MARKUS 1 - BIBALDA TA PELDETTA

LOPNA VI YESU HAY GALILEYA Kusta vi Yohana ma Baptisma

¹ Tun cawta vi Labara ma firina vi Yesu Kristu goora vi Lawna.

² Ki ɗo'ay hay ɗerwelda vi Esaya sa ma jobta-Lawna nala: Humaŋu, nan gi sa ma sunda vanis goy vokaŋu, kay nam ma kot hagata vokaŋu.

³ Kayni mi del sa ma ka siwel hay fulda, kotgi hagana vi Bum-Sumuna Moɗgi hagana valam goy ɗigere.

⁴ Yohana kal ay goyo; nam li baptisma goy hay fulda, nam kus yoboyn kay baptisma vi hamda kay gida vi sulukŋa.

⁵ Sum sa hay gal Yudiya hiɗi sum sa hay Yerusalem kaf ma talamu, hay li ma nisi ham sulukŋa visi goy hamna, nam lisi baptisma hay niy-lumna Yordan.

⁶ May Yohana sligara valamu mi ɗuŋus lamgana, kanti ma furamna mi ɗigiyna, tina valamu mi baara hiɗi yumna ma hay fulda may.

⁷ Nam ka siwel yoboyn tam sumun ala: sa ma gaŋeraŋ suwan nanu ka co bugolanu, nan may nagay kay her gaa'a kay but zigew ma vun tuguruna valamn goyɗi.

⁸ Nanu, nan ligi baptisma hiɗi niyna, may nam ma ligi baptisma hiɗi Ŋusta-Peldetta.

Yesu fi baptisma fina, Matna nememu

⁹ Hay li namna kayni, Yesu fokay Nasaret hay Galileya pa, nam ma tam Yohana. Yohana lum baptisma hay niy-lumna Yordan.

¹⁰ Hay li ma Yesu jikay kulo hay niyn pa, nam wi wuralawna mali goyo, Ŋusta vi Lawna ki gukka nala sir gaa kalamu.

¹¹ Nam hum della ay goy hay wuralawn pa ka di ala: Naŋu mi Goora van ma hayan kaŋŋa, naŋ kiran ŋaa'a ŋolo.

¹² Wulini wulini Ŋusta gi ir Yesu goy hay fulda.

¹³ Nam musi hay fulda ir buur dok-fiɗi, Satan nememu. Nam ay hiɗi muur ma fulla, sa sunda-wuralawna sunumu may.

Hay Kapernawum, yita vi sa hatayn sa fiɗina

¹⁴ Bugol gita vi Yohana hay daŋgayna, Yesu kal hay Galileya; nam kus labara ma firina vi Lawna,

¹⁵ ka di ala: Liyn coowa, mulda-wuralawna maawa goboyo, hamgiya, vigi hay labara ma firina.

¹⁶ Hay li ma nam jik kel niy-lumna Galileya, nam wi ɓosiyom tuwsin ma' cuk luwanna visi goloŋ lak, kayni Simon hiɗi Andre, Nisi si sum sa ciwna.

¹⁷ Yesu disiya: tapgiyay kuɗanu, nan min muɗgi goy sa ciw sumuna.

¹⁸ Wulini wulini nisi hin luwanna visiya, tapay kuɗumu.

¹⁹ Hay li ma nam raw vokom neeɗa kayni, nam wi Yakub goora vi Sebedew hiɗi Yohana ɓasulumna, nisi lakay hay lumda taɓ ir luwanna visi lak.

²⁰ Wulini wulini nam yisiya, nisi hin busi Sebedew hiɗi sa sunumna hay lumda, nisi tap kuɗ Yesu de'.

Yer-goyta tara'a tara'a

²¹ Nisi kal hay Kapernawum. Hay buura vi Sabatna, Yesu kal hay sinagogŋa, nam tun caw hata.

²² Nisi muɗi ɦuyum kay hatta valamu, kay nam ka hatsi ki sa ma donot kuɗum nala, may ki sa wi-ɗota naɗi.

