MARKUS 2 - BIBALDA TA PELDETTA

Yesu yer sa ma hurɓulin goyo

¹ Bugol buur neeɗa lo Yesu hot hay Kapernawum. Labara jok goy ala nam ka vo'o.

² Sumuna dakay talam ŋolo, muɗ kayni liyn ma lakka may noŋɗi, goy vun-ziyna liyn mayɗi kaw, nam kus yoboyn tisiya.

³ Nisi mar sa ma hurɓulin talamu, sumun kuɗum ziyim fiɗi.

⁴ May nisi fi hagat kay maram tam Yesuɗi kay sumun ka dakay ŋolo, kay na'ta nisi jik kulo kay yam-ziyda, nisi mal baŋan hay ir-ziyda, nisi sir sanay gaa hiɗi va ma buura valamu hay li ma Yesu coli hayamna ɗiger.

⁵ Hay li ma Yesu wi vida visiya, nam di tam sa ma hurɓulina: Goora vanu, sulukŋa vaŋu ɦasawa goyo.

⁶ May sara'a jar sa wi-ɗota ka lakay lak, hay li ma nisi hum yoboyn kayni, nisi di hay diksi kalaf ala:

⁷ San zawni di nala kayn kay mige? Nam ŋul Lawnawa. Sa hena ma ɦas sulukŋ goy ɗawn mi gige? May mi Lawn kepɗi su?

⁸ Wulini wulini Yesu wi hay ŋusam ala nisi ka var haysi kalaf nala, nam disiya: nigi var nala hay dikgiya kay mige?

⁹ Bay lop kayn mi ma di tam sa ma hurɓulin ala sulukŋa vaŋ cukawa goyon lebo, mi ma di ala fokaŋ kulo'o, slaŋ va ma buura vaŋu tuɗaŋun su?

¹⁰ May kayni kay nigi ma wi ala Goora vi sana gaŋeraŋa valam ka gaa kay nagata kay ɦas sulukŋ goyo.

¹¹ nam di tam sa ma hurɓulina: nan vulaŋ hagatawa, fokaŋ kulo'o, slaŋ va ma buura vaŋu, tuɗaŋ vo'o hay ziyna vaŋu.

¹² Wulini wulini nam fok kulo'o, sli va ma buura valamu, kalay goyo kirsi kafe, nisi kaf muɗ ɦuyum', nisi subur Lawna ka di'e: Ir sle ma ki kayn nala numa bay wum tuwa.

Yita vi Levi, lawta vi laata

¹³ Yesu kal ay goy deŋel niyn mara lo. Sumun kaf tok talamu, nam tun caw hatsiya.

¹⁴ Hay li ma nam raw vokomu, nam wi Levi goora vi Alfewus, musi hay liyn ma tar vun-lumun dam', nam dumu: Tapaŋay kuɗanu. Nam fokay kulo'o, tapay kuɗ Yesu.

¹⁵ Bugol kayni Yesu ti fun vo vi Levi. Sum sa tar vun-lumuna hiɗi sum sa sulukŋa ŋolo lakay gaa'a kay ti fun hiɗi namu hiɗi sa hatayna valam kaw, kay nisi ay tapay kuɗum ŋolo.

¹⁶ Hay li ma Yesu ka ti hiɗi sa tar vun-lumuna hiɗi sa poyta visi joona kaw; sa wi ɗota hiɗi sa Farisena ka di tam sa hatayna valam ala: Nam ti'e ci kaw hiɗi sa sulukŋa hiɗi sa tar vun-lumuna kayn kay mige?

¹⁷ Hay li ma Yesu hum kayni nam di tisiya: sum sa bay moyna gar doktorɗi, may gar doktor si sa moyn tisina, nan ma kayni kay gar sa ɗigeraɗi, may sum sa sulukŋa.

¹⁸ Sa hatayna vi Yohana hiɗi sa Farisena li laata, nisi maawa dumu: Sa hatayna vi Yohana hiɗi sa hatayna vi sa Farisena li laata, may sa hatayna vaŋu li laatɗi kay mige?

¹⁹ Yesu hot disiya: sum sa yiy hay dabayna fi li laata hay li ma juf-cata ka musi jarsi damna su? Hay li ma juf-cata ka jarsi damna nisi as li laatɗi.

²⁰ May buur ma nisi ma vi juf-cat goy jarsi pana ma co'o, hay na'ta nisi ma li laata.

²¹ Sa fi duɓ sligar ma wulina vun sligar ma busaynɗi, kay la naɗi sligar ma wulina ɗawni ma jet sligar ma busayn goy kuɗumu. Jet-goyta valamu ma li ŋol suwa.

²² sa fi sel vin ma wulina hay tiliy ma busaynɗi kaw, la naɗina vinna ma mun tiliyn goyo; vinna ɓulaka, tiliyn ɓulaka kaw; may vin ma wulina as selem hay tiliyn ma wulina.

Sabatna hiɗi yam-wana. Sa ma ɓalam keŋkeleŋŋa

²³ Buur tara kep Yesu jik sinena vi alkamarena, kayni hay buurta vi sabatna, sa hatayna valamu tun caw kus yam alkamarena hay tu'da visiya.

²⁴ Sa Farisena dumu: Ɗuwaŋ tige, sle ma telay kay lum hay buura vi sabatna nisi lum kayn kay mige?

²⁵ Yesu hotsi dita: nigi bay ɗuw hay ɗot tuwa kay va ma David lumna su? Hay li ma mayt tun caw cumu, namu hiɗi sum sa kuɗumna kaw,

²⁶ nam kal kalaf hay ziyda vi Lawna hay liyna vi mul ŋol ma-ɗifinna Abiyatar, nam ti caw funa, ma kuɗ vun-ma-gatna sa fi tumɗi, may tum si muliyan sa-ɗifinna tuta. Nam vul fun mi nisi sa kuɗumna kaw.

²⁷ Bugolda nam di tisiya: sabatna koti kay sana, sana may koti kay sabatnɗi.

²⁸ Kay na'ta Goora vi sana mi mul sabatna noŋo.