²⁶ Fulla siwela, hiwir goor dono ŋolo, patay goy kalamu. Goora ni gaa'a, ŋel se'eteŋ, sumun ŋolo jar sa dakayna var ala nam mitiya.

²⁷ May Yesu vum ɓalamu, colom kulo'o, nam col kulo'o may.

²⁸ Hay li ma nisi co vo'o, sa hatayna valam jobom goy ŋayay ala: numa may digiɗ ful namna goyɗi kay mige?

²⁹ Nam disiya: Jaf ful ma ki kayn naana digiɗim goy kayn say hiɗi siɗawta.

Yesu ka di-goy kay mitta hiɗi dayta-kulota valamu

³⁰ Nisi yaways ɗawn pa jik hay Galileya. May Yesu may min ala sa ma wumuɗi.

³¹ Kay nam ka hat sa hatayna valam ala: goora vi sana ma vulis goy hay ɓam sumuna, nisi ma cum goyo, may buur ɦidi bugol mitta nam ma day kulo'o.

³² May sa hatayna ay wi caw yoboyn kaynɗi, nisi li nari kay jobom cawamu kaw.

Sa ma ŋol suw segen kafna

³³ Nisi ma hay Kapernawum. Hay li ma nisi coowa vo'o, Yesu ka jobsi ala: nigi ci wayt jar-tuwgi ay hay hagat kayn kuɗ mige?

³⁴ Nisi duk vunsi ɓurut, kay hay hagata nisi ay ci way jar-tuwsi ala ma ŋolla jarsi mi gige?

³⁵ Nam mus gaa'a, yi sa doogo yam ma'na, ka disi ala: La sa jargi min muɗ ma jewna, hinim muɗ tuwam goy mi ma cawsi kafna, mi ma sunsi kafna kaw.

³⁶ Bugol kayni nam vi goorgoor kep, colom jarsi zaw, bugol nam vul kulo kalam kayna, nam disi ala:

³⁷ la san gigekaw min vi goorgoor ki kayn nala hiɗi firita hay semda vanu, nam van nanu kaw. Gigekaw ma van nan hiɗi firita, nam vanti kayn mi nanɗi, may mi nam ma ganina.

Sa ma may gaw hiɗi nayɗi, nam mi fayna

³⁸ Yohana dumu: bum-yalla, numa'a wi sa kepe, nam digiɗ fuliyan goyo hay semda vaŋu, numa'a telemu kay nam may tapay hiɗi nayɗi.

³⁹ Yesu di'e: nigi telemɗi, kay sa ma li gul-yalda hay semda vanu hot law joo'o kan gosoyɗi.

⁴⁰ Kay sa ma hayam may goy hiriŋ tayɗi, nam tap hiɗi naya.

⁴¹ Kay gigekaw vulgi niy ma cina hay semda vanu ala nigi si sa fi Kristuna ni, nan digi gasita, wurakŋa valamu ma ba goyɗi.

Suluk ma dab sem sana

⁴² May gurosguray sa viy hay nan lakŋi, la san ɗut goorgoor mara jarsi kep goyo, ŋaat kayni a hiɗiy nekka ma junis kelemu, gumis goy hay niy ma ŋolla.

⁴³ La ɓaŋ nemaŋu, kaam goyo, a naŋ kal hay irita hiɗi ɓaŋ kepe, kayni ŋaa'a suw ma naŋ kal hay zul ma kuta, hay kuta tewɗita hiɗi ɓaŋ ma' petna.

⁴⁴ Hay liyn ma jufulla valam mitɗi, kuta valam tewɗi kaw.

⁴⁵ La gayaŋ nemaŋu, kaam goyo, ŋaat kaŋu a naŋ kal hay irit dirlaya, kayni ŋaa'a suw ma gaŋis hay kuta tewɗita hiɗi gayaŋ ma' pete,

⁴⁶ hay liyn ma jufulla valam mitɗi, kuta valam tewɗi kaw.

⁴⁷ La iraŋ nemaŋu, hulotom goyo, a naŋ kal hay mulda-wuralawn wurliya kayni, ŋaa'a kaŋu suw ma gaŋis hay kuta tewɗita hiɗi iraŋ ma' petna,

⁴⁸ hay liyn ma jufulla valam mitɗi, kuta valam tewɗi kaw.

⁴⁹ Kay san gigekaw kut ma porom goyo hiɗi mandana.

⁵⁰ Mandan kayni mi va ma ŋaa'a, may la mandana muɗawa lemdeke, nigi hot muɗum vi ŋaa ɗawn hiɗi mige? Nigi ma li hiɗi mandan haygiya, lakgi hiɗi toyt jar-tuwgi kafe.