²³ Hay na'ta sa ma ful ma liwisn kalamna ay musi jarsi hay sinagogŋ dam', nam ka siwel ala:

²⁴ naŋ min lum hiɗi numa mi mige? Naŋ Yesu ma Nasaretna? Naŋ ma kayni kay cuma goyo. Nan waŋ goy ŋaa'a ŋolo, naŋ mi ma Peldetna vi Lawna.

²⁵ Yesu bayamu dumu: Baŋ vunaŋu, kalaŋay goy hay san kayni.

²⁶ Fulla ma liwisna ɦiwir san kayni ŋolo, bugolda nam ciriy ŋolo, kal goy hay sana.

²⁷ Sumun kaf muɗ ɦuyum', nisi ka job tuwsi jar tuwsi ala: Nam kayni mi meloge? Hatta wuliya ta hati hiɗi dono'o! Nam law tam fuliyan ma liwisna, fuliyan gat kuɗumu may.

²⁸ Labara vi Yesu meray goy koloy ŋolo hay gal nagat Galileya pet.

Yesu muɗ sa moyn ŋolo goy ŋaa'a

²⁹ Hay li ma nisi cukay goy hay sinagogŋa cukŋa, wulini wulini nisi cuk vo hay ziyna vi Simon hiɗi Andre; Yakub hiɗi Yohana cuk vo hiɗi nisiya.

³⁰ May kuno Simonda buri moyo kay tuwa' zumaliya, wulini wulini nisi di Yesu ka'a.

³¹ Nam tuɗ kata'a, va' ɓa' kulo'o, moyna hina'a, na' tun caw sunsiya.

³² Hay li ma vulatita coowa, bugol ɗikŋa vi fatta, nisi mar sum sa moyn kaf talamu, hiɗi sa ful kisina kaw.

³³ Sum sa hay hoyok-ziyn kaf tok tuwsi hay vun-ziyda.

³⁴ Sum sa ka las kay moyn mara'a mara'a ŋolo nam yersi goyo, nam digiɗ fuliyan goyo kaw, nam hin fuliyan diɗi, kay nisi wumu.

³⁵ Hay ŋarpita, hay li ma liyn bay fo goy ŋaa tuwa, Yesu fokay kulo'o kal goy hay liy ma fulla, nam tun caw siɗawa.

³⁶ Simon hiɗi nisi sa kuɗumna li tuwsi koloyo kay garamu.

³⁷ Hay li ma nisi fumawa, nisi dumu: sumun kaf ka garaŋu.

³⁸ Yesu disiya: tuɗaygi goy hay liyn mara'a, hay naga ma goboyna, kay nan ma kus labara ma firina ɗawni kaw; kay kuɗ na'ta kayni nan kal ay goyo.

³⁹ Nam tuɗ hay galla vi Galileya kaf, kus yoboyn hay sinagogayna, digiɗ fuliyan goyo kaw.

Sa ma kuturuna yeri goyo

⁴⁰ Sa ma kuturuna ma talamu, girif gaa vokomu, dum hiɗi giɗel delta ala: la naŋ mina, naŋ yeran goy yerge.

⁴¹ Nam muɗ kiram haw ŋolo, nam meɗ ɓalam goyo, jomu, dum ala nan miniya, yeraŋ goyo.

⁴² Wulini wulini moy-kuturuna hinimu, nam yeray goyo.

⁴³ Bugol kayni Yesu gatam vunamu, gum iramu.

⁴⁴ Yesu dum ala: laŋ ŋali, naŋ ma di kayni mi saɗi, may tuɗaŋu ɗekaŋ tuwaŋ kir muliyan-sa-ɗifinna, vulaŋ va ma li ɗifini kay yerta-goyta vaŋu ki Musus di tay nala, kay kayni ma li di-goyta tisiya.

⁴⁵ May nam kal goy jiy kayni, nam tun caw siwel goy ŋolo kay slen kayni, nam jok labara goyo kaw, ta-ta Yesu muɗ kal kulo hay hoyok-ziyn goy haraŋ loɗi, nisi ka cubum goy jiya, hay liy ma wiŋŋa, nisi ka coy talamu hay liyn kafe.