MARKUS 8 - BIBALDA TA PELDETTA

Yesu muɗ fun dak-daki sem ma ma'na

¹ Hay buur namna kayni, hay li ma sumuna dak ŋolo lo, va ma nisi tum mayɗi, Yesu yi sa hatayna valamiya disiya:

² Sumun kayni kiran haw ŋolo, kay nisi ka tokay tan tani ir buur ɦidi, va ma nisi tum mayɗi.

³ La nan hinsi kal vo hiɗi mayt nala, na' ma cosi zuroɓsi hay hagata, kay segen jarsi may goy gine pa.

⁴ Sa hatayna valamu hot dita dumu: Nay as hob sumun tani hiɗi fun goy hay fulda tan ɗawn hiɗi yal mige?

⁵ Nam jobsi ala: Fun ka kigi gaage? Nisi di'e: Fun ka kuma siɗiya.

⁶ Nam vul hagata tam sumuna kay mol gaa'a kay nagata; nam yaw fu ma siɗiyana, gi deɓe, ɓurawamu, vulum mi sa hatayna valamu kay nisi ma ɓurawam goyo, nisi ɓurawam goy mi sumuna.

⁷ Kuluf guray ka kisi ne' ne' kaw, nam gi bol kalamu, vul hagat kay nisi ɓurawam goyo kaw.

⁸ Sumun ti'e, hob kaw, diram ma hinna nisi yawam kulo'o, nam oy tikisi siɗiya.

⁹ Sumun ay ir birim fiɗi nala, nam hinsi kala may.

¹⁰ Wulini wulini nam jik hay lumda, kal hiɗi sa hatayna valamu hay nagata Dalmanuta.

Ɗekka ta may kulo wuralawn pa, kufna vi sa Farisena

¹¹ Sum sa Farisen co'o, nisi tun caw ci way hiɗi Yesu, kay nememu, nisi jobom ala nam ma vulsi ɗekka ay kulo wuralawn pa.

¹² Yesu gi sukam goy hay Ŋusta valam gif' di'e: Jaf-sum nisina gar ɗekka kayn kay mige? Nan digi gasita: Jaf-sum nisina ɗekka ma vulis tisi noŋɗi.

¹³ Nam hinsiya, jik kulo hay lumda lo, hot kulo gal hena.

¹⁴ Sa hatayna yisi jok kay yaw funay kisiya, fun kep ɦawa ka kuɗsi hay lumda.

¹⁵ Nam disiya: Nigi ma li ŋali, nigi ma ŋom tuwgi ŋaa'a kay kufna vi sa Farisena, vi sa Herodiyana.

¹⁶ sa hatayna di jar-tuwsiya: Kayni kuɗ ta ala nay yaw funay kayɗit klasige.

¹⁷ Yesu wi vaara visiya, nam di tisiya: nigi var hay dikgi ala nan di kayni kuɗ ta nigi yaw funay kigiɗita kayn kay mige? Nigi bay wi tuwa, bay hum tuwa kaw su? Dikgi so'otay nala su?

¹⁸ Irgi ka'a may nigi wiɗi, humgi ka'a, may nigi humɗi kaw nala su? Humgi may gigi noŋɗi su?

¹⁹ Hay li ma nan ɓuraw fu ma vaslna kay sum sa birim vasln kayni, diram ma hin goyna oy tikisi gaage? Nisi di'e: Doogo yam ma'.

²⁰ Lo, hay li ma nan ɓuraw fu ma siɗiyan jar sum sa birim fiɗin kayni, diram ma hin goyna oy tikisi gaage? Nisi di'e siɗiya.

²¹ Nala nam disiya: Nigi bay hum va tuwa noŋ su?

Yer-goyta vi sa ma dukina

²² Hay li ma nisi co hay Betsayda cona, sumun mar sa ma dukin kep talamu. Nisi siɗaw Yesu kay nam ma jomu.

²³ nam vi ɓam sa ma dukina, tuɗum goy jam hiɗi ziyna, nam tufum nenen kiramu, ka jobom ala: Naŋ ka wi va su?

²⁴ Nam mal iram goyo di'e: Nan ka wi sumun ki gun ɦawa nala, may nisi ka poy ziwit-ziwit'.

²⁵ Yesu hot tun ɓalam kiram lo, nam muɗ wi'e, muɗ goy ŋaa'a, muɗ wi slen goy haraŋ cetet' kaw.

²⁶ Yesu gum iram vo hay ziyna valamu dum ala: Naŋ ma kal hay hoyok-ziynɗi.

Hamda vi Peter, Yesu di kay mitta valamu

²⁷ Yesu hiɗi sa hatayna valamu kal hay nagata vi Sesariya vi Filipi. Hay li ma nisi ka hay hagata, nam ka jobsi ala: sumun ka di kan ala nan mi gige?

²⁸ Nisi dumu: Segena ala naŋ mi Yohana ma Baptisma, segena ala naŋ mi Eliyas, segena lo ala naŋ mi sa kep jar sa jobta-Lawna.

²⁹ Nam jobsiya: May nigiya di kan a nan mi gige? Peter hot dita dumu: Naŋu mi Kristu.

³⁰ Nam disi kay nisi ma di goy kalam mi saɗi.

³¹ Nam tun caw hatsi ala: goora vi sana ma li las ŋolo, sa maariyana hiɗi muliyan ŋulo sa-ɗifinna hiɗi sa wi-ɗota kaw ma noyom goyo, cum goyo kaw, may buur ɦidi bugolda nam ma day kulo'o.

³² Nam disi goy haraŋi kay slen kayni. May Peter vum goy ŋayaya, tun caw gatamu.

³³ May nam muɗ iramu ɗuw sa hatayna valamu, law Peter ala: Tuɗaŋis goy bugolanu Satan, kay vaara vaŋu may mi vaara vi Lawnɗi, may vaara vi sumun ɦawa.

³⁴ Nam yi sumuna hiɗi sa hatayna valam kaf talamu disiya: la san min tap kuɗanu, nam ma noy tuwam goyo, sli gu-ma-grakŋa valam kulo'o kay tap kuɗanu.

³⁵ Kay gigekaw ma min suɗ irita valamu nam ma ba'a, may gigekaw ma min ba irita valam kanu kuɗ labara ma firina, nam ma suɗa'a.

³⁶ Kay la san fi sle ma hay nagat pete, may ba ciwta valamu ni, ŋaata kalam arige?

³⁷ Va mara ma san as vulum a muɗ ciwta valam hiɗi nam ɗawn mi mige?

³⁸ Kay gigekaw ma li zulo kanu, kay yoboyna van kaw jar jaf-sum sa hay zaman ma vaydina sa li zlata-bulo'o, sa li sulukŋ kaf kayni, goora vi san kaw ma li zulo kalamu hay li ma nam ma'a hay gajijita vi bulumu, hiɗi sa sunda-wuralawna sa peldetna kuɗumu.